Pašyreńnie mietro, znos staroj zabudovy. Padviali vyniki abmierkavańnia novaj redakcyi hienpłana Minska

Za praz dva tydni abmierkavańnia ŭ rajonnyja administracyi pastupiła 212 zvarotaŭ ad žycharoŭ.

— Raniej takoj vialikaj kolkaści piśmovych zvarotaŭ nakont prajekta hienpłana nie pastupała, — prakamientavaŭ staršynia kamiteta architektury i horadabudaŭnictva Minharvykankama Viktar Hućko.

U asnoŭnym haradžan chvalavali temy transpartnaha raźvićcia stalicy; pierśpiektyvy žyłych, vytvorčych, hramadskich terytoryj; los pryvatnaha siektara, a taksama pytańni ekałohii, raźvićcia inžyniernaj infrastruktury.

V. Hućko adznačyŭ, što značnaja častka haradžan pažadała aznajomicca z pradstaŭlenymi materyjałami asabista i dla hetaha pryjazdžała ŭ administracyju Maskoŭskaha rajona, dzie była arhanizavana ekspazicyja, demanstravałasia prezientacyja prajekta, a śpiecyjalisty «Minskhrada» mahli dać nieabchodnyja tłumačeńni.

Što tyčycca pytańniaŭ, to nie ŭsie ź ich adnosiacca da kampietencyi hienpłana stalicy. Časta haradžanie abaznačali prablemy, jakija pavinny vyrašać na miescach rajonnyja administracyi.

Naprykład, ustanoŭka šumaachoŭnych ekranaŭ uzdoŭž MKAD, arhanizacyja dadatkovych piešachodnych darožak u mikrarajonach, raźmiaščeńnie łavačak u miescach adpačynku. Takija zvaroty nakirujuć dla razhladu ŭ miascovyja vykanaŭčyja orhany. A voś stratehičnyja pytańni razhledzieli na architekturna-horadabudaŭničym Saviecie pry hałoŭnym architektary horada Minska.

Transpart

Samuju vialikuju cikavaść, miarkujučy pa kolkaści listoŭ, vyklikała tema transpartnaha raźvićcia stalicy. U asnoŭnym minčanie prapanoŭvali kankretnyja pieramieny. Naprykład, pradoŭžyć druhuju liniju mietro da Šabanoŭ, a pierśpiektyŭnuju čaćviortuju prakłaści bližej da Ściapianki i «Paŭnočnaha Bieraha». Pabudavać u horadzie niekalki padziemnych transpartnych tunelaŭ, što, pa mierkavańni aŭtara zvarotu, palepšyć darožnuju situacyju. Pierahledzieć miescy raźmiaščeńnia budučych stancyj mietrapalitena. Uźvieści piešachodny most ź Sierabranki ŭ Łošycki park.

Śpiecyjalisty «Minskhrada» razhledzieli kožny zapyt i prainfarmavali na saviecie, što ŭ asnoŭnym prapanavanyja pieramieny niemetazhodnyja.

Padziemka nie budzie dastatkova zahružana, kali jaje prakłaści ŭ Šabany, Ściapianku i navat u «Paŭnočny Bierah».

Rentabielniej padvozić nasielnictva da mietro naziemnym transpartam. Heta ž datyčycca padziemnych tunelaŭ — technika-ekanamičnaje abhruntavańnie ich nieabchodnaści vyklikaje pytańni.

Adnak častku pažadańniaŭ haradžan pryniali da viedama i ŭchvalili. Bolš za toje, na saviecie paviedamili, što ŭžo płanujuć pieramieny.

Naprykład, kab prybrać zatory na Partyzanskim praśpiekcie, bližej da vyjezdu z horada namiečana ŭ bližejšyja niekalki hadoŭ sprajektavać paŭnočnaha i paŭdniovaha dubloraŭ praśpiekta, jakija projduć na padaŭžeńni vuł. Bajkalskaj i Śvisłackaj, z vychadam za MKAD, a taksama prystupić da ich budaŭnictva. Płanujecca stvareńnie raźviazak nad čyhunkaj i rakoj Śvisłačču, kab zabiaśpiečyć pakul adsutnyja suviazi roznych rajonaŭ horada pa najkaraciejšych šlachach.

Padtrymali prapanovu pradoŭžyć u pierśpiektyvie rejkavy transpart u kirunku Łahojska, u pieršuju čarhu — da Baraŭlan.

Što tyčycca raźmiaščeńnia budučych stancyj mietro, to tut u śpiecyjalistaŭ «Minskhrada» jość vyraznaja transpartnaja madel horada, jakaja daje padkazki, dzie aptymalna raźmiaščać stancyi padziemki i jak lepš prakłaści trasu.

Žyllo

U hetym raździele taksama byli ŭ asnoŭnym kankretnyja pažadańni. Naprykład, žychary vuł. Krasnaja Słabada, čyje damy iduć pad znos, prasili paskoryć praces, pakolki budynki staryja, patrabujuć rekanstrukcyi. Na saviecie adznačyli, što kali na praciahu troch hadoŭ paśla zaćviardžeńnia PDP znosu nie adbyłosia, to z dazvołu rajonnaj administracyi ŭłaśniki mohuć rekanstrujavać damy navat z pavieličeńniem ahulnaj (niežyłoj) płoščy. Aŭtaram zapytaŭ daduć piśmovyja tłumačeńni na hety kont.

Tut spatrebicca poŭnaja transfarmacyja, u suviazi z čym u hienpłanie adnieśli terytoryju da žyłoj šmatkvaternaj zabudovy, ale heta nie značyć, što pieramieny nasoŭvajucca zaŭtra. Znosić pryvatnyja damy pakul nie stanuć.

Žycharoŭ cikavić los małapaviarchovaj (u 1—3 pavierchi) zabudovy. U 2005 hodzie ŭ horadzie raspracavali prahramu rekanstrukcyi takoha žylla, ale pakul jaje aktyŭna nie realizujuć. Siońnia mnohija minčanie prosiać zachavać 2— 3‑paviarchovyja damy.

— Miarkuju, tema zasłuhoŭvaje asobnaj uvahi, — adznačyŭ A. Akienćjeŭ. — Adkazam žycharam mahła b stać abnoŭlenaja schiema rekanstrukcyi padobnaj zabudovy, u tym liku z zachavańniem častki damoŭ, dzie heta mahčyma.

A voś pažadańnie haradžan źmianić zonu pramysłovaj zabudovy ŭ rajonie zav. S. Kavaleŭskaj na žyłuju zastałosia biez padtrymki.

— Ideju ab vynasie pradpryjemstvaŭ z hetaj zony razhladaŭ Łukašenka, — padkreśliŭ Viktar Hućko. — Łukašenka nie padtrymaŭ prapanovu. Terytoryja zastaniecca vytvorčaj.

Nie ŭchvalili na saviecie i prośbu žycharoŭ vuł. Bryleŭskaj, čyj dom na 20 kvater raźmiaščajecca prosta kala transpartnaj raźviazki. Minčanie prasili pierahledzieć arhanizacyju ruchu pablizu žylla, prybrać hruzavy transpart.

Niekatoryja zvaroty źviazany sa znosam pryvatnaha siektara ŭ Sielhaspasiołku, na vuł. Bresckaj, Sievastopalskaj, Husoŭskaha, u rajonie vuł. Ł. Biady.

Pa detalovych płanach, asnoŭnaja častka siadzib u pieraličanych zonach zachoŭvajecca, znos tyčycca ŭ asnoŭnym damoŭ, raźmieščanych uzdoŭž mahistralaŭ. Uličvajučy, što z momantu zaćviardžeńnia PDP nie znajšłosia inviestaraŭ, hatovych da rekanstrukcyi nazvanych terytoryj, žychary prosiać jašče raz viarnucca da temy i zachavać pryvatny siektar. Na saviecie vyrašyli ŭ rabočym paradku praanalizavać detalovyja płany zhadanych terytoryj, kab vyznačycca kančatkova.

Inšyja pytańni

Minčanie prapanoŭvali ŭładkavańnie parkaŭ na kankretnych terytoryjach, naprykład na vornych ziemlach pamiž Sucharava i Malinaŭkaj. Žychary Kałodziščaŭ-2 prasili zrabić zialony kalidor pamiž ich zabudovaj i budučym žyłym rajonam Zialony Bor. Ale nie ŭsie inicyjatyvy paličyli abhruntavanymi.

Jašče adna tema zvarotaŭ žycharoŭ — uklučeńnie ŭ skład horada niekatorych nasielenych punktaŭ pablizu Minska (Kopišča, Ścikleva, Hatova, Baraŭlan, Sienicy). Na saviecie rastłumačyli, što padobnyja rašeńni prymajuć tolki pa ŭzhadnieńni z Łukašenkam i pry najaŭnaści ekanamičnych abhruntavańniaŭ dla abjadnańnia. Pakul u hetym niama nieabchodnaści. Ale zastajecca faktam toje, što ŭ małych nasielenych punktach patrabujecca stvarać umovy dla kamfortnaha žyćcia nasielnictva. Siońnia ž jość istotnaja roźnica ŭ sacyjalnych standartach u stalicy i nievialikich pasieliščach.

• 0
• 0
• 1
• 1
• 0
• 0
• 0
• 0