Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi

Pra toje, što Mielnikava pierakročyła miažu Šry-Łanki, vydańniu paviedamili dźvie niezaležnyja adna ad adnoj krynicy. Polityka piša, što heta była nie pieršaja pajezdka źnikłaj biełaruski na hetuju ekzatyčnuju vyspu. Anžalika adpačyvała tam u studzieni 2024 hoda, u miascovaści Unavatuna. Jak piša Polityka, jana była tam z mužčynam.

Časopis cytuje nienazvanuju siabroŭku Mielnikavaj: «Jana pakazvała mnie zdymak i zaručalny piarścionak. Raskazvała, što jon spartoviec ź Biełarusi i što jana ŭ jaho zakachanaja».

Pavodle vydańnia, Anžalika Mielnikava nie raskazvała pra svaje ramantyčnyja adnosiny kaleham u apazicyjnym asiarodku, pakolki kantakty z mužčynam, jaki žyvie ŭ Biełarusi, mahli zaniepakoić jaje kalehaŭ.

«Čałaviek, jaki pradstaŭlaŭsia «spartoŭcam», moh być supracoŭnikam biełaruskaha KDB. A apošniaja pajezdka na Šry-Łanku mahła być pastkaj śpiecsłužbaŭ. Z vostrava možna biez prablem trapić u Rasiju, a paśla ŭ Biełaruś. Jość rehularnyja złučeńni i čartarnyja rejsy. Mahčyma, Mielnikava sieła na adzin z hetych samalotaŭ — pa ŭłasnaj voli, pad prymusam ci šantažam», — miarkujuć aŭtary tekstu.

Mielnikava, jak piša polskaje vydańnie, časta vyjazdžała ŭ ekzatyčnyja krainy. U Dubai, naprykład, jana sustrakałasia sa svajoj maci. U adpačynak jana jeździła i pa try razy na hod. Na Bali, u Turcyju, Jehipiet, Šry-Łanku.

Uvohule, jana žyła zamožnym žyćciom.

«Jana dobra apranałasia, dbała pra makijaž i jeździła da svajho ŭlubionaha cyrulnika za 200 km ad Varšavy. Rehularna naviedvała spartzału, dzie zajmałasia z asabistym trenieram. Niadaŭna jana pačała zajmacca kikboksinham. Kab nie šukać miesca dla parkoŭki pierad trenažornaj załaj, jana arandavała parkovačnaje miesca ŭ susiednim padziemnym haražy», — vyśvietliła vydańnie.

Jaje vydatki značna pieravyšali zarobak, adznačaje Polityka. Ličyłasia, što za jaje płacić były muž, ź jakim jany ad 2024 hodu znoŭ žyli razam.

Na pačatku hetaha hoda ŭ pavodzinach Mielnikavaj kalehi i znajomyja pačali zaŭvažać dziŭnyja pieramieny. Jana stała vyhladać pryhniečanaj i mienš dbała pra svoj vyhlad. Adna ź siabrovak raskazała časopisu, što padčas dnia naradžeńnia Mielnikavaj (12 lutaha) inšaja dziaŭčyna vypadkova zabrała iPhone Anžaliki. Anžalika zapanikavała.

«Jana paprasiła zavieźci jaje da toj dziaŭčyny dadomu. Jak tolki joj viarnuli telefon, jana adrazu ž skinuła ŭsie nałady da zavodskich». Anžalika pierastała karystacca mašynaj. Na sustrečy jeździła na Uber. Akazałasia, što mašyna naležała jaje byłomu mužu i jaje pradali na pačatku hoda.

Raniejšy artykuł «Našaj Nivy» pra Mielnikavu čytajcie tut.

Było takoje adčuvańnie, što jany płanavali razam uciačy, — piša vydańnie. — Potym Anžalika pačała kazać nam usim, što joj treba adpačyć i što jana choča pajechać u Łondan. Jana paprasiła vodpusk u NAU. Vylecieła jana 26 lutaha. Ci palacieli ź joj dzieci? Śpiecsłužby paviedamili Paŭłu Łatušku, što tak, ale tut my nie ŭpeŭnienyja», — raskazała adna ź jaje siabrovak.

Nieŭzabavie paśla hetaha, 1 abo 2 sakavika, były muž Anžaliki Mielnikavaj Andrej spakavaŭ rečy ŭ kvatery, dzie jany žyli, i 3 sakavika pierajechaŭ na aŭtobusie biełaruskuju miažu.

Kalehi Mielnikavaj byli pierakananyja, što sama jana viarnułasia z Łondanu. Anžalika adkazvała na zvanki, adpisvała sms. Jana kazała, što nie moža pryjści ŭ ofis, bo ŭ jaje kavid i zapaleńnie lohkich.

Polityka cytuje Paŭła Łatušku, jaki ŭ toj čas pierapisvaŭsia ź joj: «Ja ličyŭ, što jana doma ź dziećmi i chvareje na kovid. Ja ŭvieś čas joj pisaŭ».

Mahčyma, heta było niejak źviazana z hrašyma, dapuskaje polski časopis. 12 sakavika na rachunak jaje fondu byli pieraviedzienyja bujnyja hrantavyja srodki. Nieŭzabavie paśla hetaha jany byli źniatyja. Ahułam havorka pra 118 000 jeŭra, piša polski časopis.

(Pieršapačatkova ŭ pierakazie «NN» infarmacyja pra hrošy pryvodziłasia jak cytata Łatuški, ale heta słovy aŭtaraŭ polskaha rasśledavańnia. Prynosim vybačeńni za niedakładnaść).

Polityka nahadała, što hramadskaj dziejnaściu Mielnikava zaniałasia ŭ Biełastoku, kudy jaje siamja pierajechała ŭ studzieni 2021 hoda z Kijeva. Tam jana pačała supracoŭničać z fondam «Biełaruś-2020», jaki dapamahaŭ palituciekačam. Jaje były kaleha tak zhadvaŭ toj čas:

«Anžalika nie rabiła akcentu na svajoj idejnaści. Jana skazała, što ŭmieje pisać hrantavyja prajekty i chacieła b hetym zarablać. Kupić kvateru, pabudavać svajo žyćcio ŭ Polščy».

U krasaviku jana ŭžo ŭdzielničała ad imia fondu ŭ sustrečy nakont hrantaŭ z kanadskimi dypłamatami ŭ Varšavie. A nieŭzabavie paśla hetaha Mielnikava prapanavała kiraŭnictvu «Biełarusi-2020» pradać fond joj. Tych heta šakavała, jany admovilisia. Praź niekatory čas Anžalika pierajechała ŭ Varšavu i zasnavała svoj fond — Białoruś Liberte.

Pavialičyć

Tady ž Mielnikava ŭładkavałasia na pracu ŭ NAU Paŭła Łatuški, a paźniej stała śpikierkaj Kaardynacyjnaj rady. Aŭtary artykuła nahadvajuć, što Mielnikava mieła dostup da vysokapastaŭlenych polskich palitykaŭ i maryła navat pasprabavać siabie ŭ polskaj palitycy, bałatavacca ŭ Siejm. Jany dapuskajuć, što pravierka Mielnikavaj napiaredadni atrymańnia hramadzianstva Polščy mahła być paviarchoŭnaj. A śledstva ŭ spravie «źniknieńnia Mielnikavaj», jakoje viadzie Ahienctva ŭnutranaj biaśpieki (anałah KDB), Polityka nazyvaje «mlavym».

«Supracoŭniki śpiecsłužbaŭ nie apytvali važnych śviedak, nie źviartalisia da znajomych, nie praviarali miescy, dzie časta byvaje apazicyjanierka. Jany navat nie prychodzili ŭ ofis NAU u centry Varšavy, dzie pracavała Mielnikava. Kala jaje stała dahetul visić propusk u Siejm (ad 16 studzienia). Na stale — papiery — takija ž, jakija pakinuła Anžalika apošni raz na pracy. Ci chto-niebudź ich prahladaŭ? Palicyja? Ahienctva ŭnutranaj biaśpieki? — pytajemsia my. — Nichto. A kolki kaleh užo dapytali? — Nikoha», — pišuć aŭtary artykuła ŭ časopisie Polityka i naprykancy dadajuć:

«Heta moža śviedčyć ab tym, što sprava biełaruskaj apazicyi ŭ Polščy — niahledziačy na palityčnuju i finansavuju padtrymku — dla našych uładaŭ absalutna druhasnaja».

• 10
• 3
• 19
• 70
• 12
• 9
• 3
• 1