Handlovyja centry atrymlivajuć niečakanuju padtrymku ad pakaleńnia Z. Pra novuju chvalu cikavaści moładzi da šopinhu ŭ zvyčajnych kramach raskazvaje The Wall Street Journal.
Pakaleńnie Z — heta pieršaje pakaleńnie, jakoje vyrasła ŭ ličbavym śviecie sa smartfonami i sacyjalnymi sietkami. Adnak mienavita jano niečakana viartaje papularnaść staroj amierykanskaj zvyčcy — chadzić pa pakupki ŭ zvyčajnyja kramy.
Pavodle źviestak analityčnaj kampanii NielsenIQ, rost vydatkaŭ pakaleńnia Z u roźničnym handli apiaredžvaje ŭsie astatnija pakaleńni. Čakajecca, što da 2030 hoda ich štohadovyja suśvietnyja vydatki pieravysiać 12 tryljonaŭ dalaraŭ.
Pry hetym maładyja pakupniki traciać značnuju častku svaich svabodnych hrošaj mienavita ŭ fizičnych kramach. Pavodle daśledavańnia kampanii Circana, pakupniki va ŭzroście 18—24 hadoŭ u minułym hodzie zrabili 62% svaich pakupak u katehoryi ahulnych tavaraŭ u zvyčajnych kramach. Dla ludziej 25 hadoŭ i starejšych hety pakazčyk byŭ nižejšy — 52%.
Dla handlovych centraŭ heta asabliva važnaja tendencyja. Na praciahu apošnich hadoŭ jany pieražyvali składanaści: zakryvalisia asobnyja abjekty, źnižałasia naviedvalnaść. Častkova heta było źviazana z tym, što papiaredniaje pakaleńnie maładych pakupnikoŭ — milenijały — značna mienš cikavilisia «kulturaj mołaŭ», čym ich baćki. Adnak ciapier cikavaść maładoha pakaleńnia znoŭ pavialičvaje popyt na handlovyja płoščy i dapamahaje rynku pastupova adnaŭlacca.
Na dumku aŭtara WSJ, dla maładych ludziej pachod u handlovy centr staŭ asobnaj formaj adpačynku. Mnohija ź ich vyraśli ŭ epochu smartfonaŭ i praviali značnuju častku padletkavaha ŭzrostu ŭ čas pandemičnych karancinaŭ. Tamu mahčymaść sustrecca ź siabrami, pahulać pa šumnym handlovym centry, prymieryć adzieńnie abo prosta pravieści čas pa-za domam dla ich vyhladaje niečym novym i pryvabnym.
Navat kali ničoha nie kuplajecca, sama atmaśfiera šopinhu — mahčymaść pahladzieć rečy ŭžyvuju, dakranucca da tkaniny i pravieści čas u kampanii — stanovicca častkaj dośviedu, jakoha niama ŭ internecie.
Pry hetym starejšyja pakaleńni ŭ Amierycy, naadvarot, usio čaściej addajuć pieravahu internet-pakupkam. Ludzi, jakija ŭ maładości taksama pravodzili šmat času ŭ handlovych centrach, siońnia čaściej kuplajuć rečy anłajn — kab paźbiehnuć natoŭpaŭ i chutčej znajści patrebny pamier.
Sami handlovyja centry taksama adaptujucca da novaj realnaści. Ich interjery ŭsio čaściej robiać bolš «fotahieničnymi»: jarka afarmlajuć leśvicy i adkrytyja prastory, kab naviedvalniki mahli rabić tam fota i videa dla sacyjalnych sietak. Kramy pieratvarajucca nie tolki ŭ miescy pakupak, ale i ŭ svojeasablivyja placoŭki dla stvareńnia kantentu.
Unutry kram časta hučyć muzyka, arhanizujucca nievialikija akcyi abo razdajucca biaspłatnyja padarunki — usio heta pryciahvaje maładych ludziej i stvaraje atmaśfieru padziei.
Kab lepš kamunikavać z hetym pakaleńniem, pradaŭcy ŭsio čaściej vykarystoŭvajuć sacyjalnyja sietki prosta padčas prodažaŭ — naprykład, pakazvajuć pakupnikam, jak tyja ci inšyja rečy nosiać papularnyja błohiery.
Časam moładź zaprašajuć stać ambasadarami brendaŭ: jany atrymlivajuć biaspłatnuju vopratku i ŭzamien publikujuć fota abo videa ź mierapryjemstvaŭ u sacyjalnych sietkach. Takim čynam kramy atrymlivajuć rekłamu ŭ internecie, a naviedvalniki — dadatkovuju matyvacyju pryjści.
Jak padkreślivaje WSJ, rost cikavaści pakaleńnia Z da fizičnych kram užo ŭpłyvaje na stratehii handlovych kampanij. U niekatorych sietkach vyručka ŭ kramach pačała raści dvuchznačnymi tempami, a niekatoryja brendy, jakija doŭhi čas skaračali sietki kram, znoŭ adkryvajuć novyja mahaziny.
Kamientary
A vot vostriebovannosť psichbolnic u zumierov nikohda nie končitsia: každyj vtoroj imiejet psichdiahnoz, oni s udovolstvijem chodiat k psichotierapievtam