Siamiejnaja para z Francyi pakinuła dvuch małych dziaciej u lesie — i pajechała. I heta nie kazka pra Hienzel i Hretel
U Partuhalii pravaachoŭnyja orhany rasśledujuć spravu ab pakidańni dvaich małych dziaciej u niebiaśpiecy. Bratoŭ troch i piaci hadoŭ, jakija akazalisia hramadzianami Francyi, znajšli ŭ lasistaj miascovaści paśla taho, jak maci i ajčym pakinuli ich tam pad vyhladam hulni.
Incydent adbyŭsia na poŭdni Partuhalii (rehijon Alentežu), u rajonie pamiž haradami Ałkasier-du-Sał i Kamporta. Heta malaŭničaja, ale małanasielenaja lasistaja miascovaść niedaloka ad Atłantyčnaha ŭźbiarežža, raźmieščanaja prykładna za 100 kiłamietraŭ na poŭdzień ad stalicy krainy Lisabona.
Mienavita tam, jak paviedamlaje Daily Mail, viečaram u aŭtorak, 19 maja, miascovaja siamiejnaja para zaŭvažyła na darozie dvuch chłopčykaŭ, jakija byli adny, płakali i byli napałochanymi. Pry dzieciach byli tolki zaplečniki ź minimalnym zapasam vady, sadaviny i źmiennym adzieńniem.
Śviedki adrazu vyklikali palicyju, paśla čaho dziaciej dastavili ŭ špital horada Sietubał. Miedycynski ahlad pakazaŭ, što chłopčyki fizična zdarovyja, choć i mieli na ciele siniaki i drapiny. Ekśpiertyza taksama paćvierdziła adsutnaść u ich arhaniźmie jakich-niebudź preparataŭ.
Padčas razmovy z uładami dzieci raspaviali detali zdareńnia. Pavodle ich słoŭ, maci i ajčym zaviazali im vočy i zavieźli ŭ les, patłumačyŭšy heta hulnioj, meta jakoj — «prahnać djabła». Baćki skazali synam, što tyja mohuć źniać paviazki tolki paśla taho, jak znojduć zakapany ŭ ziamli nož.
Kali starejšy brat usio ž praź niekalki chvilin źniaŭ paviazku, darosłych pobač užo nie było. Dzieci niekalki hadzin błukali pa lesie pry tempieratury pavietra kala 30 hradusaŭ, pakul nie vyjšli da darohi.
Śledstva vyśvietliła, što siamja pryjechała ŭ Partuhaliju z francuzskaha Kalmara. Jašče za dva tydni da hetaha svajaki dziaciej — babula i bijałahičny baćka — zajaŭlali ŭ francuzskuju palicyju pra vykradańnie chłopčykaŭ mamaj.
Viadoma, što siamja pierasiekła ispanska-partuhalskuju miažu 11 maja. Pierad tym, jak pakinuć dziaciej, para spyniałasia ŭ adnym ź miascovych hatelaŭ. Taksama paviedamlajecca, što ajčym chłopčykaŭ raniej traplaŭ u pole zroku francuzskaj palicyi ŭ suviazi ź psichičnym razładam.
Na hety momant chłopčyki znachodziacca pad nahladam i rychtujucca da pieradačy francuzskamu pasolstvu. U Francyi ŭ dačynieńni da baćkoŭ zaviedzienaja kryminalnaja sprava za hrebavańnie baćkoŭskimi abaviazkami, a ŭ Partuhalii pačata terminovaja sudovaja pracedura ŭ sudzie pa spravach niepaŭnaletnich. U čaćvier, 21 maja, partuhalskaja palicyja paviedamiła pra aryšt maci i ajčyma.
Kamientary