Mielnikava prylacieła na Šry-Łanku, ale paśla palacieła dalej — Cimur Aleŭski
Źnikłaja śpikierka Kaardynacyjnaj rady Anžalika Mielnikava adpraviłasia z Łondanu na Šry-Łanku ź dziećmi, a z Šry-Łanki vylecieła dalej. Pra heta raskazaŭ u efiry «Biełsata» Cimur Aleŭski, suaŭtar rasśledavańnia pra Mielnikavu, jakoje vyjšła ŭ polskim časopisie Polityka. Jon taksama anansavaŭ praciah rasśledavańnia.
Suaŭtar rasśledavańnia polskaha časopisu Polityka, šef-redaktar rasijskaha vydańnia The Insider Cimur Aleŭski raskazaŭ «Biełsatu», što rasśledavańnie praciahvajecca i ŭ chutkim časie vyjdzie jaho druhaja častka.
«Bolš poŭnaja, z raskazam pra pieramiaščeńnie Anžaliki Mielnikavaj z Varšavy tudy, dzie jana ciapier znachodzicca. My dumajem, što my ź vialikaj dolaj upeŭnienaści viedajem dzie. Jana pieramiaščajecca, pa-pieršaje. Pa-druhoje, my, na žal, nie razumiejem dasiul matyvy jaje ŭčynkaŭ. Siońnia heta asnoŭnaje pytańnie», — skazaŭ Aleŭski.
Pakul jon aścierahajecca kazać, dzie moža być Mielnikava, bo heta moža vielmi mocna paŭpłyvać na jejny los. Žurnalist dadaje, što stanam na 7 maja viadoma bolš, čym kali tekst addavali ŭ druk 3 maja.
«My viedali, što jana vylecieła z Łondanu na Šry-Łanku. Zatym jana dalej latała. Jana była ź dziećmi. Dalej ničoha raskazvać nie mahu, bo heta pytańnie i jaje asabistaj biaśpieki, i paśpiachovaha zakančeńnia rasśledavańnia», — dadaje Aleŭski.
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.
8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.
10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma.
14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.
6 maja 2025 hoda na sajcie polskaha vydańnia «Palityka» vyjšła rasśledavańnie «Zniknięcie Anżeliki». Jaho aŭtary — palak Pavieł Reška i rasijanie Cimúr Aleŭski i Jaŭhienija Tamarčanka — śćviardžali, što źniknieńnie Anžaliki Mielnikavaj moža być źviazana z hrašyma, jakija byli na rachunku fundacyi Bialorus liberty. U tym ža artykule ŭpieršyniu była ahučanaja viersija, što z Łondana Anžalika Mielnikava vylecieła na Šry-Łanku, pry hetym jaje supravadžaŭ kachanak-biełarus spartyŭnaha vyhladu, jaki moža być supracoŭnikam KDB.
«Kibierpartyzany»: My nie viedajem, adkul u «Palityki» infarmacyja pra Mielnikavu
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi
Azaraŭ: Dumaju, Mielnikava pajechała adpačyvać na Kubu
«Vylecieła z Łondana ŭ treciuju krainu». Što viadoma pra źniknieńnie Mielnikavaj praź miesiac pošukaŭ
Ciapier čytajuć
Ryta Dakota nabyła dom za niekalki miljonaŭ dalaraŭ kala Halivuda15
Ryta Dakota nabyła dom za niekalki miljonaŭ dalaraŭ kala Halivuda
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1515
Kamientary