U vydaviectvie fondu «Kamunikat» u Biełastoku pabačyła śviet kniha «Janka Zaprudnik» ź sieryi «Ludzi emihracyi», zapačatkavanaj Biełaruskim Instytutam Navuki i Mastactva (BINiM) i Zhurtavańniem biełarusaŭ śvietu «Baćkaŭščyna» jašče ŭ Biełarusi ŭ 2018 hodzie. Układalniki knihi Natalla Hardzijenka, Nadzieja Zaprudnik, Valancina Tryhubovič i Lavon Jurevič, piša bellit.info.
U knizie čytač znojdzie jak materyjały pra Janku Zaprudnika: bijahrafičny narys, uspaminy dački Viery, siabroŭ i znajomych, hetak i jahonyja ŭłasnyja teksty. U raździele «Daśledavańni» pradstaŭlenyja niekatoryja častki z dysiertacyi Janki Zaprudnika i jahonyja daśledčyja artykuły. Častka «Skrypty» reprezientuje paasobnyja prykłady jahonaj žurnalisckaj dziejnaści na radyjo «Vyzvaleńnie / Svaboda», raździeł «Ese» — najbolš važnyja eseistyčnyja teksty historyka, tłumačać na staroncy BINiM.
Asobna ŭ knizie źmieščanyja vieršy, pryśviačeńni, epitafii, što vychodzili z-pad piara Siarhieja Jasienia (litaraturny psieŭdanim Janki Zaprudnika), a taksama interviju ź dziejačam. Šmat apaviadajuć pra samoha Janku Zaprudnika i jahonaje atačeńnie dziońnik padarožža ŭ ZŠA ŭ 1953 hodzie i raznastajnyja ŭspaminy samoha hieroja knihi. Asabliva bahaty raździeł — epistalaryi, jaki składaje listavańnie z prezidentam BNR Mikołam Abramčykam, litaraturaznaŭcam i historykam Antonam Adamovičam, siabrami, svajakami i znajomymi jak u Biełarusi, hetak i ŭ emihracyi.
Admysłova dla hetaj knihi było zapisanaje ŭžo paśla śmierci Janki Zaprudnika intervju ź jahonaj žonkaj spadaryniaj Nadziejaj. Zaviaršaje knihu abjomistaja biblijahrafija historyka j žurnalista.
Janka Zaprudnik (1926—2022) — historyk, žurnalist, vydaviec, viedamy dziejač biełaruskaj dyjaspary ŭ ZŠA. Paśla zakančeńnia apynuŭsia ŭ biełaruskim łahiery DP u Rehiensburhu, dzie vučyŭsia ŭ Biełaruskaj himnazii imia Janki Kupały i atrymaŭ atestat ab siaredniaj adukacyi. Aktyŭna ŭdzielničaŭ u biełaruskim skaŭtynhu, pačaŭ zajmacca litaraturnaj tvorčaściu.
U 1948 hodzie razam z 12 siabrami vyjechaŭ u Vialikabrytaniju. Pracavaŭ u vuhalnych kapalniach i adnačasova ŭdzielničaŭ u vydańni moładzievaha časopisu «Napierad!». Byŭ siabram Zhurtavańnia biełarusaŭ u Vialikaj Brytanii, a taksama Zhurtavańnia biełaruskich kambatantaŭ. Udzielničaŭ u Biełaruskim chryścijanskim akademičnym abjadnańni «Žyćcio». U 1950 hodzie Janka Zaprudnik vyjechaŭ na navučańnie ŭ Bielhiju, dzie ŭ 1954 hodzie skončyŭ histaryčny fakultet Luvienskaha ŭniviersitetu i adrazu skiravaŭsia ŭ Niamieččynu. U 1954—1957 hh. jon byŭ supracoŭnikam u biełaruskaj redakcyi radyjo «Vyzvaleńnie» ŭ Miunchienie, a taksama ŭdzielničaŭ u vydańni haziety «Baćkaŭščyna».
U 1957 hodzie Janka Zaprudnik pryjechaŭ ź siamjoj u ZŠA. Da 1991 pracavaŭ u Ńju-jorskaj biełaruskaj redakcyi radyjo «Vyzvaleńnie» («Svaboda»). U 1969 hodzie ŭ Kałumbijskim univiersitecie (Ńju-Jork) abaraniŭ doktarskuju dysertacyju «Palityčnaja baraćba za Biełaruś u carskich Dziaržaŭnych dumach (1906—1917)». U 1967—1975 hadach čytaŭ kurs historyi Biełarusi ŭ Kuinz-kaledžy Ńju-Jorskaha ŭniviersiteta, a taksama Kałumbijskim universitecie. U 1980—1995 hadach byŭ hałoŭnym redaktaram haziety «Biełarus».
Z pačatku 1990-ch Janka Zaprudnik pačaŭ naładžvać suviazi ź Biełaruśsiu, časta jaje naviedvaŭ. Jon byŭ adnym z zasnavalnikaŭ i siabram Vialikaj rady Zhurtavańnia biełarusaŭ śvietu «Baćkaŭščyna», siabram Biełaruskaha PEN-Centru. Razam z druhoj žonkaj Nadziejaj šmat finansava padtrymoŭvaŭ cerkvy, ustanovy i arhanizacyi, a taksama kankretnych asobaŭ u Biełarusi.
Kamientary