«Nakiravaŭ aŭtamabil u bok palicyjantaŭ». U polskaj prakuratury prakamientavali spravu sa stralboj pa biełarusie ŭ Polščy

Što kažuć u Biełarusi

Pavodle danych Śledčaha kamiteta Biełarusi, unačy 12 maja 60‑hadovy ŭradženiec Słonima jechaŭ u Polščy pa aŭtadarozie S8. Pablizu horada Sycaŭ (heta ŭ Nižniesilezskim vajavodstvie) «na jaho byŭ učynieny biespadstaŭny napad z boku polskich siłavikoŭ, z užyvańniem ahniastrelnaj zbroi».

Kiroŭca atrymaŭ ciažkija ahniastrelnyja ranieńni hałavy i kaniečnaściaŭ, a ŭ aŭtamabili naličyli 29 kulavych adtulin.

Kanał «Biełaruś 1» paźniej paviedamiŭ, što mužčynu dastavili ŭ balnicu ŭ Polščy, ale tam nibyta akazali dapamohu z hrubymi parušeńniami, a praź niekalki dzion prosta vykinuli, i ciapier biełarus moža zastacca invalidam.

Tym nie mienš, jak paznačana ŭ materyjałach Śledčaha kamiteta, niahledziačy na cialesnyja paškodžańni, mužčynu «ŭdałosia pierasiekčy miažu, adkul jon byŭ ekstranna dastaŭleny va ŭstanovu achovy zdaroŭja ŭ vielmi ciažkim stanie».

Što kažuć va Urocłaŭskaj prakuratury

Most nakiravaŭ zapyt u Akruhovuju prakuraturu va Urocłavie. Joj padparadkoŭvajecca rajonnaja prakuratura ŭ Alaśnicy, jakaja viadzie spravu. 22 maja byŭ atrymany adkaz za podpisam pres-sakratara Damijana Poŭnuka, jaki apisvaje, što zdaryłasia ŭnočy 12 maja ŭ rajonie Sycava.

«Jak ustanoŭlena na hety momant u chodzie praviedzienych rasśledavańniaŭ, umiašańnie ažyćciaŭlali supracoŭniki Kryminalnaha adździeła Haradskoj kamiendatury palicyi ŭ Vałbžychu. Metaj ich dziejańniaŭ było zatrymańnie asob, jakija ŭčynili kradziež aŭtamabilaŭ marak Citroen i Peugeot.

Na trasie S8 u kirunku Alaśnicy supracoŭniki zaŭvažyli transpartny srodak, jaki adpaviadaŭ apisańniu. Ruchajučysia za im, supracoŭniki palicyi zapadozryli, što aŭtamabil marki Citroen, za jakim viałosia nazirańnie, supravadžajecca kiroŭcam aŭtamabila BMW. Abodva transpartnyja srodki źjechali na prydarožnuju zonu absłuhoŭvańnia (MOP) u rajonie nasielenaha punkta Sycaŭ, i supracoŭniki vyrašyli pravieści tam umiašańnie.

Pry ŭjeździe ŭ MOP supracoŭniki palicyi ŭklučyli hukavyja i śvietłavyja sihnały i vyrašyli pravieryć dakumienty va ŭsich kiroŭcaŭ. Kiroŭcu aŭtamabila BMW było zahadana pakinuć transpartny srodak, a pakolki jon nie reahavaŭ, jaho vyciahnuli z aŭtamabila i nadzieli na jaho kajdanki. U hety čas kiroŭca Citroen pakinuŭ miesca zdareńnia, najechaŭšy na stupniu supracoŭnika palicyi. Za im nakiravaŭsia adzin z patruloŭ», — apisvaje chod padziej prakuratura.

U niejki momant da miesca stajanki padjechaŭ jašče adzin aŭtamabil — taksama BMW. Vierahodna, jaho kiroŭca byŭ źviazany z dvuma inšymi. Miarkujučy pa ŭsim, heta byŭ toj samy aŭtamabil, u jaki stralali palicyjanty.

«Zatym pasprabavaŭ źjechać kiroŭca druhoha aŭtamabila BMW, vykonvajučy niebiaśpiečnyja manieŭry — rezka zdajučy nazad i pavaročvajučy, a taksama nakiroŭvajučy aŭtamabil u bok supracoŭnika palicyi, u vyniku čaho ŭ dačynieńni da jaho była ŭžytaja ahniastrelnaja zbroja», — apisvaje prakuratura.

Prakuratura viadzie dźvie spravy

U suviazi sa zdareńniem Rajonnaja prakuratura ŭ Alaśnicy viadzie dźvie padrychtoŭčyja spravy. Adnu — u dačynieńni da dvuch kiroŭcaŭ, jakija nie spynilisia pa patrabavańni palicyjantaŭ i ŭčynili na ich napad, nakiroŭvajučy na ich aŭtamabili. Adzin da taho ž najechaŭ supracoŭniku pravaparadku na nahu. Adnym z hetych dvuch mužčyn źjaŭlajecca paranieny biełarus. Treci kiroŭca, jakoha vyvałakli z mašyny, fihurantam spravy nie staŭ.

Padrychtoŭčaje rasśledavańnie pa druhoj spravie tyčycca mahčymaha pieravyšeńnia paŭnamoctvaŭ supracoŭnikami palicyi.

«U ramkach praviedzienaha rasśledavańnia budzie daśledavacca abhruntavanaść i pravilnaść praviadzieńnia ŭmiašańnia», — paviedamili ŭ prakuratury.

U jakim stanie byŭ biełarus

Biełaruski bok ličyć, što mužčyna byŭ u vielmi ciažkim stanie, što, zrešty, nie pieraškodziła jamu dabracca z zachadu Polščy da miažy ź Biełaruśsiu.

Pra incydent, biez paznačeńnia nacyjanalnaściaŭ kiroŭcaŭ, raskazvaŭ polski telekanał TVN. U siužecie adznačałasia, što

«kiroŭca atrymaŭ ranieńni. Supracoŭniki akazali jamu pieršuju miedycynskuju dapamohu i vyklikali chutkuju dapamohu, jakaja dastaviła paranienaha kiroŭcu ŭ balnicu. Ranieńni nie pahražali jaho žyćciu».

• 2
• 0
• 9
• 5
• 0
• 0
• 0
• 0