Iran pryhraziŭ źniacca z čempijanatu śvietu pa futbole. Chto moža pajechać zamiest jaho?

Zbornaja Irana, jakaja adabrałasia na turnir, usie matčy hrupavoha etapu ŭ červieni pavinna pravieści ŭ ZŠA: dva — u Inhłvudzie (suprać Novaj Ziełandyi i Bielhii), adzin — u Sietle (ź Jehiptam). I jość vialikija sumnievy, što heta mahčyma, piša Sports.ru.

Prezident fiederacyi futboła Irana Miechdzi Tadž zajaviŭ, što paśla abvastreńnia vajskovaha kanfliktu ciažka «z aptymizmam hladzieć na čempijanat śvietu» i što ŭdzieł zbornaj u turniry jon asabista ličyć małavierahodnym. Pry hetym Tadž padkreśliŭ, što kančatkovaje rašeńnie — za dziaržavaj.

Kali karotka: vyrašaje FIFA. Kali razhornuta: vyrašaje FIFA «pa ŭłasnym mierkavańni».

Kankretnyja kryteryi nie prapisany. Zdarovy sens padkazvaje, što ŭ asnovu rašeńnia pavinien lehčy spartyŭny pryncyp.

Pa praviłach, kali zbornaja admaŭlajecca ad udziełu ŭ ČS za 30 i bolš dzion da pieršaha matču — jaje aštrafujuć na sumu ad 277 tysiač jeŭra (250 tysiač šviejcarskich frankaŭ), kali mienš čym za 30 dzion — ad 554 tysiač jeŭra (500 tysiač šviejcarskich frankaŭ).

Kali admovicca padčas turniru, to moža być zabanienaja na nastupny ČS. Va ŭsich vypadkach jaje paprosiać kampiensavać hrašovuju škodu, jakuju paniasie FIFA i arhanizatary.

Adrazu ŭ hałavu prychodzić epičnaja zamiena Juhasłavii na Daniju za niekalki dzion da startu Jeŭra-1992 — z-za vajskovaha kanfliktu na Bałkanach.

Choć hety vypadak padychodzić nie całkam, tamu što Jeŭra arhanizoŭvaje UEFA, a ČS — FIFA. Tady zamienu zrabili jakraz pa spartyŭnym pryncypie — datčanie ŭ adbory zaniali druhoje miesca ŭ hrupie paśla juhasłavaŭ. Daviedaŭšysia pra rašeńnie UEFA, jany pierapynili adpačynki i potym siensacyjna pieramahli na turniry.

Čaściej FIFA banić kaho-niebudź i jašče da/padčas adboru — tak było sa źniaćciem zbornaj Rasii ŭ lutym 2022 pierad stykami, a tuju ž Juhasłaviju nie dapuścili na adbor na ČS-1994.

U hetym cykle zbornaja Erytrei z ułasnaj inicyjatyvy admoviłasia ad udziełu ŭ afrykanskim adbory jašče da pieršaj hulni.

Z admovaŭ užo paśla adboru možna ŭspomnić daloki ČS-1950, kali na turnir nie pryjechali try ŭdzielniki — Indyja, Šatłandyja i Turcyja.

Indyja nasupierak mifu pra žadańnie hulać basanož pa aficyjnaj viersii ekanomiła hrošy, a pa nieaficyjnaj — paličyła turnir niesurjoznym.

Lišnija vydatki napałochali i Turcyju, a Šatłandyi pieraškodziŭ honar — sprava ŭ tym, što jana prajhrała ŭnutrany turnir Anhlii. Sakratar miascovaj futbolnaj asacyjacyi Džordž Hrem zajaviŭ, što Šatłandyja pryniała b zaprašeńnie FIFA tolki ŭ statusie čempijonaŭ Vialikabrytanii. Mahčyma, pad takoj farmuloŭkaj taksama chavałasia niežadańnie tracicca.

U vyniku ŭ finalnym turniry zamiest 16 zbornych udzielničali tolki 13.

Klučavaja vysnova: zamienu šukali pa spartyŭnym pryncypie, ale krainy na zamienu (Irłandyja, Partuhalija, Francyja) taksama admovilisia jechać.

Chto staić u čarzie na miesca Irana?

Łahična vykazać zdahadku, što Iran pavinna zamianić zbornaja z Azii, adkul adabralisia taksama Japonija, Paŭdniovaja Kareja, Uźbiekistan, Katar, Iardanija, Saudaŭskaja Aravija, Aŭstralija (udzielničaje ŭ azijackim adbory).

Zbornaja Iraka ŭ kancy sakavika moža atrymać pucioŭku praź mižkantynientalnyja stykavyja matčy — sapiernikam budzie Balivija ci Surynam.

Kali Irak prajhraje styki da mahčymaj admovy Irana, to, vierahodna, atrymaje śpiecyjalnaje zaprašeńnie. Kali nie, čarha dojdzie da AAE, jakija sastupili Iraku prava zhulać u stykach.

Mahčymy alternatyŭny varyjant — vybrać azijackuju krainu z samym vysokim rejtynham FIFA. Tut kandydat toj ža — AAE sastupaje tolki zbornym, jakija ŭžo vyjšli na turnir.

Viadoma, nie varta zabyvać «ułasnaje mierkavańnie» FIFA.

Jurydyčna jana moža zaprasić kaho zaŭhodna, ale, chutčej za ŭsio, pasprabuje ŭsio ž taki pryniać łahičnaje rašeńnie, kab paźbiehnuć novych reputacyjnych strat

• 0
• 0
• 1
• 0
• 0
• 0
• 1
• 0