Znojdzieny sotni rachunkaŭ u šviejcarskim banku, napeŭna źviazanych z nacystami

Sotni bankaŭskich rachunkaŭ, jakija mohuć być źviazanyja z nacystami, byli vyjaŭlenyja padčas niezaležnaha rasśledavańnia ŭ archivach Credit Suisse, piša The Wall Street Journal. Heta adzin z najbujniejšych šviejcarskich bankaŭ XX stahodździa, jaki ciapier uvachodzić u hrupu UBS. Pravierku pravodzić prakuror Nił Barofski (Neil Barofsky), były fiederalny prakuror ZŠA, jakomu było daručana vyvučyć archivy banka, što datyčać pieryjadu Druhoj suśvietnaj vajny.

Na pohlad aŭtara rasśledavańnia, znojdzienyja materyjały śviedčać pra značna bolš ciesnyja i sistemnyja suviazi Credit Suisse z nacysckim režymam, čym pryznavałasia raniej. U pryvatnaści, havorka idzie pra bankaŭskija rachunki, jakija naležali ahientam SS.

Hetyja vysnovy, jak adznačaje WSJ, byli publična ahučanyja padčas słuchańniaŭ u Kamitecie Sienata ZŠA pa sudovaj uładzie. Razam z Barofskim vystupili pradstaŭniki UBS, a taksama rabin z Centra Simona Vizientala — habrejskaj pravaabarončaj arhanizacyi, jakaja jašče ŭ 2020 hodzie inicyjavała pravierku mahčymych suviaziaŭ Credit Suisse z nacystami.

Ahułam, pavodle źviestak śledstva, było vyjaŭlena kala 890 rachunkaŭ, jakija patencyjna źviazany z nacystami. Jak adznačaje aŭtar materyjału, Barofski znajšoŭ raniej nieviadomyja vypadki, kali Credit Suisse ažyćciaŭlaŭ prymusovyja pieravody aktyvaŭ jaŭrejskich klijentaŭ u banki, afilijavanyja z nacysckim režymam. Akramia taho, byli znojdzieny prykmiety taho, što bank dapamahaŭ nacysckim čynoŭnikam, jakija ŭciakali paśla vajny, uładkavacca ŭ Arhiencinie.

Na praciahu dziesiacihodździaŭ paśla Druhoj suśvietnaj vajny šviejcarskija banki, jak piša WSJ, admaŭlali siemjam achviar Chałakostu ŭ dostupie da infarmacyi, śćviardžajučy, što nie majuć źviestak pra rachunki i majomaść ich svajakoŭ.

Situacyja źmianiłasia tolki ŭ kancy 1990‑ch hadoŭ, kali paśla praciahłych dypłamatyčnych i jurydyčnych sprečak UBS i Credit Suisse zaklučyli pahadnieńnie z habrejskimi arhanizacyjami. U miežach hetaj damovy było vypłačana amal 1,3 miljarda dołaraŭ. Pahadnieńnie praduhledžvała kampiensacyi ŭładalnikam rachunkaŭ, prymusovym rabočym i inšym paciarpiełym, a taksama pavinna było kančatkova zakryć pytańnie roli šviejcarskich bankaŭ u hady vajny.

Niazručnaja spadčyna

Jak piša WSJ, u apošnija hady UBS dazvoliŭ kamandzie Barofskaha pracavać z archivami Credit Suisse, u vyniku čaho i byli znojdzienyja rachunki, jakija nie byli raskrytyja da pahadnieńnia 1990-ch. Adnak ciapier, jak piša WSJ, UBS kateharyčna admaŭlajecca raskryvać unutranuju jurydyčnuju pierapisku taho času. Bank patrabuje harantyj, što suprać jaho nie buduć zaviedzienyja novyja spravy na padstavie vyjaŭlenych faktaŭ i što pahadnieńnie kanca 1990‑ch hadoŭ nie budzie pierahledžanaje.

Takaja zakrytaść banka nie abmiažoŭvajecca tolki jurydyčnymi aśpiektami — jana tyčycca i samich archiŭnych fondaŭ. Jak adznačaje aŭtar materyjału, dadatkovy niedavier vyklikaje kateharyčnaja admova UBS adkryć svaje ŭłasnyja archivy vajennaha času, jakija zachoŭvajucca asobna ad dakumientaŭ Credit Suisse.

Hetaja naściarožanaść maje pad saboj važkija padstavy. Jak piša WSJ, u 1990‑ia hady UBS pryznaŭ fakt źniščeńnia zapisaŭ, jakija mahli mieć značeńnie dla rasśledavańnia. Hety skandał tady atrymaŭ rozhałas tolki dziakujučy načnomu vartaŭniku, jaki ŭbačyŭ praces źniščeńnia i vyratavaŭ niekatoryja dakumienty.

Vydańnie adznačaje, što Credit Suisse paciarpieŭ krach u sakaviku 2023 hoda paśla sieryi skandałaŭ i finansavych prablem, paśla čaho UBS vyratavaŭ jaho pry padtrymcy šviejcarskaha ŭrada. Abodva banki byli najbujniejšymi ŭ krainie i paśla vajny pahłynuli mnostva drobnych finansavych ustanoŭ.

Na minułym tydni UBS źviarnuŭsia ŭ fiederalny sud ZŠA z prośbaj zabaranić Centru Simona Vizientala i inšym jaŭrejskim arhanizacyjam, jakija ŭdzielničali ŭ pahadnieńni 1990‑ch hadoŭ, stavić pad sumnieŭ jaho dziejańni. Bank taksama patrabuje zabarony na lubyja novyja pazovy, vypłaty i «publičnyja sprečki» vakoł roli šviejcarskich bankaŭ u hady vajny.

Advakaty Centra Simona Vizientala, jak piša WSJ, u adkaz zajavili, što takija patrabavańni parušajuć prava na svabodu słova i pieraškadžajuć misii arhanizacyi — daśledavać i rabić publičnymi ŭsie aśpiekty antysiemickaj palityki nacysckaha režymu da, padčas i paśla Druhoj suśvietnaj vajny.

Čakajecca, što kropka ŭ hetaj sprečcy moža być pastaŭlena na sudovym pasiadžeńni, jakoje pryznačana na 12 sakavika.

• 0
• 0
• 0
• 0
• 0
• 0
• 0
• 0