Амбасада Францыі не па ўласным жаданні закрыла ў Мінску сваю медыятэку, якая працавала 30 гадоў
У жніўні 2026 года ў Мінскай абласной бібліятэцы імя Пушкіна пасля 30 гадоў працы канчаткова закрылася французская медыятэка — Франка-беларуская зала інфармацыі пра сучасную Францыю, піша выданне «Позірк».
Як паведамілі ў французскай амбасадзе, на працягу трох дзесяцігоддзяў медыятэка была пляцоўкай для знаёмства з французскай мовай, культурай і сучаснай Францыяй. Тут праходзілі музычныя, мастацкія і філасофскія сустрэчы, кінапаказы, выставы і гульні. Зала таксама спрыяла вывучэнню французскай мовы дзецьмі.
З паведамлення французскага дыппрадстаўніцтва вынікае, што закрыццё мае палітычныя прычыны. У амбасадзе выказалі шкадаванне, што праект, які існаваў на працягу 30 гадоў і быў накіраваны выключна на культурнае супрацоўніцтва, у выніку стаў непажаданым для беларускіх уладаў.
Прадстаўнікі Францыі спадзяюцца, што гэтае развітанне будзе толькі часовым. У амбасадзе падкрэслілі, што абмежаванні і пазбаўленне доступу да культуры толькі павялічваюць цікавасць да яе.
Пра закрыццё медыятэкі яшчэ 14 ліпеня, падчас прыёму з нагоды нацыянальнага свята Францыі, рэзка выказаўся тагачасны павераны ў справах Францыі ў Беларусі Людавік Руае. Ён заявіў, што з'язджае з Беларусі з адчуваннем незавершанасці, у тым ліку праз закрыццё медыятэкі, якая стала вынікам трыццацігадовага супрацоўніцтва з бібліятэкай імя Пушкіна.
Руае назваў гэтае рашэнне асабліва незразумелым на фоне спроб аднавіць дыялог паміж Францыяй і Беларуссю. Ён таксама адзначыў, што вывесці двухбаковыя адносіны з цяперашняга тупіка будзе надзвычай складана.
Пры гэтым бакі працягваюць заяўляць пра неабходнасць захоўваць каналы камунікацыі. 6 жніўня падчас сустрэчы Руае з былым міністрам замежных спраў Беларусі, старшынёй пастаяннай камісіі Савета Рэспублікі ў міжнародных справах і нацыянальнай бяспецы Сяргеем Алейнікам гаварылася пра важнасць адкрытых кантактаў, узаемнай павагі і захавання культурна-гуманітарных сувязяў паміж дзвюма краінамі.
Цяпер чытаюць
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў53
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1717
Каментары