Stała viadoma, kolki biełarusaŭ atrymali ŭkrainskaje hramadzianstva, a kolki ich vydvaryli z krainy
U Dziaržaŭnaj mihracyjnaj słužbie Ukrainy paviedamili Radyjo Svaboda, što ciapier u krainie žyvuć 11 016 hramadzian Biełarusi, jakija majuć dazvoł na stałaje žycharstva, i 3 030 — na časovaje.
«Ciaham šaści miesiacaŭ 2025 hodu 11 hramadzian Biełarusi admovili ŭ vydačy dazvołu na stałaje žycharstva va Ukrainie (pry vydačy ŭpieršyniu), 3 — u vydačy dazvołu na časovaje žycharstva (pry vydačy ŭpieršyniu) i 4 — u vydačy dazvołu na časovaje žycharstva (pry abmieńvańni)», — adznačajecca ŭ adkazie mihracyjnaj słužby Ukrainy.
Takim čynam, u 2025 hodzie kolkaść biełarusaŭ, jakija majuć prava na stałaje žycharstva va Ukrainie, pavialičyłasia na 15,05 % u paraŭnańni z 2020-m, i na 23,8 % źmienšyłasia kolkaść tych, chto atrymaŭ časovy dazvoł (na adzin hod z pravam dalejšaha padaŭžeńnia).
Chto atrymaŭ hramadzianstva Ukrainy
Staršynia Dziaržaŭnaj mihracyjnaj słužby Ukrainy Natalla Navumienka paviedamiła, što sioleta za paŭhoda 32 čałavieki z hramadzianstvam Biełarusi atrymali hramadzianstva Ŭkrainy.
Siarod ich:
- — 18 čałaviek na padstavie terytaryjalnaha pachodžańnia;
- — 1 čałaviek — pavodle naradžeńnia;
- — 2 čałavieki — na padstavie damovy pamiž Ukrainaj i Respublikaj Biełaruś;
- — 4 čałavieki — na padstavie ŭkaza prezidenta Ukrainy;
- — 2 čałavieki — na padstavie apieki i dahladu dziaciej;
- — 3 dziaciej — na padstavie ŭkrainskaha hramadzianstva ich baćkoŭ abo adnaho ź ich;
- — 2 čałavieki — na padstavie pryznańnia baćkoŭstva ci maciarynstva.
U toj ža čas, jak padkreślili ŭ DMS, asobnaja statystyka kolkaści padadzienych zajavaŭ ab nabyćci hramadzianstva Ukrainy nie źbirajecca i nie ŭličvajecca.
«Aproč taho, ulik asobaŭ pavodle padstaŭ atrymańnia hramadzianstva Ukrainy inšaziemcami i asobami biez hramadzianstva, jakija biaruć udzieł u abaronie terytaryjalnaj cełasnaści i niedatykalnaści Ukrainy, u DMS asobna nie viadziecca», — adkazvaje mihracyjnaja słužba.
Najbolš imavierna, što biełaruskija dobraachvotniki atrymlivali hramadzianstva Ukrainy na padstavie ŭkazu prezidenta.
U toj ža čas u adkazie nie ŭdakładnili, kolki hramadzianam Biełarusi admovili ŭ hramadzianstvie Ukrainy.
Kolki biełarusaŭ viarnuli i kudy
Z 1 studzienia 2020 hodu da 31 śniežnia 2024 hoda Ukraina prymusova viarnuła 360 hramadzian Biełarusi i jašče 32 — prymusova vypravadziła praz parušeńnie praviłaŭ znachodžańnia inšaziemcaŭ na ŭkrainskaj terytoryi.
Za pieršyja paŭhoda 2025 hodu 15 hramadzian Biełarusi vyjechali z Ukrainy pa pracedury prymusovaha viartańnia i 6 — prymusova vypravadžanyja (u Biełarusi niama jurydyčnaha paniaćcia «departacyja» — RS).
U toj ža čas u Dziaržaŭnaj mihracyjnaj słužbie nie paviedamili, u jakija krainy prymusova viartali abo vypravodžvali biełarusaŭ, bo takoj statystyki nie viadziecca.
U Dziaržaŭnaj mihracyjnaj słužbie Ukrainy źviarnuli ŭvahu, što prymusovaje viartańnie praduhledžvaje dla inšaziemca mahčymaść dobraachvotna vyjechać z Ukrainy za 30 dzion, a kali jon admaŭlajecca — vykarystoŭvajecca pracedura prymusovaha vypravodžańnia. Na čas arhanizacyi vypravodžańnia inšaziemca mohuć źmiaścić u punkty časovaha znachodžańnia ŭ sistemie Dziaržaŭnaj mihracyjnaj słužby.
Zhodna z aficyjnaj infarmacyjaj, ciapier u takich punktach znachodziacca čaćviora hramadzian Respubliki Biełaruś.
Kamientary