Premjer Karni zapatrabavaŭ pavažać suvierenitet Kanady paśla sustreč sieparatystaŭ z Albierty z členami administracyi Trampa
Karni zajaviŭ, što «jany čakajuć ad administracyi ZŠA pavahi da suvierenitetu Kanady i jon zaŭsiody naŭprost kaža pra heta prezidentu Trampu».
Premjer-ministr Kanady Mark Karni i premjer pravincyi Albierta Daniel Śmit zajavili, što ZŠA varta pavažać suvierenitet Kanady. Heta adbyłosia paśla źjaŭleńnia infarmacyi ab tym, što pradstaŭniki administracyi Trampa abmiarkoŭvali ź sieparatystami z Albierty mahčymaść vychadu pravincyi sa składu krainy, piša Bi-bi-si.
Karni zajaviŭ, što jany «čakajuć ad administracyi ZŠA pavahi da suvierenitetu Kanady — ja zaŭsiody prama kažu pra heta prezidentu Trampu».
U svaju čarhu premjer Albierty Daniel Śmit vykazała nadzieju, što ŭłady ZŠA pakinuć abmierkavańnie «demakratyčnaha pracesu» ŭ pravincyi samim albiertcam i kanadcam.
Sieparatysty zaraz źbirajuć podpisy pad pietycyjaj za adździaleńnie Albierty, pravincyi va ŭnutranaj častcy kantynienta na zachadzie Kanady. Heta moža pryvieści da refierendumu.
Jak pakazvajuć apytańni hramadskaj dumki, u Albiercie ideju adździaleńnia padtrymlivajuć tolki 15—20% žycharoŭ.
Hazieta Financial Times paviedamiła, što sieparatysty pravodzili sustrečy z amierykanskimi aficyjnymi asobami. Heta vyklikała krytyku z boku lidaraŭ niekalkich kanadskich pravincyj.
Premjer Brytanskaj Kałumbii Devid Ebi zajaviŭ, što «jechać u inšuju krainu i prasić dapamohi ŭ razvale Kanady — dla hetaha jość staramodnaje słova, i heta słova — «zdrada».
Kamientar Ebi ŭžo nazvaŭ «durnavatym» Džefry Rat, adzin ź sieparatystaŭ Albierty, jaki sustrakaŭsia z amierykancami ŭ Vašynhtonie. Rat — suzasnavalnik prajekta Alberta Prosperity Project («prajekt praćvitańnia Albierty»), arhanizacyi, jakaja prasoŭvaje ideju refierendumu ab niezaležnaści.
Jon paviedamiŭ, što jaho hrupa za apošni hod trojčy naviedvała Vašynhton jak pryvatnyja asoby «dla ŭstanaŭleńnia faktaŭ». Pavodle jaho słoŭ, na sustrečach z vysokapastaŭlenymi pradstaŭnikami administracyi Trampa abmiarkoŭvałasia ažyćciavimaść vydačy kredytu na sumu 500 młrd dalaraŭ ZŠA ŭ vypadku adździaleńnia pravincyi, pry hetym jon padkreśliŭ, što hrupa nie zapytvała finansavańnie. Rat admoviŭsia ŭdakładnić, z kim mienavita sustrakałasia hrupa.
U Biełym domie na pytańnie Bi-bi-si ab publikacyi Financial Times adkazali, što «pradstaŭniki administracyi sustrakajucca z mnohimi pradstaŭnikami hrup hramadzianskaj supolnaści. Nijakaj padtrymki abo jakich-niebudź inšych abaviazacielstvaŭ pry hetym vykazana nie było».
Kiraŭniki ŭradaŭ kanadskich pravincyj sabralisia ŭ Atavie razam z Karni napiaredadni handlovych pieramoŭ, jakija ŭklučajuć pierahlad pahadnieńnia ab svabodnym handli pamiž ZŠA, Kanadaj i Mieksikaj.
Śmit zajaviła, što dabjecca abmierkavańnia svaich aściaroh z amierykanskimi aficyjnymi asobami ŭ Vašynhtonie i z pasłom ZŠA.
Choć jaje partyja (jana naležyć da Abjadnanaj kansiervatyŭnaj partyi) padtrymlivaje «mocnuju» Albiertu ŭ składzie Kanady, jana skazała, što nie budzie «demanizavać» žycharoŭ Albierty, jakija padtrymlivajuć praviadzieńnie refierendumu.
«Nam treba dać žycharam Albierty nadzieju», — skazała jana.
Na minułym tydni ministr finansaŭ ZŠA Skot Biesient zajaviŭ, što varta było b dazvolić albiertcam uvajści ŭ skład ZŠA.
«Albierta vałodaje vielizarnymi pryrodnymi resursami, ale im nie dazvalajuć pabudavać trubapravod da Cichaha akijana, — zajaviŭ jon u televizijnym intervju. — Ja dumaju, nam varta dazvolić im pryjści da nas, u ZŠA, — dadaŭ jon. — Albierta — naturalny partnior dla ZŠA. U ich vydatnyja resursy. Žychary Albierty — vielmi niezaležnyja ludzi».
U pravincyi sapraŭdy daŭno narastaje niezadavolenaść Atavaj, asabliva z-za pytańniaŭ raspracoŭki pryrodnych resursaŭ, adnak niezaležnaść Albierty pa-raniejšamu małavierahodnaja.
Niadaŭna Karni padpisaŭ pahadnieńnie z Albiertaj, jakoje adkryvaje šlach dla budaŭnictva naftapravoda da Cichaha akijana, adnak jamu supraćstaić Ebi, i prajekt sutykajecca z surjoznymi ciažkaściami.
Zhodna ź niadaŭnim apytańniem Ipsos, prykładna troje ź dziesiaci žycharoŭ Albierty prahałasavali b za pačatak pracesu adździaleńnia i pierahlad adnosin z Kanadaj. Kala 20% ź ich razhladajuć hałasavańnie za vychad jak «simvaličny» sposab vykazać svajo palityčnaje niezadavolenaść. Pry hetym u kancy minułaha hoda było sabrana bolš za 430 tysiač podpisaŭ pad pietycyjaj za adzinuju Kanadu ŭ procivahu sieparatysckamu ruchu.
Premjer Ńju-Bransuika Śjuzan Chołt u čaćvier zajaviła, što, pa jaje mierkavańni, bolšaść žycharoŭ Albierty chočuć bačyć Kanadu adzinaj.
«Ja dumaju, havorka idzie ab mienšaści ludziej, jakija padymajuć šum, — skazała jana. — Ja vielmi aptymistyčna nastrojena i liču, što bolšaść žycharoŭ Albierty prademanstrujuć svaju luboŭ da hetaj krainy i žadańnie być jaje častkaj».
Kamientary