Kitajskija chakiery na praciahu niekalkich hadoŭ mieli dostup da mabilnaj suviazi ŭrada Vialikabrytanii

Kitajskija chakiery, źviazanyja ź dziaržaŭnymi śpiecsłužbami KNR, na praciahu jak minimum troch hadoŭ mieli dostup da mabilnych telefonaŭ vysokapastaŭlenych supracoŭnikaŭ urada Vialikabrytanii. Jak paviedamlaje The Telegraph, abjektam ataki, jakaja atrymała nazvu «Salany tajfun» (Salt Typhoon), stali supracoŭniki rezidencyi premjer-ministra na Daŭninh-stryt, u tym liku najbližejšyja pamočniki troch kiraŭnikoŭ urada — Barysa Džonsana, Liz Tras i Ryšy Sunaka.

Ci byli niepasredna skampramietavanyja telefony samich premjer-ministraŭ, zastajecca nieviadomym, adnak krynicy, znajomyja z rasśledavańniem, śćviardžajuć: uzłom pranik u samaje serca Daŭninh-stryt.

Jak adznačaje vydańnie, uzłom brytanskaj uradavaj suviazi — heta tolki adzin z epizodaŭ maštabnaj špijonskaj apieracyi Piekina, jakaja achapiła šerah dziaržaŭ. Siarod hałoŭnych metaŭ hetaj hłabalnaj kampanii apynulisia ŭsie krainy-ŭdzielnicy raźviedvalnaha aljansu «Piać vačej» (Five Eyes): akramia Vialikabrytanii, heta Złučanyja Štaty, Aŭstralija, Kanada i Novaja Ziełandyja.

Choć pieršyja ŭzłomy datujucca 2021 hodam, śpiecsłužby vyjavili ich tolki ŭ 2024-m, kali ZŠA raskryli maštabnaje praniknieńnie ŭ telekamunikacyjnyja kampanii pa ŭsim śviecie.

Praz dostup da infrastruktury suviazi Kitaj moh atrymlivać danyja miljonaŭ karystalnikaŭ. Były namieśnik daradcy prezidenta ZŠA pa nacyjanalnaj biaśpiecy En Nojbierhier paćvierdziła, što chakiery mieli techničnuju mahčymaść «zapisvać telefonnyja razmovy pa ŭłasnym žadańni».

Taki ŭzrovień dostupu tearetyčna dazvalaŭ Piekinu pierachoplivać tekstavyja paviedamleńni ci, jak minimum, źbirać kaštoŭnyja mietadanyja: bačyć, z kim i jak časta kamunikujuć čynoŭniki, a taksama adsočvać ich prybliznaje miescaznachodžańnie praz hieałakacyju.

Pakul zastajecca nie zusim zrazumiełym, jakuju mienavita infarmacyju atrymali złačyncy z telefonaŭ supracoŭnikaŭ Daŭninh-stryt.

Krynicy ŭnutry zachodnich śpiecsłužbaŭ pryznajuć, što ŭzrovień abarony brytanskich sietak byŭ vyšejšy, čym u ZŠA, u tym liku dziakujučy Zakonu ab biaśpiecy telekamunikacyj 2021 hoda. Adnak vysokapastaŭlenyja amierykanskija čynoŭniki ličać «Salany tajfun» adnoj z samych paśpiachovych raźviedvalnych apieracyj u historyi.

Pavodle acenak ekśpiertaŭ, Kitaj metanakiravana źbiraje palityčnuju infarmacyju pra brytanskich deputataŭ i pracesy pryniaćcia rašeńniaŭ. Zachodnija śpiecsłužby charaktaryzujuć Piekin jak adnaho z samych ahresiŭnych i technałahična padrychtavanych hulcoŭ u śfiery kibier– i radyjoelektronnaj raźviedki.

Jak adznačaje vydańnie, u adroźnieńnie ad ZŠA, dzie ŭłady adkryta pryznali, što kitajskija chakiery sačyli navat za kandydatami ŭ prezidenty, brytanski ŭrad da niadaŭniaha času dziejničaŭ bolš aściarožna, zhadvajučy tolki pra «kłastary aktyŭnaści» ŭ svaich sietkach. Tym nie mienš, maštab prablemy vymusiŭ MI5 vypuścić śpiecyjalnaje papiaredžańnie dla parłamienta ab pahrozie kitajskaha špijanažu.

U svaju čarhu pasolstva KNR u Łondanie nazvała zajavy pra ŭzłom «biespadstaŭnymi» i zaklikała nie palityzavać pytańni kibierbiaśpieki.

• 0
• 0
• 1
• 1
• 0
• 0
• 0
• 0