Prapahandystka Lebiedzieva pachvaliłasia ekskluzivam z Maryupalskaha teatra, jaki Rasija adbudavała z nula, kab schavać ślady vajennaha złačynstva
Ksienija Lebiedzieva stała adnoj ź pieršych zamiežnic, kaho akupacyjnyja ŭłady dapuścili ŭnutr adbudavanaha budynka Maryupalskaha dramteatra. U svaim videa jana z zachapleńniem pakazvaje śviežuju pazałotu i novuju lustru, całkam ihnarujučy toj fakt, što novy teatr uźviedzieny, kab prychavać masavaje zabojstva.
U svaim instahramie biełaruskaja prapahandystka Ksienija Lebiedzieva, jakaja ŭžo była adznačanaja premijaj ad rasijskaha ŭrada za prapahandyscki film pra Maryupal, zładziła sapraŭdnuju rekłamnuju ekskursiju pa novym budynku.
Jana z uśmieškaj demanstruje śviežuju lepku, marmurovyja leśvicy i aksamitnyja kresły, nazyvajučy avijaŭdar, jaki pachavaŭ pad saboj sotni ludziej, prosta «vybucham 2022 hoda».
«Teatr užo praktyčna adnavili. Kažuć, što jaho pastaralisia adnavić idealna, u dakładnaści z tym varyjantam, jaki byŭ da vybuchu», — raskazvaje Lebiedzieva, pakul kamiera pakazvaje vielizarnuju chrustalnuju lustru.
Hetyja kadry vyhladajuć asabliva vuścišna, kali pamiatać, što aryhinalnaja lustra abvaliłasia na hałovy dziaciej, jakija šukali ŭ teatry paratunku.
Toje, što Lebiedzieva nazyvaje «idealnym adnaŭleńniem», mižnarodnyja ekśpierty i pravaabaroncy adnaznačna rasceńvajuć jak maštabnuju akcyju pa źniščeńni ŭlik.
16 sakavika 2022 hoda rasijskija VKS skinuli na teatr dźvie 500‑kiłahramovyja bomby, viedajučy, što ŭnutry znachodzicca samaje vialikaje ŭ horadzie schovišča. Pierad fasadami teatra vielizarnymi litarami byŭ naniesieny nadpis «DIETI», jaki bačyli spadarožniki, ale «nie zaŭvažyli» rasijskija piłoty. Pavodle rasśledavańnia Associated Press, pad plitami teatra zahinuli kala 600 čałaviek.
Kab kančatkova schavać maštaby trahiedyi, u śniežni 2022 hoda akupacyjnyja ŭłady całkam źnieśli ruiny aryhinalnaha teatra, rasčyściŭšy miesca złačynstva buldozierami. Novy budynak, u jakim ciapier zdymaje svaje «ekskluzivy» biełaruskaja prapahandystka, pa sutnaści źjaŭlajecca hlancavym nadmahillem z marmuru i pazałoty, uźviedzienym na miescy brackaj mahiły.
Pakul Lebiedzieva čakaje ŭ Maryupali «najbližejšych pastanovak», sapraŭdnaja trupa teatra pracuje va Užharadzie. Acalełyja maryupalskija akciory pastavili śpiektakl «Maryupalskaja drama» — praŭdzivuju historyju pra toje, što nasamreč adbyłosia ŭ teatry, pakul jaho nie pieratvaryli ŭ sterylnuju dekaracyju dla dziaržaŭnaha telebačańnia Biełarusi i Rasii.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna23
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1414
Kamientary