Viarchoŭny pradstaŭnik Jeŭrapiejskaha sajuza pa zamiežnych spravach i palitycy biaśpieki padčas svajho vizitu ŭ Białhrad zajaviła, što Sierbija staić pierad «stratehičnym, hieastratehičnym» vybaram taho, «dzie jana choča być», piša Deutsche Welle.
«Jeŭrapiejskaja budučynia Sierbii zaležyć ad kaštoŭnaściaŭ, jakija jana budzie adstojvać», — skazała Kałas praz dva tydni paśla taho, jak prezident Sierbii Alaksandar Vučyč praihnaravaŭ papiaredžańni Brusiela i naviedaŭ 9 maja vajenny parad Pieramohi ŭ Maskvie.
Kiraŭnica dypłamatyi ES vykazała Vučyču svaju pazicyju pa hetym pytańni. «Ja sapraŭdy nie razumieju, čamu treba stajać pobač z čałaviekam, jaki viadzie hetuju žudasnuju vajnu va Ukrainie», — padkreśliła Kałas. Jana dadała, što prezident Sierbii ŭ adkaz «vykłaŭ svaju viersiju».
Pa słovach Kałas, palityčnaje kiraŭnictva Sierbii praciahvaje nazyvać ustupleńnie ŭ ES svajoj stratehičnaj metaj. Adnak u Brusieli chočuć «ubačyć dziejańni, jakija dakažuć i padtrymajuć hetyja słovy», adznačyła jana.
«Reformy — heta toje, jak Sierbija budzie prasoŭvacca pa šlachu ES. Niama karotkich šlachoŭ da siabroŭstva. Realny prahres pavinien być dasiahnuty tut, u Białhradzie».
U pryvatnaści, Kałas zaklikała Sierbiju prykłaści surjoznyja namahańni dla zabieśpiačeńnia svabody ŚMI, baraćby z karupcyjaj i praviadzieńnia vybarčaj reformy. «Hetyja reformy pryniasuć realnuju karyść hramadzianam i narodu Sierbii, jak taho patrabavali sotni tysiač pratestoŭcaŭ u apošnija tydni», — zajaviła kiraŭnica dypłamatyi ES.
Paśla Białhrada Kaja Kałas nakiravałasia ŭ Pryšcinu, stalicu Kosava, čyju abvieščanuju ŭ 2008 hodzie niezaležnaść Sierbija da hetaha času nie pryznaje. U 2022 hodzie Kosava taksama aficyjna paprasiła pryniać jaho ŭ Jeŭrapiejski sajuz.
Kałas zajaviła, što narmalizacyja adnosin pamiž Sierbijaj i Kosavam źjaŭlajecca «fundamientalnaj» dla ich jeŭrapiejskaj budučyni. Kiraŭnica dypłamatyi ES paviedamiła pra namier nieŭzabavie zaprasić pradstaŭnikoŭ Białhrada i Pryšciny ŭ Brusiel, kab abmierkavać «kankretnyja kroki» da hetaha.
Kamientary