Cichanoŭskaja: «Dla mianie nie staić pytańnie, ci pieramoža Ukraina. Adzinaje pytańnie — kali»
Śviatłana Cichanoŭskaja vystupiła na adkryćci Mižnarodnaha samitu haradoŭ i rehijonaŭ u Kijevie. U adkryćci samitu ŭdzielničali prezident Ukrainy Uładzimir Zialenski, śpikier Viarchoŭnaj Rady Rusłan Stefančuk, premjer-ministarka Ukrainy Julija Śvirydenka, pradstaŭniki ŭrada, rehijonaŭ, haradoŭ, mižnarodnych arhanizacyj i partniorskich krain.
U svajoj pramovie Śviatłana Cichanoŭskaja padkreśliła, što pieramoha Ukrainy maje vyrašalnaje značeńnie i dla budučyni Biełarusi. Jana adznačyła, što hałoŭny ŭniosak svabodnaj Biełarusi ŭ biaśpieku Ukrainy ŭ budučyni — heta harantyja, što bolš za tysiaču kiłamietraŭ supolnaj miažy buduć biaśpiečnymi:
«Dla mianie nie staić pytańnie, ci pieramoža Ukraina. Adzinaje pytańnie — kali. I heta zaležyć ad taho, kolki my robim, kab nablizić hety momant. Ukraina zmahajecca za siabie i za ŭsie narody, jakija zanadta doŭha žyli ŭ cieni impieryi. Jana zmahajecca za prava žyć u miry. I los majoj krainy, Biełarusi, taksama zaležyć ad pośpiechu Ukrainy.
Ja vieru, što pieramoha Ukrainy adkryje šlach da svabodnaj Biełarusi.
Ja ŭbačyła vielizarnuju canu, jakuju Ukraina zapłaciła i praciahvaje płacić kožny dzień za našu ahulnuju budučyniu.
Tamu hałoŭnaje, što Biełaruś moža i pavinna dać Ukrainie ŭ budučyni, — heta biaśpieka. Harantyja taho, što bolš za tysiaču kiłamietraŭ supolnaj miažy buduć biaśpiečnymi. Što Biełaruś nikoli bolš nie stanie płacdarmam dla ahresii. Što rasijskija tanki nikoli bolš nie projduć praź Biełaruś na Čarnihaŭ, Žytomir, Roŭna ci Kijeŭ.
Ja pierakananaja: kali Biełaruś stanie svabodnaj, našy harady i rehijony z abodvuch bakoŭ miažy adnoviać partniorstva i supracoŭnictva. I heta ŭžo nie pytańnie, ci adbudziecca heta. Pytańnie tolki — kali».
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž24
Kamientary