Uładzimir Pucin na sustrečy z rasijskimi biznesoŭcami raptam vymaviŭ frazu, jakuju viedaje, badaj, kožny biełarus.
Pucin daručyŭ rasijskim biznesoŭcam aktyŭniej pracavać na mižnarodnych rynkach. Jon paabiacaŭ, što Kreml budzie ich u hetym padtrymlivać. I daŭ adnu paradu.
«Rasijskija ŭłady buduć aktyŭna padtrymlivać ajčynny biznes za miažoj. Treba nastojliva heta rabić, treba daŭbić, daŭbić, daŭbić», — skazaŭ Pucin.
Jon mižvoli pracytavaŭ frazu, jakuju viedaje, badaj što, kožny biełarus. Padčas pieradvybarčaj kampanii 2020 hoda jaje nieadnarazova paŭtarała na mitynhach Maryja Kaleśnikava. Na adnoj z akcyj u padtrymku Śviatłany Cichanoŭskaj jana źviarnułasia da siłavikoŭ z zaklikam pierajści na bok naroda. Tady jana ŭpieršyniu i pramoviła frazu, što stała adnym ź simvałaŭ pratestaŭ.
«Sapraŭdnaja siła i ŭłada — u rukach naroda! Nam nie patrebnyja lidary, nam nie patrebnyja supiermeny, nie patrebnyja novyja pravadyry, nam patrebnyja my sami i našaje žadańnie i ŭpartaść vychodzić, stajać, nazirać, vykazvacca, daŭbić, daŭbić i daŭbić hetuju ŭładu!» — skazała Maryja Kaleśnikava.
Heta jana paŭtaryła i ŭ videazvarocie, jaki zapisała na vypadak svajho zatrymańnia.
«Vy viedajecie, što my budziem rabić — my budziem daŭbić, daŭbić, daŭbić hetuju ŭładu ŭsimi zakonnymi srodkami… Jana pieratvaryłasia ŭ palicejskuju dziaržavu. Ci heta narmalna?» — źviarnułasia da biełarusaŭ Kaleśnikava. U vieraśni 2021 hoda Maryju asudzili da 11 hadoŭ kałonii. Jana dva hady znachodziłasia ŭ poŭnaj izalacyi.
Žurnalistka i miedyjamieniedžarka Jaŭhienija Suhak, jakaja pracavała śpičrajterkaj u štabie Babaryki, raspaviadała «Našaj Nivie», jak naradziłasia znakamitaja cytata:
«Kali ja napisała dla Mašy «daŭbić-daŭbić-daŭbić» u tekście, i pieršy raz jana heta nie pračytała, ja padumała — okiej, značyć joj tak kamfortna. Ale ŭ nastupny raz jana čamuści pieradumała, i ŭ jaje hetaja fraza atrymlivałasia supiermocna».
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club3
Kamientary
(žartuju)