Izrail šakavany sietkaj iranskich špijonaŭ, jakija dziejničali ŭ krainie

Jak piša Le Monde, užo niekalki tydniaŭ śpiecsłužby razam z palicyjaj pa ŭsioj terytoryi Izraila aryštoŭvajuć ludziej, jakija pieradavali źviestki Tehieranu. Usie padazravanyja — jaŭrei, uradžency krainy.

Pavodle infarmacyi Słužby biaśpieki Izraila (Šyn-Biet), hetyja ludzi — nie vypadkovyja. Ich dziejnaść była nakiravanaja i arhanizavanaja. Šmat chto ŭžo pryznaŭsia ŭ špijanažy, a dla padazravanych navat adkryli asobnaje izalavanaje kryło ŭ turmie Damon, na poŭnač ad Chajfy.

Ci dapamahli hetyja špijony nakiroŭvać iranskija rakiety padčas dvanaccacidzionnaj vajny pamiž dźviuma krainami z 13 pa 24 červienia? Choć poŭny śpis abjektaŭ, jakija padvierhlisia atakam, nie byŭ apublikavany, viadoma, što siarod ich jak minimum šeść vajskovych baz Izraila pa ŭsioj krainie, u tym liku avijabaza Tel-Nof i baza Hliłot (štab-kvatera Masada na poŭnač ad Tel-Aviva).

Taksama byŭ mocna paškodžany Instytut Viejcmana ŭ Rechavocie — adzin z hałoŭnych centraŭ fundamientalnych daśledavańniaŭ. Hetyja vyniki, na dumku izrailskich słužbaŭ biaśpieki, śviedčać pra toje, što raźviedvalnyja danyja byli sabranyja zadoŭha da kanfliktu.

Były kiraŭnik padraździaleńnia kontrraźviedki Šyn-Biet Šałom Ben Chanan nahadvaje: jašče ŭ 2019 hodzie byŭ aryštavany były ministr enierhietyki Hanien Siehieŭ, jaki pracavaŭ na Iran ź Nihieryi. Jon sprabavaŭ vyvablivać izrailskich palitykaŭ za miažu z metaj vykradańnia.

Moładź, sietki i kryptavaluta

Ciapier ža kolkaść «ahientaŭ» raście, i heta ŭžo nie adnarazovyja vypadki, a sistemnaja viarboŭka izrailskich hramadzian. Novyja «ahienty» časta maładyja i, u šerahu vypadkaŭ, majuć pachodžańnie z krain byłoha SSSR.

Ich viarbujuć praz sacyjalnyja sietki i spačatku abiacajuć ścipłyja ŭznaharody ŭ kryptavalucie za niavinnyja akcyi. Naprykład, namalavać hrafici suprać «Bibi», jak žartoŭna zavuć premjer-ministra Bińjamina Nietańjachu.

Ale, jak tłumačyć Šałom Ben Chanan, u prafiesijnaj terminałohii heta nazyvajecca «praces dehradacyi»: pieršyja zadańni vyhladajuć biaskryŭdna, ale kali čałaviek admaŭlajecca iści dalej, jaho pačynajuć šantažavać. U vyniku, kaža jon, tyja, chto traplaje pad takuju viarboŭku, zvyčajna dobra razumiejuć, na što iduć.

Alaksiej Niemiroŭski, kiraŭnik padraździaleńnia, jakoje zajmajecca najciažejšymi złačynstvami i pošukam špijonaŭ, zaŭvažaje: šmat chto z zatrymanych śćviardžaje, što nie viedaŭ, na kaho pracuje.

Jany atrymlivali nievialikija sumy ad 100 da 1000 dalaraŭ za prostyja zadańni — sfatahrafavać vajskovy abjekt abo zrabić antyŭradavaje hrafici. Ale, jak tłumačyć aficer, takija zadańni chutka nabyli inšy maštab i vykonvalisia ŭžo z poŭnym uśviedamleńniem taho, što staić za imi.

U jakaści prykładu jon zhadvaje vypadak siami izrailcian azierbajdžanskaha pachodžańnia, aryštavanych u vieraśni 2024 hoda. Usiaho praź miesiac, u kastryčniku, Iran vypuściŭ rakiety pa niekalkich izrailskich celach, siarod jakich užo tady była vajskovaja baza Hliłot.

«My zatrymali členaŭ hrupy ŭ momant, kali jany sprabavali likvidavać vysokapastaŭlenaha aficera izrailskaj armii, — raskazvaje Niemiroŭski. — Ciaham amal dvuch hadoŭ jany praviali 600 raźviedvalnych apieracyj: zdymali kvatery pobač z vajskovymi bazami, stvaryli turystyčnuju kampaniju, jakaja arhanizoŭvała pajezdki na džypach, što dazvoliła nabližacca da abjektaŭ».

«Kožny mieŭ dakładna vyznačanuju rolu, — praciahvaje jon, — adzin adkazvaŭ za fotazdymki, raźviedku abo pravierku vynikaŭ udaraŭ, druhi — za zbor hrošaj… Starejšamu ź ich 20 hadoŭ, małodšy — niepaŭnaletni, a adzin navat prachodziŭ terminovuju vajskovuju słužbu!»

Pavodle śledstva, hrupa atrymała ad iranskich śpiecsłužbaŭ 300 000 dalaraŭ.

Pieršyja prysudy i asobny korpus turmy

Paśla aryštu ŭdzielnikaŭ špijonskaj hrupy źmiaścili pad vartu na poŭnačy Izraila. U suviazi z tym, što kolkaść aryštavanych špijonaŭ raście, dla ich byŭ adkryty asobny korpus u turmie Damon, niepadalok ad Chajfy. Heta było zroblena dla taho, kab nie źmiešvać novych źniavolenych z «paleścinskimi terarystami». Pavodle Niemiroŭskaha, umovy ŭtrymańnia ŭ hetym korpusie «nadzvyčaj strohija».

Aryštavanyja ličacca «zdradnikami» i im pahražajuć ciažkija prysudy. U vypadku vajny zakanadaŭstva navat praduhledžvaje śmiarotnaje pakarańnie, choć na praktycy jano zamianiajecca pažyćciovym źniavoleńniem.

Pieršym asudžanym staŭ 72-hadovy Mardechaj Maman z Aškiełona, viadomy palicyi jak handlar narkotykami. U krasaviku jaho prysudzili da 10 hadoŭ turmy za špijanaž. Jon dvojčy niezakonna naviedvaŭ Iran i navat sprabavaŭ vykanać zamovu na zabojstva palityka.

Pavodle kamandzira Niemiroŭskaha, za apošnija niekalki miesiacaŭ byli aryštavanyja ŭžo 45 čałaviek. «I heta jašče nie kaniec — buduć novyja zatrymańni», — upeŭnieny jon.

Hrošy — nie adzin matyŭ

Maštab udziełu izrailcian u špijonskaj dziejnaści na karyść Tehierana staŭ niečakanaściu, asabliva na fonie taho, jak šmat irancaŭ supracoŭničali ź Izrailem, nakiroŭvajučy ŭdary ci navat zapuskajučy drony. U Izraili ž ciapier bačać lustranoje adbićcio hetaj praktyki.

Pryčyny, što šturchajuć ludziej na zdradu, nie zaŭsiody finansavyja. Častku padazravanych abjadnoŭvaje nianaviść da krainy, u jakoj im ciažka intehravacca, i varožaść da ŭrada Bińjamina Nietańjachu. Pavodle śviedčańnia adnaho z zatrymanych, sam premjer-ministr uvachodziŭ u śpis patencyjnych celaŭ Isłamskaj Respubliki.

«Paśla ataki «Chamasa» 7 kastryčnika, — adznačaje palicejski, — špijanaž suprać krainy, jakaja viadzie vajnu, nabyŭ inšaje vymiareńnie».

10 lipienia Izrail čakaŭ novy šok: iranskija chakiery apublikavali dakumienty, u jakich utrymlivajucca imiony sotniaŭ izrailskich aficeraŭ, ich śpiecyjalizacyja i miescy słužby, a ŭ niekatorych vypadkach navat chatni adras. Hety vyciek paćviardžaje hłybiniu praniknieńnia i stupień pahrozy.

• 5
• 0
• 4
• 2
• 6
• 0
• 6
• 0