Polšča rezka źniziła vydaču mižnarodnaj abarony biełarusam. U červieni admoŭ udvaja bolš, čym stanoŭčych rašeńniaŭ

U červieni vyniesiena 21 rašeńnie ab nadańni biełarusam statusu biežanca i jašče čatyry — ab dadatkovaj abaronie. Pry hetym niehatyŭnyja rašeńni vyniesienyja pa 52 zajavach, razhlad jašče 13 spraŭ prypynieny.

Takim čynam, u červieni dola admoŭ u ahulnaj kolkaści razhledžanych spraŭ dasiahnuła 57,8%, što źjaŭlajecca biesprecedentnym pakazčykam. Dla paraŭnańnia: u studzieni-mai 2026 hoda dola niehatyŭnych rašeńniaŭ składała tolki 4,4%, u 2025 hodzie ich było 5,5%, a ŭ 2024‑m — 5,4%.

Situacyja stała rezka źmianiacca jašče ŭ mai. Kali za pieršyja čatyry miesiacy 2026 hoda biełarusam sumarna admovili ŭ nadańni abarony tolki pa 14 spravach, to ŭžo ŭ traŭni było vyniesiena 17 niehatyŭnych rašeńniaŭ.

Raniej pravaabaroncy ŭžo źviartali ŭvahu na niekatoryja niehatyŭnyja rašeńni Upraŭleńnia pa spravach inšaziemcaŭ. Z matyviroŭki admoŭ vynikała, što viedamstva źmianiła padychod da acenki situacyi ŭ Biełarusi. U pryvatnaści, u adnym z rašeńniaŭ havaryłasia, što termin daŭniny pa «pratesnym» 342‑m artykule ŭžo minuŭ, a za studzień—luty 2026 hoda, pavodle danych Pravaabarončaha centra «Viasna», nie zafiksavana vypadkaŭ asudžeńnia asob za ŭdzieł u pratestach.

Akramia taho, Upraŭleńnie pa spravach inšaziemcaŭ adznačała, što z červienia 2024 hoda pa pačatak krasavika 2026 hoda Łukašenka padpisaŭ šeść ukazaŭ ab pamiłavańni, na padstavie jakich byli vyzvalenyja jak minimum 227 palitviaźniaŭ. A ŭ 2025 hodzie na svabodu vyjšli minimum 360 palitviaźniaŭ — «u pryvatnaści, dziakujučy dypłamatyčnym namahańniam trecich dziaržaŭ, u tym liku ZŠA».

Biełarusu, sprava jakoha była pryviedziena ŭ jakaści prykładu, viedamstva admoviła ŭ mižnarodnaj abaronie, bo paličyła, što jon nie vykonvaŭ u pratestach niejkuju značnuju rolu, jakaja mahła b pryciahnuć da jaho pavyšanuju ŭvahu z boku biełaruskich uład. Dadatkova ŭ rašeńni padkreślivałasia, što jon nie byŭ raniej zatrymany za pratesty, aryštavany ci asudžany, choć pakinuŭ Biełaruś tolki ŭ śniežni 2022 hoda. A paśla 2020 hoda nie byŭ uciahnuty ŭ dziejnaść, jakuju biełaruskija ŭłady mahli b paličyć apazicyjnaj ci ekstremisckaj.

Padčas niadaŭniaj sustrečy pradstaŭnikoŭ demakratyčnych sił z kiraŭnikom Upraŭleńnia pa spravach inšaziemcaŭ Tomašam Cytrynovičam biełaruskija ŭdzielniki źviarnuli ŭvahu, što zakančeńnie terminaŭ daŭniny nie palapšaje pravavoje stanovišča biełarusaŭ, a, naadvarot, paharšaje jaho. U biełaruskaj situacyi zakančeńnie terminaŭ daŭniny nie aznačaje spynieńnia kryminalnaha pieraśledu: siłaviki prosta pierakvalifikujuć takija vypadki na bolš ciažkija artykuły, jakija praduhledžvajuć bolš doŭhija terminy pazbaŭleńnia svabody.

Padčas čakańnia rašeńnia pa spravie ab mižnarodnaj abaronie zajaŭnik nie moža padać zajavu na lehalizacyju pa inšaj padstavie, navat kali jana ŭ jaho jość (naprykład, praca, vučoba, uźjadnańnie z mužam ci žonkaj). Miž tym terminy razhladu spraŭ apošnim časam zaciahvajucca. Tamu moža atrymacca, što za čas čakańnia zakančvajucca terminy dziejańnia inšych dakumientaŭ (viz ci DNŽ), jakija paćviardžajuć lehalnaść znachodžańnia ŭ Polščy, kali jany byli.

Takim čynam, admova ŭ mižnarodnaj abaronie (kali jana nie budzie abskardžana ŭ termin) stavić pad pytańnie lehalnaść znachodžańnia ŭ Polščy i ŭ cełym u ES. Niekatorych biełarusaŭ, jakim na radzimie pahražaje niebiaśpieka, heta moža vymusić viarnucca, niahledziačy na ryzyki.

• 0
• 0
• 0
• 13
• 0
• 2
• 5
• 0