Patreby NATA mianiajuć ekanomiku Jeŭropy. Ale jeŭrapiejskaj abaroncy nie chapaje šerahu krytyčna važnych praduktaŭ

Pavodle prahnozaŭ kansałtynhavaj kampanii McKinsey, da 2030 hoda ahulnyja vydatki jeŭrapiejskich krain na abaronu amal padvojacca i pieravysiać 800 miljardaŭ jeŭra. I heta, jak piša Handelsblatt, vyklikaje strukturnyja źmieny ŭ ekanomicy ES.

Asabliva imkliva rastuć zakupki novaha ŭzbrajeńnia. Pavodle hadavoha dakładu Jeŭrapiejskaha abaronnaha ahienctva (EDA), u 2025 hodzie 27 krain ES pavialičać inviestycyi ŭ zbroju i techniku na 23% u paraŭnańni ź minułym hodam — da 130 miljardaŭ jeŭra.

Ahulnyja vydatki na abaronu, uklučajučy zarobki i administracyjnyja vydatki, dasiahnuć 381 miljardaŭ jeŭra (+11% da 2024 hoda). Pry hetym tracina biudžetu nakiroŭvajecca mienavita na zakupki — samy vysoki pakazčyk u historyi ES.

Pavodle prahnozaŭ McKinsey, da 2030 hoda Jeŭropa pavialičyć štohadovyja inviestycyi ŭ novyja tanki, bieśpiłotniki i prahramnaje zabieśpiačeńnie z 140 miljardaŭ da 335 miljardaŭ jeŭra. Heta rekordny ŭzrovień, jaki adlustroŭvaje novy kurs NATA — padniać abaronnyja vydatki da 3,5% VUP u 2035 hodzie.

Hiermanija jak najbujniejšaja ekanomika Jeŭropy maje dasiahnuć hetaj mety ŭžo ŭ 2029 hodzie: 153 miljardaŭ jeŭra pojdzie na ŭłasnuju abaronu plus kala 9 miljardaŭ jeŭra na padtrymku Ukrainy.

Zakazy nie paśpiavajuć za vytvorčaściu

Kampanii ŭžo rychtujucca da rekordnych pastavak. Pavodle Bloomberg, niamiecki ŭrad moža zamović kala 3500 braniravanych mašyn Boxer, jakija vypuskaje kansorcyŭm Rheinmetall (Hiermanija) razam z KNDS — franka-niamieckim vytvorcam tankaŭ i vajennaj techniki.

Pavialičyć

Kiraŭnik Rheinmetall Armin Papierher pryznaje: «Hiermanija zakaža značna bolš techniki, čym čakałasia. Patencyjał zamovy na Boxer vielmi i vielmi vysoki. Havorka idzie pra vidavočna dvuchznačny miljardny dyjapazon».

Pavodle acenak McKinsey, partfiel zakazaŭ u ciapierašni čas raście amal udvaja chutčej, čym vytvorčaść. Ministr abarony Hiermanii Barys Pistoryŭs patrabuje ad industryi paskoryć pracu: «Novaje abstalavańnie patrebna nie «kali-niebudź», a «zaraz».

Kiraŭnik Rheinmetall u svaju čarhu zapeŭnivaje, što abaronnaja pramysłovaść pracuje nad pavieličeńniem vytvorčych mahutnaściej, adnak «heta nie adbudziecca za adnu noč».

U svaju čarhu ekśpierty papiaredžvajuć: śpiešnyja zakupki vielmi darahija. Pavodle daśledavańnia navukoŭcaŭ z Manhiejmskaha ŭniviersiteta, adzin jeŭra na abaronu ŭ Hiermanii stvaraje ŭ ekanomicy tolki kala 50 jeŭracentaŭ dadatkovaj aktyŭnaści, u toj čas jak u ZŠA hety pakazčyk značna vyšejšy.

Kankurencyja i novyja madeli zakupak

Jeŭrapiejskaj abaronnaj industryi nie chapaje šerahu krytyčna važnych praduktaŭ: źniščalnikaŭ piataha pakaleńnia, śpiecyjalizavanaha prahramnaha zabieśpiačeńnia, kaśmičnaj raźviedki. U vyniku amal pałova zakupak z 2021 hoda pajšła da vytvorcaŭ z-za miežaŭ Jeŭropy.

Naprykład, Hiermanija zakazała, siarod inšaha, źniščalniki F-35 u Lockheed Martin (ZŠA) i transpartnyja viertaloty Chinook u Boeing (ZŠA). Polšča raźličvaje na tanki K2 ad paŭdniovakarejskaha vytvorcy Hyundai Rotem, jaki ŭ adroźnieńni ad jeŭrapiejskich kankurentaŭ moža ździejśnić pastaŭki za bolš karotki termin.

Jeŭrapiejskaja vajennaja industryja z zapaźnieńniem padładžvajecca da paskoranaha rostu zakazaŭ. Vytvorcy prapanoŭvajuć uradu harantavać štohadovyja abjomy zakupak, što zrobić płanavańnie bolš nadziejnym, i abiacajuć Bundeśvieru skidki pry vialikich pastaŭkach.

U abaronnych kołach taksama paviedamlajuć, što ź Ministerstvam abarony Hiermanii viaducca pieramovy ab inšaj madeli zakupak, jakaja b spraściła pašyreńnie pramysłovych mahutnaściej.

Adpaviedna joj dziaržava budzie zakuplać zbroju zvyš ułasnaj patreby, a potym pierapradavać jaje inšym krainam pa mižuradavych kantraktach. Takim čynam, dziaržava stanovicca dyleram lišniaj pradukcyi.

Dla abaronnych kampanij heta dało b pieravahu ŭ vyhladzie mahčymaści płanavać bolšyja abjomy, što dazvoliła b im damaŭlacca ab lepšych cenach sa svaimi pastaŭščykami. Pa słovach pradstaŭnikoŭ haliny, hetaja ideja znachodzić padtrymku ŭ Bierlinie.

12 000 novych kantraktaŭ

Fiederalnaje viedamstva pa abstalavańni, infarmacyjnych technałohijach i vykarystańni Bundeśviera (BAAINBw) nahadvaje: u minułyja hady bolšaść kampanij pracavała faktyčna ŭ «manufakturnym» farmacie, a ciapier patrebny chutki pierachod da sieryjnaj vytvorčaści.

Kiraŭnik MBDA Germany (daččynaja kampanija jeŭrapiejskaha kansorcyŭma MBDA, jaki abjadnoŭvaje Francyju, Vialikabrytaniju i Italiju) Tomas Hotšyld prahnazuje, što ŭ Hiermanii dachod kampanii moža patroicca, a kolkaść supracoŭnikaŭ padvoicca. Asnoŭnyja nadziei źviazany z zakazami na zienitnyja rakiety Patriot i mahčymymi dadatkovymi pastaŭkami kryłatych rakiet Taurus.

Rheinmetall płanuje da 2027 hoda pavialičyć vypusk bojeprypasaŭ z 70 tysiač da 1,5 miljonaŭ artyleryjskich snaradaŭ u hod. Kampanija buduje novyja zavody nie tolki ŭ Hiermanii, ale i ŭ Litvie, Rumynii i Bałharyi.

NATA, adnak, patrabuje nie tolki snaradaŭ. Hienieralny sakratar aljansu Mark Rute zaklikaje Jeŭropu paskoryć vytvorčaść bolš składanaj techniki — tankaŭ i sistem SPA. Ale pakul ni Rheinmetall, ni KNDS istotna nie naroščvajuć hetyja mahutnaści. Tamu ŭsie 123 Leopard-2, zamoŭlenyja ŭ minułym hodzie, trapiać u Bundeśvier tolki da 2030 hoda

Pavodle BAAINBw, u 2025 hodzie budzie padpisana kala 12 tysiač novych kantraktaŭ, pryčym kala sotni pieravysiać 25 miljonaŭ jeŭra. Čakajučy ich padpisańnia, najbujniejšyja vytvorcy ŭžo pačali zakuplać stal, porach i inšyja materyjały.

• 0
• 0
• 0
• 0
• 0
• 0
• 0
• 0