«Naiŭna spadziavalisia zarablać u Jeŭropach, pryjazdžać dadomu lačyć zuby na chalavu i zdavać kvateru». Prapahanda pačała apraŭdvać darahija žyroŭki dla «darmajedaŭ»
U Biełarusi z 1 kastryčnika pamianiaŭsia paradak raźliku płaty za žyllova-kamunalnyja pasłuhi dla niezaniatych u ekanomicy hramadzian. U sacyjalnych sietkach ludzi aburylisia vialikim koštam i niespraviadlivym, na ich dumku, padychodam. U adkaz dziaržaŭnyja ŚMI vystupili z tłumačeńniami i apraŭdańniami.
Asnoŭny ŭdar pa krytykach uziała na siabie hazieta «Minskaja praŭda», na staronkach jakoj vyjšła adrazu dva artykuły na hetuju temu.
Pieršy materyjał, napisany žurnalistkaj Varvaraj Marozavaj, ujaŭlaje saboj ahlad reakcyj u sacsietcy Threads. Aŭtarka adrazu akreślivaje svaju pazicyju, ź ironijaj zaŭvažajučy:
«Vidać, hramadzianie naiŭna spadziavalisia, što buduć zarablać u Jeŭropach, pryjazdžać dadomu lačyć zuby na chalavu i zdavać kvateru, a padatki pry hetym nie płacić».
Marozava koratka tłumačyć sutnaść źmien: kali ŭłaśnik žylla pryznany «nie zaniatym u ekanomicy», to aciapleńnie, padahreŭ vady i hazazabieśpiačeńnie dla ŭsich jaho kvater raźličvajuć pa poŭnym taryfie. Paśla hetaha jana raźvivaje svoj asnoŭny tezis:
«I tut u niezaniatych «padhareła»: jany ž pracujuć! Padatki, praŭda, płaciać niedzie tam, ale nijakaha paradoksu ŭ hetaj situacyi nie bačać. I ščyra vierać, što dziaržava budzie pa-raniejšamu poŭnaściu aciaplać ich kvatery, vyvozić śmiećcie i sačyć za spraŭnaściu liftaŭ».
Vykazaŭsia i palityčny ahladalnik haziety Andrej Łazutkin. Jon tłumačyć sens źmien «kalektyŭnaj adkaznaściu»:
«kab svajaki i tyja, chto sumiesna pražyvaje, cisnuli na čałavieka: toj pavinien pracavać ci znajści varyjanty samazaniataści».
Jak davodzić prapahandyst, akramia nievialikaj kolkaści ludziej, jakija sapraŭdy «viaduć asacyjalny ład žyćcia», asnoŭny ŭdar nakiravany na tych, chto maje «lavak, ź jakoha padatki płaciać u Polščy». Takija siemji, pierakanany Łazutkin, majuć dastatkova hrošaj, tamu dla ich pavyšany taryf nie źjaŭlajecca niepadjomnym. U hetym kantekście žyroŭka pieratvarajecca ŭ instrumient viartańnia srodkaŭ u biudžet:
«Takim čynam dziaržava častkova viartaje hetyja padatkavyja srodki praz kamunałku».
Ahladalnik źviartaje ŭvahu na jašče adnu važnuju detal: ciapier pa poŭnym taryfie daviadziecca płacić navat tym ułaśnikam, jakija pracujuć, ale aficyjna zdajuć kvateru «darmajedu». Heta, pavodle Łazutkina, zroblena dla taho, kab paźbiehnuć fiktyŭnych ździełak:
«Naprykład, raniej dva prysutnyja ŭ Varšavie tavaryšy mahli fiktyŭna zdać adzin adnamu kvatery i nie płacić padatkaŭ. Ciapier takija varyjanty buduć vielmi prablemnymi».
Łazutkin śćviardžaje, što hramadstvu naviazvajecca pamyłkovaje razumieńnie prablemy:
«Baraćba idzie nie z darmajedami, jak heta padajuć internet-resursy, a z šeraj zaniataściu».
Na jaho dumku, novyja praviły — heta nie tolki sposab zboru padatkaŭ, ale i instrumient sacyjalna-ekanamičnaj palityki. Jany pavinny stać «strymlivajučym faktaram vyjezdu na zarobki», kali ŭ čałavieka zastajucca siamja i nieruchomaść u Biełarusi.
Bolš za toje, jak davodzić Łazutkin, heta miera prymusić ludziej pieraafarmlać žyllo na tych, chto realna ŭ im žyvie. U vyniku dziaržava atrymlivaje bolš dakładnuju karcinu žyllovaha fondu:
«Našaja dziaržava buduje niamała kvater za niemałyja hrošy, i chaciełasia b razumieć, chto ŭ ich realna žyvie potym i kolki mietraŭ realna prypadaje na ludziej u krainie. Ci treba subsidavać mietry, kali kvatery potym stajać pustyja? Ci, moža, treba bolš spraviadliva vyznačać katehoryi tych, chto maje patrebu?»
«Pytańni hetyja rytaryčnyja, tamu što ŭ Biełarusi i tak samaja tannaja kamunałka ŭ Jeŭropie i SND, asabliva kali čałaviek pracuje, i zvyš hetaha maje ilhotny taryf na elektraaciapleńnie ŭ 3 kapiejki. (…) Ale heta nie značyć, što ŭ Biełarusi vada i śviatło tańniejšyja, čym u inšych krainach śvietu — prosta ich subsidujuć za košt tych, chto pracuje (u mienšaj stupieni), a ŭ bolšaj stupieni — z dachodaŭ dziaržaŭnych pradpryjemstvaŭ i padatkaŭ jurydyčnych asob», — davodzić prapahandyst.
U Ministerstvie žyllova-kamunalnaj haspadarki siońnia prakamientavali, što asnoŭnaja meta novaŭviadzieńniaŭ — stvaryć «bolš spraviadlivuju sistemu raźmierkavańnia nahruzki ŭ žyllova-kamunalnaj śfiery».
Kamunałku dla «darmajedaŭ» pačali naličvać pavodle novych praviłaŭ. Ludzi nie mohuć pavieryć ličbam u žyroŭkach
Jak u Biełarusi vyšukvajuć «darmajedaŭ» i čaho ad ich chočuć
«Zarobku 3600, jak kažuć u statystycy, u našaj siamji niama». Biełarusy raskazali, kolki zarablajuć i jak raźmiarkoŭvajuć biudžety
Ciapier čytajuć
Kaleśnikava: «Mianie šakuje maštab nianaviści i ahresii». Maryja patłumačyła, što dla jaje značyć viartańnie da narmalnaści38
Kaleśnikava: «Mianie šakuje maštab nianaviści i ahresii». Maryja patłumačyła, što dla jaje značyć viartańnie da narmalnaści
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ99
Kamientary