Дома расійскага сатырыка Міхаіла Задорнава ў Юрмале, які ён называў «сямейнай сядзібай», больш няма.
Новыя ўладальнікі зруйнавалі будынак да падмурка, а на яго месцы пабудавалі сучасны двухпавярховы катэдж. Новыя ўладальнікі не захацелі захоўваць будынак, звязаны з комікам, які стаў вядомы сваімі выказваннямі супраць Украіны і падтрымкай расійскай агрэсіі, піша Delfi.lv.
Задорнаў набыў дом у Юрмале ў 1990 годзе і праводзіў там шмат часу — прымаў журналістаў, сяброў і прадстаўнікоў расійскага шоу-бізнэсу. У доме было 10 пакояў, у тым ліку тры спальні, два ванныя пакоі і камін.
Пасля смерці Задорнава ў 2017 годзе дом перайшоў ва ўласнасць яго першай жонкі Велты. Спачатку яна здавала яго ў арэнду, а пазней прадала.
Новыя ўладальнікі адразу звярнуліся ў гарадскую думу і папрасілі дазволу зруйнаваць будынак. Праект новага дома ўзгадніла Нацыянальнае ўпраўленне культурнай спадчыны Латвіі, паколькі зямельны ўчастак знаходзіцца ў зоне помніка горадабудаўніцтва дзяржаўнага значэння. Відавочна, усе неабходныя дазволы былі атрыманыя. Цяпер на месцы старога дома стаіць сучасная камяніца коштам каля 3 млн еўра.
Да 2014 года Задорнаў быў адным з самых папулярных расійскіх комікаў і выступаў таксама ва Украіне, аднак пасля рэвалюцыі Майдана яго рыторыка рэзка змянілася.
Сатырык пачаў сістэматычна высмейваць украінцаў, Еўрамайдан, украінскія ўлады і імкненне краіны да інтэграцыі з Еўропай. Ён сцвярджаў, што Украіна ўвойдзе ў гісторыю як краіна, якая «вырашыла, што больш не хоча жыць у беднасці, таму стала жыць яшчэ горш».
Ён высмейваў імкненне Украіны ўступіць у Еўрапейскі саюз і пастаянна паўтараў прапагандысцкія наратывы пра падзеі на Данбасе.
Асабліва бурную рэакцыю словы гумарыста выклікалі пасля таго, як у ліпені 2014 года над Данбасам быў збіты Boeing 777 авіякампаніі Malaysia Airlines. Задорнаў цынічна пажартаваў, што самалёт пацярпеў катастрофу, бо быў «цяжэйшы за паветра». Фактычна гэта было здзекам з трагедыі, якая забрала жыцці 298 чалавек.
Акрамя таго, Задорнаў падтрымаў незаконную анексію Крыма і падпісаў ліст, у якім выказвалася падтрымка прэзідэнту Расіі. Пасля гэтага яму забаранілі ўезд ва Украіну.
Міхаіл Задорнаў нарадзіўся ў Юрмале ў 1948 годзе, дзе ў той час пасля пераезду з Далёкага Усходу пасяліўся яго бацька, пісьменнік Мікалай Задорнаў. Скончыў у Рызе школу і два курсы Рыжскага палітэхнічнага інстытута, пасля чаго пераехаў у Маскву. Пахаваны Міхаіл Задорнаў у Рызе на Лясных могілках побач з магілай бацькі.
Цяпер чытаюць
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча9
Каментары