Pryjom piedyjatra za 100 rubloŭ? Daktary tłumačać, čamu takija hrošy
Ministerstva achovy zdaroŭja ŭziało pad kantrol ceny ŭ pryvatnych miedycynskich centrach. Ale na praktycy ceny na pryjom praciahvajuć vyklikać sprečki pamiž miedykami i pacyjentami.
Pra niepryjemny vypadak raspaviała ŭ instahramie piedyjatarka Jana Burko, jakaja pracuje ŭ dziciačym pryvatnym miedcentry Baby Boss. Niadaŭna jana jak ekśpiertka vystupała na fiestyvali i abmiarkoŭvała z aŭdytoryjaj pryznačeńnie lekaŭ, jakija nie adpaviadajuć pryncypam dokaznaj miedycyny.
— Ja žartam skazała: «Prychodźcie da mianie na pryjom, i ja vam dakładna nie budu heta pryznačać». U mianie adrazu spytali, dzie ja prymaju. Ja nazvała svoj miedcentr. I niečakana ad adnaho z baćkoŭ pačuła: «Heta ŭ vas piedyjatry 100 rubloŭ biaruć za adzin pryjom?».
Doktarka stała kazać, što nie va ŭsich taki ceńnik.
— Pieršasny pryjom u mianie nie kaštuje 100 rubloŭ. Ale kali da mianie ŭpieršyniu pryjdzie dzicia da hoda, jakoje ni razu nie było ŭ nas u centry ni ŭ adnaho piedyjatra, jaho hadzinny pryjom budzie kaštavać bolš za 100 rubloŭ.
Jana Burko tłumačyć taki niebiudžetny košt: kaža, što hadzinu budzie źbirać anamniez, pačynajučy z taho, jakoj była ciažarnaść u maci, i da siońnia. A kali dzicia zdarovaje i niama niejkich śpiecyfičnych pytańniaŭ, dyk z baćkami abmiarkujuć vakcynacyju, charčavańnie, płanavyja abśledavańni. Plus, kaniečnie, sam ahlad maleńkaha pacyjenta.
— Ale nie maje značeńnia, jakoha ŭzrostu dzicia — kali jano ŭpieršyniu trapiła da mianie ŭ miedycynski centr, ja budu źbirać toj ža anamniez. Budu pytacca pra ciažarnaść, pra pieršyja hady žyćcia, nie zaležna ad taho, dva jamu hady ci piatnaccać. I paśla ahladu ja pavinna vyznačyć płan dalejšych dziejańniaŭ, dalejšych abśledavańniaŭ — kali jany patrebny.
Doktarka pryznaje: u niekatorych jaje kaleh-piedyjatraŭ u centry — tyja, u kaho zapis na miesiac napierad — košt kansultacyi sapraŭdy bolš za 100 rubloŭ za pryjom. Ale jana ličyć heta adekvatnym:
— Kali vy hadami chodzicie pa daktarach i nie viedajecie, što z vašym dziciom, i prychodzicie na praciahłuju kvalifikavanuju kansultacyju, na jakoj vam raspaviaduć usio ad A da Ja… Heta budzie kaštavać našmat tańniej, čym vy patracili za ŭsie minułyja hady na abśledavańni i lačeńnie dziciaci.
Mierkavańni kamientataraŭ pad videa padzialilisia.
Niechta paraŭnoŭvaŭ košt pryjomu ŭ doktara z bjuci-pasłuhami: «Manikiur za 100 rubloŭ — norma (na try tydni maksimum), a zdaroŭje dziciaci — nadta doraha. Paradoks».
Inšyja adznačali, što daloka nie kožnamu patrebna kansultacyja ciaham hadziny: «Kali ja pryviadu 15-hadovaje dzicia z padazreńniem na pnieŭmaniju, my budziem abmiarkoŭvać maju ciažarnaść, rody i jak raźvivałasia dzicia pa hadach? A pryvioŭšy miesiačnaje dzicia na płanavy ahlad, ja taksama nie chaču siadzieć cełuju hadzinu, muryžyć dzicia, abmiarkoŭvajučy, naprykład, pytańni vakcynacyi. Pa pytańniach vakcynacyi ja pryjdu asobna i bieź dziciaci. A prosta ciahnuć kata za chvost, kab zaniać hadzinu pryjomu tam, dzie niama nieabchodnaści, nie baču sensu».
U kamientaryjach źjaviłasia i inšaja doktarka-błohierka — Aksana Doŭnar-Zapolskaja, jakaja taksama pracuje piedyjatarkaj u Baby Boss. Jana kandydatka miedycynskich navuk. Aksana napisała, što 100 rubloŭ kaštuje jaje pryjom.
Doktarka padkreśliła, što ŭ baćkoŭ jość zaŭsiody biaspłatnaja alternatyva — jany mohuć čytać błohi ekśpiertaŭ u sacyjalnych sietkach. Sama ž žančyna ličyć, što doktar nie pavinien apraŭdvacca za košt svajho pryjomu, bo tracić šmat siłaŭ i hrošaj na navučańnie.
— Padpiska UpToDate — 500 dalaraŭ štohod, kursy ŭ mocnych piedyjatraŭ i śpiecyjalistaŭ — taksama nie małyja hrošy. I nichto na heta z nas, piedyjatraŭ, nie skardzicca. Zapłaciŭšy 100 rubloŭ za pryjom, baćki harantavana atrymlivajuć kvalifikavanuju kansultacyju biez vady i ciemrašalstva.
Jana piša, što abiasceńvańnie śpiecyjalistaŭ nizkaj apłataj za pryjom daŭno pavinna było zastacca ŭ minułym. A baćki sami mohuć abrać, da jakoha doktara iści.
Abureńnie padtrymała i hiniekołah Maryja Mačulskaja: «Daŭno paŭtarajuć, što miedycyna — śfiera pasłuh. Tamu i kłas pasłuh moža być rozny. Ad ekanom varyjantu da luksu. Pieraloty, adzieńnie i hetak dalej majuć hety kłas, a daktary chto? Dobraachvotnyja raby? Jość paliklinika, tam biaspłatna. Košt pryjomu i jakaść pasłuh vybiraje pacyjent. A doktar taksama čałaviek i choča za svaju pracu atrymlivać adpaviednuju apłatu! A kali ŭličyć, kolki kaštuje navučańnie doktara, dyk košt pryjomu mizerny».
Da dyskusii dałučyłasia zasnavalnica Baby Boss, piedyjatarka Alesia Kareva. Jana paćvierdziła, što prajs u roznych miedycynskich centrach adroźnivajecca. Ale kaža, što i vydatki va ŭsich adroźnivajucca — u kahości arenda moža kaštavać 5 jeŭra za kvadrat, a ŭ kahości i 21 jeŭra.
U siabie ŭ storys Alesia Kareva rastłumačyła, adkul biarucca ceny na miedycynskija pasłuhi:
— Košt pryjomu doktara — heta zarobak doktara (15—20%) plus vypłaty ŭ Fond sacyjalnaj abarony nasielnictva i padachodny padatak (15%), plus zarobki ŭsiaho absłuhoŭvajučaha piersanału (administratary, juryst, miedsiastra, dyrektar, buchhałtar, koł-centr — heta jašče 20%), arhanizacyja pryjomu (pamiaškańnie, staronnija arhanizacyi, raschodnyja materyjały i inšaje — 30—40%), plus prybytak zasnavalnikaŭ (3—5%), plus padatak.
Alesia prosić pacyjentaŭ nie kryŭdzić daktaroŭ pytańniami pra košt pryjomu. Kaža, što šmat chto sychodzić z prafiesii, bo nie vytrymlivaje ŭmoŭ pracy.
— Mnie zrazumiełyja sumnievy pacyjentaŭ, ja i sama pacyjentka. Ja taksama bajusia, što miedycyna ŭ nas stanie darahoj, ale jašče bolš bajusia, što jana stanie niedastupnaj navat za hrošy, što nie budzie tych, chto zmoža dapamahčy.
Alesia nazyvaje ceny ŭ svaim centry adnymi z samych nizkich, ale papiaredžvaje: z 15 vieraśnia ŭ Baby Boss praciahłaść standartnaj kansultacyi budzie ŭžo 20 chvilin zamiest raniejšych 30.
Pry hetym žančyna padkreślivaje: miedcentr vykonvaje rašeńnie Ministerstva achovy zdaroŭja adnosna rehulavańnia cen.
Nahadajem: sjoleta z 1 lutaha Minzdaroŭja vyznačaje ceny na pryjom u pryvatnych miedcentrach. Naprykład, standartny pieršasny pryjom śpiecyjalista, kandydata miedycynskich navuk ź lutaha nie moža kaštavać daražej za 45 rubloŭ, a doktara miedycynskich navuk, a taksama dacenta i kandydata miedycynskich navuk — 47 rubloŭ.
Za rehulavańnie cen u pryvatnych miedycynskich centrach Ministerstva achovy zdaroŭja ŭziałosia letaś paśla skandału ŭ «MiedAvieniu». Tady pacyjentka na kasie była vymušana zapłacić za miedycynskuju manipulacyju zamiest 65 rubloŭ (jak było paznačana na sajcie) ažno 150 rubloŭ.
«Nabiaruć bolš studentaŭ, ale što rabić 6-7 hadoŭ?» Miedyk pra toje, jak ułady zmahajucca ź niedachopam daktaroŭ i što treba rabić
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama
«U mianie pryjom kaštuje 120 rubloŭ, čamu ja pavinna pracavać za 44, bł**, rubli?!» Daktary abmiarkoŭvajuć rehulavańnie cen
«Radujciesia, s*ki!» Čym skončyŭsia skandał pamiž hiniekałahiniaj-błohierkaj i pacyjentkaj pryvatnaha miedcentra?
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary