Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii

Jak tak adbyłosia, što čałaviek, jaki byŭ častkaj sistemy i słužyŭ joj, atrymaŭ adzin z samych ciažkich prysudaŭ?

Pravaabaronca i były palitviazień Uładzimir Łabkovič pravioŭ ź Ciuchajem niekalki miesiacaŭ u adnoj kamiery mahiloŭskaj turmy №4.

«Ja nastolki adyjoznych ludziej za ŭsio žyćcio nie sustrakaŭ. Ale heta, mabyć, toj vypadak, kali nieadekvatnaść pasažyra navat dla «svaich» była zvyš miery», — adznačaje Łabkovič.

«Biełaruski chunvejbin»

Da aryštu Uładzimir Ciuchaj byŭ čałaviekam sistemy. Jon pracavaŭ u BRSM, byŭ siarod kiraŭnictva prałukašenkaŭskaj Kamunistyčnaj partyi.

Łabkovič zhadvaje, jak Ciuchaj raniej udzielničaŭ u zapaŭnieńni sudovych załaŭ, kab nie puskać tudy naziralnikaŭ i svajakoŭ palitviaźniaŭ.

«Tam jon źbiŭ z noh svajačku palitviaźnia Alaksandra Barazienki, kab jana nie zajšła ŭ zalu. Ja nazvaŭ jaho tady maralnym vyradkam. U kamiery jon mnie sam złaśliva kazaŭ: «Ja vas jašče tady zaprykmieciŭ». Ja, ščyra kažučy, navat nie pamiataŭ jaho. Ale, značyć, ź pieršaha pozirku nie pamyliŭsia».

U 2020 hodzie Ciuchaj kiravaŭ atradami BRSMaŭcaŭ, jakija zryvali dvarovyja schody, pravakavali zborščykaŭ podpisaŭ za alternatyŭnych kandydataŭ u prezidenty i pieradavali ludziej siłavikam. Niekatoryja pradstaŭniki kamandy Śviatłany Cichanoŭskaj paśla jaho dziejańniaŭ atrymali kryminalnyja spravy.

Pavodle Uładzimira Łabkoviča, u kamiery Ciuchaj adkryta nazyvaŭ svaim ideałam Bienita Musalini. Raspaviadaŭ, jak padčas adnaho z praŭładnych mitynhaŭ u 2020 hodzie ŭ ekstazie staŭ na kaleni i prymušaŭ inšych malicca za milicyju. Hanaryŭsia tym, što ŭdzielničaŭ u pastanoŭkach: hraŭ rolu zvyčajnaha rabočaha na pradpryjemstvach padčas vizitaŭ Łukašenki, u tym liku na MAZ. 

«Jon adkryta kazaŭ: bolšaść ludziej u kadry — pastanoŭka. Takija, jak jon. Z BRSM, z partyjnych struktur. Tyja, chto pa sihnale stanovicca miascovym žycharom ahraharadka abo rabočym pradpryjemstva», — zhadvaje Uładzimir Łabkovič.

Pavialičyć

Jašče Ciuchaj chvaliŭsia, jak razam z paplečnikami admyvaŭ biudžetnyja hrošy, vydzielenyja na «patryjatyčnuju pracu».

«Jon hetym kičyŭsia», — adznačaje Uładzimir Łabkovič.

Pavodle apoviedaŭ Ciuchaja, partyjnyja struktury stvarali ŭłasnyja firmy, atrymlivali dziaržaŭnyja zamovy na ahitacyjnuju pradukcyju, vyrablali minimum, a astatnija hrošy raśpiłoŭvali miž saboj.

Jon byŭ dyrektaram vydavieckaha doma «ViAłVi», tamu mieŭ mahčymaść realizoŭvać takija schiemy.

Šantaž vajskoŭcaŭ

Niečakany razvarot historyi kamunista adbyŭsia paśla pačatku poŭnamaštabnaj vajny va Ukrainie ŭ 2022 hodzie.

Pavodle słovaŭ Łabkoviča, Ciuchaj śćviardžaŭ, što mieŭ kampramietujučuju infarmacyju pra niekatorych biełaruskich vajskoŭcaŭ z Hienštaba i aparata Ministerstva abarony Biełarusi ab tym, što jany homaseksuały. Jon sprabavaŭ šantažavać ich, kab atrymać sakretnyja źviestki, jakija mahli b być cikavyja Ukrainie.

«Jon pačaŭ šantažavać hetych vajskoŭcaŭ, kab jany pieradavali jamu sakretnuju infarmacyju, jakuju možna było b pradać Ukrainie. Jak ja zrazumieŭ, u jaho byŭ vyklučna kamiercyjny intares. Jon dumaŭ tak padzarabić. Nijakich ideałahičnych ci kaštoŭnasnych matyvaŭ u jaho nie było», — ličyć Łabkovič.

Pravaabaronca kaža, što adnojčy Ciuchaj navat pakazaŭ jamu frahmient pierapiski z KDB, dzie zhadvalisia hetyja epizody.

Vajskoŭcy paviedamili pra šantaž u śpiecsłužby. Z hetaha i pačałasia kryminalnaja sprava. U vyniku — zakryty praces, abvinavačańnie ŭ zdradzie dziaržavie i 17 hadoŭ źniavoleńnia.

Sprava Ciuchaja całkam zasakrečanaja. Pry hetym, dadaje pravaabaronca, u Ciuchaja šerah chraničnych chvarobaŭ, ale praz zasakrečanaść spravy navat miedycynskaja kartka niedastupnaja turemnaj administracyi. I heta, na jaho dumku, asobnaja prablema: niezaležna ad učynkaŭ, čałaviek maje prava na miedycynskuju dapamohu.

Jak Ciuchaja adsadzili ŭ kamiery

U turmie Ciuchaj apynuŭsia ŭ adnoj kamiery z Łabkovičam i jašče niekalkimi viaźniami.

Pavodle surazmoŭcy, maŭčać jon nie ŭmieŭ zusim. «Nie moh ni siekundy biez słova», — uspaminaje pravaabaronca.

«Jon šmat havaryŭ pra nibyta zmovu čynoŭnikaŭ suprać Łukašenki. Pavodle jaho viersii, u 2020‑m čynoŭniki «vyratavali režym», ale paśla hetaha ŭłada kančatkova pierajšła da siłavikoŭ. Asnoŭnaj aporaj stali ludzi ŭ pahonach, a roznyja čynoŭniki i ideałahičnyja supracoŭniki, maŭlaŭ, apynulisia adsunutymi na druhi płan. Im, jak jon ličyŭ, nie dali toj doli ŭpłyvu, jakuju jany zasłužyli. Ciuchaj śćviardžaŭ, što i sam trapiŭ pad pieraśled nibyta praz razmovy ŭ čynoŭnickich kołach, — kaža Uładzimir Łabkovič. — Ale što tam było praŭdaj, što chłuśnioj, ja nie viedaju. Jon vielmi ćmiany i mutny čałaviek, jaki lubiŭ vyhladać bolš značnym, čym byŭ nasamreč».

Pry hetym Ciuchaj, pavodle surazmoŭcy, padpisaŭ šmat abaviazacielstvaŭ pra nierazhałošvańnie, ale strymacca nie moh. U kamiery jon sam raskryvaŭ toje, što abiacaŭ trymać u tajamnicy. I adnačasova vielmi bajaŭsia. Najpierš — palitviaźniaŭ. Razumieŭ, što praź jahonyja danosy ludzi atrymali terminy.

«Jon peŭny čas byŭ u škłoŭskaj 17‑j kałonii, i ŭ susiednim atradzie byŭ čałaviek, jaki trapiŭ za kraty dziakujučy jamu», — kaža Łabkovič.

Status Ciuchaja ŭ kamiery źmianiŭsia paśla razmovy pra dziaciej. Pavodle Łabkoviča, Ciuchaj ahučyŭ ideju «zabirać dziaciej u palityčnych» i vychoŭvać ich u śpiecyjalnych łahierach, kab ź ich «vyrastali takija, jak jon».

Nibyta navat padrychtavaŭ prajekt zakona i źbiraŭsia jaho kudyści nakiroŭvać.

U turemnaj ijerarchii pahrozy dzieciam — biezumoŭnaje tabu. Kamiera pastanaviła: Ciuchaj «adsadžany». Jamu zabaranili siadzieć za ahulnym stałom, charčavacca z usimi, ź im pierastali razmaŭlać.

Kali ž pahroza zabrać dziaciej prahučała jašče raz, užo ŭ bok zvyčajnaha kryminalnaha źniavolenaha, kanflikt skončyŭsia chutka. «Ciuchaj prosta atrymaŭ u hałavu i lacieŭ praz usiu chatu ŭ adviedzieny kut», — kaža Łabkovič.

«Jon vielmi bajaŭsia, što palityčnyja buduć jamu pomścić. Ale ŭ vyniku atrymaŭ nie ad ich», — dadaje jon.

«Adsadžanaść» Ciuchaja ŭ kamiery — nie toje samaje, što «nizki status». Faktyčna jaho prosta ihnaravali ŭ kamiery, ale pry pierachodzie ŭ novuju kamieru jon moh nanoŭ vybudoŭvać kamunikacyju ź inšymi aryštantami na roŭnych. 

Viadomy piedafilski bekhraŭnd Ciuchaja. Tak, u 2013‑m žodzinskija łaŭcy piedafiłaŭ złavili jaho na žyŭca, kali viali pierapisku ad imia 15‑hadovaha chłopca, jaki zaprasiŭ funkcyjaniera BRSM na «haračuju noč». Pry sustrečy ŭ Ciuchaja pry sabie znajšli intymnuju zmazku i preziervatyvy. Zrešty, u turmie pra heta nichto nie viedaŭ. 

«I ja ciapier razumieju, čamu jon tak bajaŭsia za svajo minułaje, tamu što kali b heta ŭspłyło ŭ turmie, to jaho b prosta parvali na kavałki», — pierakanany Uładzimir Łabkovič. 

Vychavany ŭ varožaści

Maci Ciuchaja, pavodle Łabkoviča, nieadnarazova pryjazdžała ŭ turmu i damahałasia, kab syna nie kryŭdzili. Jana — fihura taksama adyjoznaja: pracavała ŭ prapahandysckich ŚMI, źviazanaja z Kamunistyčnaj partyjaj. Sam Ciuchaj časta zhadvaŭ jaje jak prykład i jak apraŭdańnie ŭłasnych pohladaŭ.

Jon raspaviadaŭ, što ŭ studzieni 1991 hoda jaho maci była ŭ Vilni jak savieckaja žurnalistka — u dni, kali litoŭcy baranili svaju niezaležnaść. I nibyta ŭsio žyćcio bajałasia, što jaje «schopiać litoŭskija nacyjanalisty». Hety strach, hetyja apoviedy pra varožy Zachad i zdradu, pavodle jahonych słoŭ, hučali ŭ ich domie ź dziacinstva.

«Jon vychavany ŭ hetaj nianaviści faktyčna z naradžeńnia», — kaža Łabkovič.

Ciuchaj z pafasam paŭtaraŭ pra ŭpłyŭ maci i jaje pryncypovaść. I adnačasova śćviardžaŭ: kali jana raptam «zdradzić režymu» ci adstupicca ad kamunistyčnych ideałaŭ, jon adračecca ad jaje biez vahańniaŭ.

«Jon fanatyk. U svaich pohladach — sapraŭdny fašyst», — reziumavaŭ Uładzimir Łabkovič.

• 0
• 0
• 0
• 0
• 0
• 0
• 0
• 0