Jak Rasija, Kitaj i Iran sprabujuć upłyvać na prezidenckija vybary ŭ ZŠA

Jak piša The New York Times, pastajannaj pahrozaj dla ZŠA stała dezinfarmacyja, jakuju raspaŭsiudžvajuć Rasija, Kitaj i Iran. Hetyja krainy pastajanna ŭdaskanalvajuć svaju taktyku ŭpłyvu na hramadstva, što moža mieć vializnyja nastupstvy dla prezidenckich vybaraŭ. Pry hetym, kali Rasija robić staŭku na Donalda Trampa, to Iran addaje pieravahu Kamale Charys. Kitaj, pa ŭsioj vierahodnaści, nie padtrymlivaje ni adzin z bakoŭ.

Rasija i Iran dziejničajuć u ZŠA suprać adzin adnaho. Pra heta śviedčać sakretnyja dakumienty

Ale ŭ ich ahulnaja meta — siejać razład i chaos, kab padarvać davier da amierykanskaj demakratyi ŭ vačach suśvietnaj supolnaści. Kampanii dezinfarmacyi źmianilisia.

Novaja dezinfarmacyja, jakaja raspaŭsiudžvajecca Rasijaj, Kitajem i Iranam, nakiravana nie tolki na štaty, jakija vahajucca, ale i na kankretnyja rajony ŭnutry ich, a taksama na peŭnyja etničnyja i relihijnyja hrupy.

Daśledčyki, jakija vyvučali novyja kampanii ŭpłyvu, adznačajuć, što pośpiech raspaŭsiudžvańnia dezinfarmacyi zaležyć ad taho, nakolki jana metanakiravana na peŭnuju aŭdytoryju.

Tak, Iran stvaryŭ veb-sajt pad nazvaj «Nie naša vajna», nakiravany na amierykanskich vajskovych vieteranaŭ. Na im artykuły ab adsutnaści padtrymki vajennasłužačych susiedničajuć z antyamierykanskimi vykazvańniami i teoryjami zmovy. Jašče adzin sajt — Afro Majority — nakiravany na pryciahnieńnie ŭvahi ciemnaskuraha nasielnictva Amieryki. A sajt Savannah Time — na kansiervatyŭnych vybarščykaŭ u štacie Džordžyja. Na amierykancaŭ arabskaha pachodžańnia ŭ pryharadzie Detrojta ŭ jašče adnym važnym štacie Mičyhan, jaki adnosicca da tych, chto vahajecca, aryjentavany sajt Westland Sun.

Pa nazirańniach arhanizacyi Logically, jakaja adsočvaje dezinfarmacyju ŭ internecie, Kitaj i Rasija prytrymlivajucca padobnaj taktyki ŭ svaich infarmacyjnych apieracyjach. U hetym hodzie na płatformie X kitajskija dziaržaŭnyja ŚMI raspaŭsiudžvali łžyvyja naratyvy na ispanskaj movie, jakija tyčacca Viarchoŭnaha suda ZŠA, jakimi zatym ispanamoŭnyja karystalniki dzialilisia ŭ Facebook i YouTube.

Pavialičyć

Ekśpierty pa kitajskaj dezinfarmacyi adznačajuć, što padroblenyja akaŭnty ŭ sacyjalnych sietkach, źviazanyja z Kitajem, stali bolš pierakanaŭčymi i pryvabnymi. Ciapier jany vykarystoŭvajuć novyja taktyki, jakaja robiać ich vyhlad bolš aŭtentyčnym, a ich stvaralnikaŭ vydajuć za amierykancaŭ.

U apošnija tydni, pavodle spravazdačy Centra analizu pahroz Microsoft, fejkavyja akaŭnty, źviazanyja z kitajskaj kampanijaj Spamouflage, pačali metanakiravana atakavać respublikancaŭ u Pałacie pradstaŭnikoŭ i Sienacie, jakija imknucca da pieravybrańnia ŭ štatach Ałabama, Tenesi i Techas.

Jak adznačajuć śpiecyjalisty, apošnija dasiahnieńni ŭ halinie štučnaha intelektu značna palepšyli mahčymaści dezinfarmacyjnych kampanij, dazvalajučy dziaržaŭnym ahientam bolš pa-majstersku i efiektyŭna stvarać i raspaŭsiudžvać svaje paviedamleńni.

Kampanija OpenAI paviedamiła, što z červienia pa vierasień praduchiliła bolš za 20 zamiežnych apieracyj, jakija vykarystoŭvali jaje pradukty. Jany ŭklučali namahańni Rasii, Kitaja, Irana i inšych krain pa stvareńni i napaŭnieńni veb-sajtaŭ i raspaŭsiudžańni prapahandy abo dezinfarmacyi ŭ sacyjalnych sietkach, a taksama analizu i adkazu na kankretnyja zapyty.

Kitaj taksama aktyŭna vykarystoŭvaje ŭsio bolš prasunuty nabor instrumientaŭ dla viadzieńnia infarmacyjnych kampanij, u tym liku aŭdyjafajły, apracavanyja z dapamohaj štučnaha intelektu, taksičnyja miemy i falšyvyja apytańni vybarščykaŭ ab hałasavańni.

Usie try krainy taksama ŭdaskanalvajuć zdolnaści zamiatać ślady. Novyja taktyki ŭskładniajuć uradavym ahienctvam i technałahičnym kampanijam vyjaŭleńnie i praduchileńnie dezinfarmacyjnych kampanij, što, u svaju čarhu, padachvočvaje inšyja varožyja ZŠA dziaržavy dziejničać anałahičnym čynam.

U toj ža čas, jak adznačaje vydańnie, rostu zamiežnaj dezinfarmacyi sadziejničaje toj fakt, što takija hihanty, jak Meta, Google, OpenAI i Microsoft, z momantu apošnich prezidenckich vybaraŭ skaracili namahańni pa markiroŭcy i vydaleńni dezinfarmacyi, a niekatoryja kampanii naohuł nie majuć kamand, jakija zajmajucca hetaj prablemaj.

Adsutnaść uzhodnienaj palityki siarod technałahičnych kampanij nie dazvalaje stvaryć adziny front suprać zamiežnaj dezinfarmacyi, što robić ličbavyja płatformy mienš abaronienymi, piša The New York Times.

• 1
• 0
• 0
• 1
• 0
• 0
• 0
• 1