Litva rychtujecca da mahčymaści zakryćcia miažy ź Biełaruśsiu praź mihrantaŭ
Ministr unutranych spraŭ Litvy Uładzisłaŭ Kandratovič paviedamiŭ, što rychtujecca šyroki pakiet źmianieńniaŭ u mihracyjnaj palitycy krainy. Siarod prapanavanych mier razhladajecca mahčymaść zakryćcia miažy ź Biełaruśsiu. Heta źviazana ź nieabchodnaściu padrychtoŭki da novych taktyk nielehalnych mihrantaŭ, jakija fiksujucca ŭ susiednich krainach.
Ministr unutranych spraŭ Litvy Uładzisłaŭ Kandratovič u intervju LRT zajaviŭ, što adna z hałoŭnych pahroz, jakija Litva maje na miažy, — heta instrumientalizavanaja mihracyja abo «ŭzbrojenaja» mihracyja.
Kandratovič adznačyŭ, što ŭ Polščy zafiksavanyja vypadki, kali nielehalnyja mihranty ŭžyvajuć hvałt suprać pamiežnikaŭ, kidajučy ŭ ich kamiani i vykarystoŭvajučy inšyja srodki. Choć u Litvie takich incydentaŭ pakul nie było, ministr padkreśliŭ važnaść padrychtoŭki da mahčymych pahroz i adaptacyi pravavoj bazy dla efiektyŭnaha reahavańnia na novyja vykliki.
«My bačym niekatoryja źmieny ŭ taktycy ŭ Polščy, ciapier jany pačali napadać na pamiežnikaŭ, kidać kamiani i vykarystoŭvać inšyja srodki. My bačym, što tyja zachady, jakija byli słušnyja paru hadoŭ tamu ci ŭ minułym hodzie, mohuć nie być słušnymi siońnia, tamu my pavinny ŭmieć adpaviedna reahavać, pierajmać lepšyja praktyki i analizavać situacyju ŭ inšych krainach. Aŭtamatyčna treba padrychtavać i našu pravavuju bazu. Vielmi važna, kab zakanadaŭčaja baza była adpaviednaj, kab my byli hatovyja da budučych pahroz», — skazaŭ jon.
Akramia taho, Litva analizuje praktyku Finlandyi i Polščy adnosna zakryćcia miežaŭ i abmiežavańnia pryjomu zajavak na prytułak. Heta moža stać častkaj stratehii pa supraćdziejańni vykarystańniu mihracyi jak elemienta hibrydnaj vajny. Ministr padkreśliŭ, što ŭsie mahčymyja miery buduć nakiravany na zabieśpiačeńnie biaśpieki krainy i jaje hramadzian.
Jak zaŭvažyła vydańnie Reform.news, mihranty znoŭ aktyvizavalisia pa ŭsioj hranicy Biełarusi i ES. Polskija pamiežniki za paniadziełak zarehistravali 90 sprobaŭ parušeńnia miažy. U polskija patruli na miažy znoŭ lacieli kamiani.
Na miažy Litvy i Łatvii kolkaść atak mihrantaŭ pavialičyłasia ŭ paraŭnańni z vychodnymi. Litoŭskija pahraničniki paviedamili ab 16 sprobach. Zvyčajna na litoŭskaj miažy fiksujucca adzinkavyja parušeńni.
Łatvijskaja słužba spravazdačyłasia ab 52 sprobach parušeńnia miažy.
Kamientary
[Zredahavana]