Ułady Sierbii zajavili pra praduchileńnie dziaržaŭnaha pieravarotu

Palicyja nie nazvała imiony zatrymanych, adznačyŭšy tolki ich inicyjały.

Pavodle miascovych ŚMI, heta były staršynia Vajskovaha prafsajuza Sierbii Novica Ancič, palityk Ivan Matavič, kapitan u adstaŭcy Branka Mamčyłavič, były praparščyk Vidan Kalaič i eks-palicejski Srdžan Hajavič. Imia jašče adnaho, ź inicyjałami V. K., nieviadomaje.

Sierbskija ŚMI padrychtavali supolnaje rasśledavańnie, ź jakoha vynikaje, što zatrymanyja płanavali spravakavać natoŭp studentaŭ-pratestoŭcaŭ, jakija musili stać asnoŭnaj siłaj pieravarotu, a taksama abmiarkoŭvali nieabchodnaść parytetu pamiž pratestoŭcami roznych pohladaŭ.

Aryšt Anciča paćvierdziŭ Bałkanskaj słužbie «Radyjo Svaboda» jahony advakat. U 2023 hodzie nienazvanaja zachodniaja vyviedka abvinavačvała Novicu Anciča ŭ pracy na FSB, paviedamlała vydańnie Politico.

Zhodna z dakumientami raźviedki, Anciča zavierbavaŭ hałoŭny redaktar vydańnia «Vieteranskija viestki» Viačasłaŭ Kalinin. Na sajcie vydańnia napisana, što redakcyja aktyŭna supracoŭničaje ź Ministerstvam abarony, MUS, Nacyjanalnaj hvardyjaj Rasii, a sam Kalinin atrymaŭ hanarovuju hramatu ad prezidenta Rasii Uładzimira Pucina, paviedamiła «Nastojaŝieje vriemia».

Infarmacyju pra suviazi inšych zatrymanych z Rasijaj znajści nie ŭdałosia. Matavič — rehijanalny pravakansiervayŭny prajeŭrapiejski palityk, inšyja — vieterany bałkanskich vojnaŭ.

U Sierbii bolš za paŭhoda doŭžycca pratest studentaŭ suprać karupcyi i palityki ŭładaŭ. Na masavyja šeści ŭ Białhradzie vychodzili dziasiatki tysiač ludziej. Čarhovy pratest płanujuć na 28 červienia. Zatrymany adzin student-pratestoŭca Stefan Tomič pavodle padazreńnia ŭ zaklikach da niehvałtoŭnaj źmieny kanstytucyjnaha ładu. Pradstaŭniki studenctva i apazicyi asudzili jahony aryšt i nazvali heta ciskam i zapałochvańniem z boku ŭładaŭ.

Słužba źniešniaj raźviedki Rasii (SVR) u apošni miesiac abvinavaciła sierbskija kampanii ŭ pastaŭkach sotniaŭ tysiač snaradaŭ dla ŭstanoŭki «Hrad», a taksama rakiet i minamiotnych bojeprypasaŭ Kijevu praz pasiarednikaŭ. U Maskvie nazvali heta «strełam u śpinu».

Prezident Sierbii Alaksandar Vučyč daručyŭ rasśledavać hetyja abvinavačvańni, a paźniej abviaściŭ pra poŭnaje spynieńnie vajskovych pastavak za miažu. U traŭni lidar Sierbii, jakaja prytrymlivajecca niejtralitetu ŭ vajnie Rasii suprać Ukrainy, naviedaŭ Maskvu, a ŭ červieni — samit «Ukraina — Paŭdniova-Uschodniaja Jeŭropa», što prachodziŭ u Adesie.

• 0
• 0
• 0
• 0
• 0
• 0
• 0
• 0