Niahledziačy na toje, što jašče z 4 červienia 2024 hoda z dastaŭkaj peŭnych aŭtamabilaŭ z Štataŭ u Biełaruś uźnikli składanaści praz sankcyjnyja abmiežavańni, mašyny praciahvajuć vieźci — jak na prodaž, tak i dla siabie. Pahladzieli, jakija marki i madeli karystajucca najbolšym popytam.
Składanaści nie spyniajuć
Amierykanski kirunak zastajecca zapatrabavanym navat z ulikam taho, što ź biełaruskich bankaŭ daŭno niemahčyma napramuju raźličycca za aŭto. Apłata ź Biełarusi adbyvajecca praz Kazachstan abo z vykarystańniem kryptavalut. Składanaści z apłataj robiać navat samyja tannyja aŭto minimum na 250-300 dalaraŭ daražejšymi ŭ paraŭnańni z tym, što było da 2022 hoda.
Ź minułaha leta źmianilisia i ŭmovy dastaŭki. Mašyny z abjomam ruchavika bolš za 1,9 litra ciapier viazuć u Biełaruś praz Hruziju. Vyklučeńnie — mašyny, starejšyja za 5 hadoŭ, i z kliransami mienšymi za 165 mm.
Dastaŭka praz Hruziju na 1000-1500 dalaraŭ daražejšaja, bolš praciahłaja pa časie i niasie dadatkovyja ryzyki, bo lehalny reekspart takich mašyn z Hruzii ŭ Biełaruś całkam zabaronieny. Tamu bolšaść vybiraje tyja varyjanty, jakija možna dastaŭlać praź Litvu — na hetuju krainu prypadaje kala dźviuch tracin mašyn, što pastaŭlajucca ŭ Biełaruś z ZŠA.
Top mašyn z Štataŭ na biełaruskim rynku
Pieršaje miesca pa papularnaści ź vialikim adryvam zajmaje Chevrolet Equinox — ciapier u prodažy znachodzicca bolš za 400 takich mašyn va ŭzroście da piaci hadoŭ. Praz šalonuju papularnaść Equinox časam nazyvajuć zamianialnikam pasatam.
Equinox maje pad kapotam čatyrochcylindravy 1,5-litrovy turbamator, što dazvalaje nie tolki biez prablem dastaŭlać aŭtamabil praz Kłajpiedu, ale i płacić minimalnuju pošlinu. Za Chevrolet Equinox 2021 hoda ŭ Biełarusi ŭ siarednim prosiać kala 18 tysiač dalaraŭ.
Druhoje miesca pa kolkaści aŭto ŭ prodažy zajmaje Ford Escape IV — 237 mašyn z 2020 hoda vypusku i maładziej. Pad kapotam u ich taksama bienzinavy ruchavik na 1,5 litra, praŭda, užo trochcylindravy.
Za Escape čaćviortaha pakaleńnia 2021 hoda ŭ siarednim prosiać $18 750.
Zusim krychu adstaje Buick Encore GX — takich mašyn u prodažy 230 štuk. Buick maje pad kapotam ruchavik na 1,2 abo 1,3 litra z turbinaj i tryma cylindrami. Encore GX 2021 hoda ŭ Biełarusi aceńvajuć u siarednim u 17 tysiač dalaraŭ.
Dalej pa papularnaści idzie GMC Terrain — 200+ aŭto ŭ prodažy va ŭzroście da piaci hadoŭ. Siaredniaja cana na Terrain 2021 hoda vypusku — 20 tysiač dalaraŭ.
Pad kapotam u jaho taki ž 4-cylindravy ruchavik, jak i ŭ jaho adnapłatformieńnika Chevrolet Equinox.
Siarod siedanaŭ najbolš papularnym źjaŭlajecca VW Jetta. Mašyn va ŭzroście da piaci hadoŭ u prodažy kala 80 štuk. Amal va ŭsich vypadkach pad kapotam u ich 1,4-litrovy bienzinavy turbamator z čatyrma cylindrami.
Admietna, što VW Jetta niaredka sustrakajecca ź miechaničnaj karobkaj pieradač. Za VW Jetta 2021 hoda ŭ siarednim prosiać kala 17 tysiač dalaraŭ.
Što treba viedać pry kupli aŭto sa Štataŭ?
Achvotnym nabyć mašynu, jakuju raniej pryvieźli ŭ Biełaruś z ZŠA, treba ŭśviedamlać, što amal usie hetyja aŭtamabili mieli paškodžańni paśla avaryj, aktaŭ vandalizmu, kradziažu abo stychijnych biedstvaŭ.
Kab jašče da vyjezdu na ahlad zrazumieć, u jakim stanie była mašyna na momant prybyćcia ŭ Biełaruś, dastatkova mieć VIN-numar i pravieryć jaho praz pošukavik. Padrabiaźniej pra sposaby pravierki aŭto pierad pakupkaj možna pračytać tut.
Ci jość sens kuplać aŭto z ZŠA na zamovu?
Mnohija biełarusy navažvajucca nabyć aŭtamabil niepasredna ŭ Štatach. Zrabić heta samastojna niemahčyma, ale firm-pasiarednikaŭ, jakija hatovyja dapamahčy nabyć aŭto na aŭkcyjonie ŭ Amierycy i arhanizavać dastaŭku ŭ Biełaruś, u nas bolš čym dastatkova.
Adnak tut varta być pilnymi i nie vieścisia na abiacańni pryhnać aŭto na 40% tańniej, čym na miascovym rynku. Taki vialiki zazor małavierahodny, ale aščadzić 15—20% pry hramatnym padychodzie całkam realna.
Taksama nie varta vieścisia na nizkuju canu za pasiarednickija pasłuhi i varta prasić praličyć usie płaciažy na ŭsich etapach, bo ŭ vyniku moža akazacca, što kančatkovaja suma ŭsich vydatkaŭ na dastaŭku i afarmleńnie ŭ pasiarednika, jaki, naprykład, biare 1200 rubloŭ, budzie nižejšaj, čym u tych, chto biare ŭsiaho 600 rubloŭ.
Taksama treba być hatovymi da taho, što pry kupli aŭto na zamovu vy siadziecie za rul tolki praz 3-4 miesiacy, bo tolki 2-3 miesiacy patrebnyja na toje, kab aŭtamabil dabraŭsia da Biełarusi. Plus spatrebicca niejki čas na pošuk zapčastak i ramont.
Ciapier čytajuć
Pastupova vyjšli na volu aryštavanyja pa «Spravie kniharoŭ». Akramia adnaho5
Pastupova vyjšli na volu aryštavanyja pa «Spravie kniharoŭ». Akramia adnaho
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary
———
I dalej znoŭ sa słova «taksama». Ale navošta drabnić? Navohuł uvieś hety «Arcikuł» treba było lapić u adzin skaz! 😂
napriamuju === naŭprost
.
-----praciahvajuć vieźci ---- .... pradaŭžajuć,..
"praciahvać" - ZBOLŠAHA ŭžyvajecca a-la Present Continuous a nie jak poŭnaja zamiena "pradaŭžać"