Аргенцінскі футбаліст Ліянэль Месі адмовіўся ад неверагодна выгаднага кантракта ў Саудаўскай Аравіі, каб перайсці ў «Інтэр Маямі», але дзякуючы нядаўнім выплатам і спонсарскім пагадненням усё роўна стаў мільярдэрам, піша Бі-бі-сі.
Паводле падлікаў Bloomberg, з 2007 года 38‑гадовы Месі зарабіў больш за 700 млн даляраў у выглядзе зарплаты і бонусаў. З улікам падаткаў, паказчыкаў рынку, даходаў ад інвестыцый і спонсарскіх кантрактаў яго чысты капітал перавысіў адзнаку ў 1 млрд долараў.
Гэта значыць, што ён увайшоў у лік самых багатых спартсменаў свету нароўні са сваім даўнім сапернікам Крышціяну Раналду — партугальскім форвардам, які паўгода таму стаў першым футбалістам-мільярдэрам у выніку пераходу ў саудаўскі клуб «Аль-Наср» у 2023 годзе.
Многія прыхільнікі Месі былі здзіўлены, калі пасля перамогі Аргентыны на чэмпіянаце свету 2022 года футбаліст адмовіўся ад выгаднага кантракту на суму 400 млн даляраў у год, які прапаноўвала яму прафесійная футбольная ліга Саудаўскай Аравіі. Замест гэтага ён вырашыў перайсці ў «Інтэр Маямі», нагадвае Bloomberg.
«Грошы ніколі не былі для мяне праблемай і не стваралі перашкод, — сказаў Месі ў інтэрв'ю Mundo Deportivo ў тым жа годзе. — Калі б справа была ў грошах, я б з'ехаў у Саудаўскую Аравію ці куды-небудзь яшчэ».
Тым не менш, з гадамі справы ў «Інтэр Маямі» ішлі ўсё лепш і лепш. Паводле дадзеных Bloomberg, зараз гэта самая дарагая футбольная каманда ЗША.
Яна займае 16‑е месца ў сусветным рэйтынгу і апярэджвае такія каманды, як «Ньюкасл Юнайтэд» з англійскай Прэм'ер-лігі.
У пачатку гэтага года ўладальнік «Інтэр Маямі» Хорхе Мас паведаміў, што гадавая зарплата Месі ў клубе складае ад 70 да 80 млн долараў з улікам бонусаў.
Перайшоўшы ў «Інтэр Маямі», Месі атрымаў магчымасць зарабляць грошы новым для сябе спосабам. Як паведамляе выданне Athletic, у ходзе першых перамоў аб кантракце Амерыканская футбольная ліга і Apple абмяркоўвалі пагадненне аб падзеле даходаў, у адпаведнасці з якім Месі будзе атрымліваць долю ад продажаў новых падпісак на пакет стрымінгавых паслуг Apple TV+ «MLS Season Pass».
Раней Мас заявіў, што колькасць падпісчыкаў стрымінгавага сэрвісу падвоілася праз некалькі месяцаў пасля пераходу Месі.
Месі актыўна развівае бізнес-праекты па-за футболам. У 2024 годзе ён выпусціў спартыўны напой «Más+ by Messi» ў партнёрстве з кампаніяй «Mark Anthony International SRL».
Акрамя таго, ён стаў інвестарам аргенцінскай сеткі рэстаранаў «El Club de la Milanesa», якая спецыялізуецца на стэйках у паніроўцы — традыцыйнай для Аргентыны страве, адной з любімых у самога Месі.
Да пераходу ў «Інтэр Маямі» Месі два гады гуляў за французскі клуб «Пары Сен-Жэрмен», а да гэтага прывёў «Барселону» да некалькіх перамог у іспанскіх і еўрапейскіх турнірах. Акрамя таго, ён заваяваў больш «Залатых мячоў», чым любы іншы футбаліст.
Цяпер чытаюць
Дзевяць чалавек памерлі ў Брэсце і Мінску — усім ім уводзілі адныя і тыя ж лекі. У прэпараце знайшлі бактэрыі4
Каментары