Rasijski aficer dapamoh USU ŭdaryć pa rasijskim palihonie i zabić 65 vajskoŭcaŭ

Rasijanin Leŭ Stupnikaŭ naradziŭsia ŭ Kazachstanie. Jaho dziacinstva było zvyčajnym: škoła, sport — płavańnie, kańki, navat balnyja tancy. Kali Lvu było 12 hadoŭ, jon z maci i siastroj pierajechaŭ u Omsk. Baćka zastaŭsia ŭ Kazachstanie i źnik ź ich žyćcia.

U rasijskaj škole, jak zaŭvažaje mužčyna ŭ novym vypusku jutub-prajekta ŭkrainskaha błohiera Dźmitryja Karpienki, jon adrazu adčuŭ roźnicu:

«Ja adčuŭ niejki taki vajb razhildziajstva. (…) U Kazachstanie nie było takoha, kab chtości z vučniaŭ kuryŭ prosta ŭ adkrytuju za škołaj. U Rasii heta było normaj».

Paśla 8-ha kłasa maci addała syna ŭ Omski kadecki korpus. Paśla jaho zakančeńnia Leŭ maryŭ stać lotčykam, ale sutyknuŭsia z karupcyjaj: kab prajści miedkamisiju, navat zdarovamu čałavieku treba było płacić, kab daktary pastavili narmalny dyjahnaz.

U vyniku chłopiec nie zmoh pastupić i, kab nie trapić u vojska na terminovuju słužbu, padaŭ dakumienty ŭ politechničny ŭniviersitet na śpiecyjalnaść «prajektavańnie rakietnych ruchavikoŭ», ale amal nie vučyŭsia tam i byŭ adličany z treciaha kursa. U 2018 hodzie jon pastupiŭ u Vajskovuju akademiju suviazi ŭ Sankt-Pieciarburhu na śpiecyjalnaść «Šmatkanalnyja telekamunikacyjnyja sistemy».

Kali pačałosia poŭnamaštabnaje ŭvarvańnie Rasii va Ukrainu, jak zhadvaje Leŭ, prapahanda ŭ akademii zapracavała na poŭnuju moc. Na schodach u aktavaj zale pałkoŭniki raspaviadali pra pośpiechi «SVA». Pa słovach Lva, bolšaja častka jaho sakurśnikaŭ chacieła patrapić na front. Asnoŭnym matyvam była mahčymaść zarabić hrošaj:

«Chacieła bolšaja častka, tamu što hrošy. Typu my ž suviazisty, my dzieści pasiadzim i zarobim hrošaj. Ideałahična nastrojenych ja nie bačyŭ nivodnaha».

U hety čas Leŭ užo aktyŭna sačyŭ za navinami z abodvuch bakoŭ, u tym liku prahladzieŭ bolš za 150 intervju z pałonnymi. Pa słovach mužčyny, prykładna za paŭhoda da vypusku jon pryniaŭ dla siabie kančatkovaje rašeńnie: kali adpraviać na vajnu, jon zdasca ŭ pałon.

Słužba, vajna i supracoŭnictva z ukrainskimi vajskoŭcami

29 krasavika 2023 hoda Leŭ vypuściŭsia z akademii ŭ zvańni lejtenanta i atrymaŭ raźmierkavańnie ŭ 36-ju hvardziejskuju motastrałkovuju bryhadu. Prybyŭšy ŭ čaść, jon, małady lejtenant, byŭ adrazu pryznačany kamandziram bataljona suviazi, bo ŭsie vopytnyja aficery byli ŭžo na vajnie.

Jak davodzić mužčyna, jon sam damahaŭsia chutčejšaj adpraŭki va Ukrainu, bo razumieŭ, što heta jaho adziny šlach da realizacyi płana. U listapadzie 2023 hoda, paśla karotkich kursaŭ na apieratara BPŁA, Leŭ apynuŭsia ŭ rajonie Vuhladara.

U pačatku 2024 hoda jon napisaŭ ukrainskamu błohieru i vałancioru Uładzimiru Zołkinu (prajekt «Apostał»). Z hetaha momantu pačałosia jaho siamimiesiačnaje supracoŭnictva z ukrainskimi vajskoŭcami.

Pieršaj i, mabyć, samaj hučnaj apieracyjaj, jakaja prademanstravała kaštoŭnaść infarmacyi ad Stupnikava, staŭ udar pa palihonie pad Vałnavachaj.

Leŭ zaŭvažyŭ śmiarotna niebiaśpiečnuju rucinu, narodžanuju armiejskaj pakazuchaj: u čakańni pryjezdu hienierała na palihonie štodnia, u adzin i toj ža čas, pačali šychtavać ceły bataljon. Sałdaty stajali ŭ roŭnych šerahach pasiarod adkrytaj miascovaści, pieratvarajučysia ŭ idealnuju mišeń.

Mužčyna pieradaŭ ukrainskamu boku dakładnyja kaardynaty i čas. Vynik byŭ pradkazalny i žachlivy. Udar HIMARS nakryŭ palihon, pakinuŭšy paśla siabie bolš za 65 zabitych. Hetaja trahiedyja, jakuju sam Leŭ z horkaj ironijaj nazvaŭ vynikam «zvyčajnaj armiejskaj tupaści», vyklikała šok u rasijskaj armii i abviaščeńnie žałoby na radzimie bryhady.

Ale kali historyja z palihonam była pra niekampietentnaść, to nastupny epizod ahaliŭ biesčałaviečnaść sistemy. Leŭ pieradaŭ infarmacyju pra miescaznachodžańnie hrupy šturmavikoŭ «Štorm-Z», nabranych z byłych źniavolenych, jakich rychtavali da čarhovaha miasnoha šturmu.

Paśla taho, jak ukrainskaja artyleryja dakładna adpracavała pa kaardynatach, kamandzir bryhady addaŭ zahad: «Admiena evakuacyi, nikoha nie evakujavać». Paranienych pakinuli pamirać, a čatyroch acalełych, jakija cudam vyžyli, u tuju ž noč kinuli ŭ boj.

Vajna — heta nie tolki ludzi, ale i žaleza. Stupnikaŭ vydatna razumieŭ, što źniščeńnie techniki moža być nie mienš efiektyŭnym. Adnojčy jon vyjaviŭ miesca kancentracyi siami adzinak roznaj techniki: ad samarobnych bahi da mašyn, abstalavanych kompleksami radyjoelektronnaj baraćby. Udar pa hetaj celi asłabiŭ mabilnaść i, što bolš važna, technałahičnyja mahčymaści bryhady, zrabiŭšy jaje bolš uraźlivaj dla ŭkrainskich dronaŭ.

Kulminacyjaj jaho padpolnaj dziejnaści stała apieracyja, jakaja mahła abiezhałović usiu bryhadu. Leŭ daviedaŭsia, što ŭ adnym z padvałaŭ na pieradavoj projdzie narada z udziełam bolš jak dvaccaci aficeraŭ — praktyčna ŭsiaho kamandnaha składu. Staŭka była maksimalnaj.

Jon pieradaŭ kaardynaty, i ŭkrainski bok, zataiŭšy dychańnie, čakaŭ vyniku. Rakieta HIMARS trapiła ŭ cel ź nievierahodnaj, amal chirurhičnaj dakładnaściu. Jak paźniej uspaminaŭ Leŭ, «roźnica była ŭ mietr». Ale ŭ toj dzień los byŭ na baku rasijskich aficeraŭ — rakieta nie vybuchnuła.

Za siem miesiacaŭ jaho pracy 36-ja bryhada nie zmahła prasunucca na svaim učastku frontu «ni na mietr». Jak śćviardžajecca ŭ videa, ukrainski bok mieŭ dostup da kamier rasijskich dronaŭ i viedaŭ ab usich płanach praciŭnika.

Pierachod na bok Ukrainy i novaje žyćcio

7 lipienia 2024 hoda pa prahramie «Chaču žyć» była arhanizavana jaho evakuacyja. Pad vyhladam pravierki suviazi jon pakinuŭ svaje pazicyi i pa minnym poli, pad nahladam ukrainskaha drona, vyjšaŭ nasustrač raźviedhrupie. Ciapier mužčyna słužyć u Ruskim dobraachvotnym korpusie.

Historyja na hetym nie skončyłasia. Prajekt «Chaču žyć» dapamoh arhanizavać vyjezd jaho maci i siastry z Rasii. Jany pakinuli ŭsio i pierajechali va Ukrainu. Žonka pierajechać admoviłasia.

• 61
• 1
• 1
• 3
• 1
• 2
• 0
• 6