Arhiencinski futbalist Lijanel Miesi admoviŭsia ad nievierahodna vyhadnaha kantrakta ŭ Saudaŭskaj Aravii, kab pierajści ŭ «Inter Majami», ale dziakujučy niadaŭnim vypłatam i sponsarskim pahadnieńniam usio roŭna staŭ miljarderam, piša Bi-bi-si.
Pavodle padlikaŭ Bloomberg, z 2007 hoda 38‑hadovy Miesi zarabiŭ bolš za 700 młn dalaraŭ u vyhladzie zarpłaty i bonusaŭ. Z ulikam padatkaŭ, pakazčykaŭ rynku, dachodaŭ ad inviestycyj i sponsarskich kantraktaŭ jaho čysty kapitał pieravysiŭ adznaku ŭ 1 młrd dołaraŭ.
Heta značyć, što jon uvajšoŭ u lik samych bahatych spartsmienaŭ śvietu naroŭni sa svaim daŭnim sapiernikam Kryšcijanu Ranałdu — partuhalskim forvardam, jaki paŭhoda tamu staŭ pieršym futbalistam-miljarderam u vyniku pierachodu ŭ saudaŭski kłub «Al-Nasr» u 2023 hodzie.
Mnohija prychilniki Miesi byli ździŭleny, kali paśla pieramohi Arhientyny na čempijanacie śvietu 2022 hoda futbalist admoviŭsia ad vyhadnaha kantraktu na sumu 400 młn dalaraŭ u hod, jaki prapanoŭvała jamu prafiesijnaja futbolnaja liha Saudaŭskaj Aravii. Zamiest hetaha jon vyrašyŭ pierajści ŭ «Inter Majami», nahadvaje Bloomberg.
«Hrošy nikoli nie byli dla mianie prablemaj i nie stvarali pieraškod, — skazaŭ Miesi ŭ intervju Mundo Deportivo ŭ tym ža hodzie. — Kali b sprava była ŭ hrošach, ja b źjechaŭ u Saudaŭskuju Araviju ci kudy-niebudź jašče».
Tym nie mienš, z hadami spravy ŭ «Inter Majami» išli ŭsio lepš i lepš. Pavodle dadzienych Bloomberg, zaraz heta samaja darahaja futbolnaja kamanda ZŠA.
Jana zajmaje 16‑ie miesca ŭ suśvietnym rejtynhu i apiaredžvaje takija kamandy, jak «Ńjukasł Junajted» z anhlijskaj Premjer-lihi.
U pačatku hetaha hoda ŭładalnik «Inter Majami» Chorchie Mas paviedamiŭ, što hadavaja zarpłata Miesi ŭ kłubie składaje ad 70 da 80 młn dołaraŭ z ulikam bonusaŭ.
Pierajšoŭšy ŭ «Inter Majami», Miesi atrymaŭ mahčymaść zarablać hrošy novym dla siabie sposabam. Jak paviedamlaje vydańnie Athletic, u chodzie pieršych pieramoŭ ab kantrakcie Amierykanskaja futbolnaja liha i Apple abmiarkoŭvali pahadnieńnie ab padziele dachodaŭ, u adpaviednaści ź jakim Miesi budzie atrymlivać dolu ad prodažaŭ novych padpisak na pakiet stryminhavych pasłuh Apple TV+ «MLS Season Pass».
Raniej Mas zajaviŭ, što kolkaść padpisčykaŭ stryminhavaha servisu padvoiłasia praź niekalki miesiacaŭ paśla pierachodu Miesi.
Miesi aktyŭna raźvivaje biźnies-prajekty pa-za futbołam. U 2024 hodzie jon vypuściŭ spartyŭny napoj «Más+ by Messi» ŭ partniorstvie z kampanijaj «Mark Anthony International SRL».
Akramia taho, jon staŭ inviestaram arhiencinskaj sietki restaranaŭ «El Club de la Milanesa», jakaja śpiecyjalizujecca na stejkach u paniroŭcy — tradycyjnaj dla Arhientyny stravie, adnoj ź lubimych u samoha Miesi.
Da pierachodu ŭ «Inter Majami» Miesi dva hady hulaŭ za francuzski kłub «Pary Sien-Žermien», a da hetaha pryvioŭ «Barsiełonu» da niekalkich pieramoh u ispanskich i jeŭrapiejskich turnirach. Akramia taho, jon zavajavaŭ bolš «Załatych miačoŭ», čym luby inšy futbalist.
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary