Nie Zachad, a Kitaj ujaŭlaje saboj siońnia najbolšuju pahrozu ekanomicy Rasii. I pryčyna tut — sonca i viecier

Jak piša Bloomberg, u minułym hodzie kitajskija vytvorcy vietranych turbin daminavali na suśvietnym rynku pastavak, skarystaŭšysia bumam ustanoŭki adnaŭlalnych krynic enierhii ŭnutry krainy, u toj čas jak spad u ZŠA i kvoły rost u Jeŭropie padarvali zamiežnych kankurentaŭ.

Pavodle spravazdačy BloombergNEF, apublikavanaj na hetym tydni, čatyrma ź piaci najbujniejšych vytvorcaŭ vietravych turbin u 2023 hodzie byli kitajskija kampanii. Hod tamu ŭ piaciorcy lidaraŭ takich było tolki dźvie.

U minułym hodzie na dolu Kitaja pryjšłosia kala dźviuch tracin usiaho suśvietnaha pryrostu mahutnaściaŭ vietravych elektrastancyj. Viadučymi suśvietnymi pastaŭščykami turbin byli kitajskija kampanii Goldwind i Envision.

Niahledziačy na rost prodažaŭ za miažoj, kitajskija vytvorcy pa-raniejšamu 98% svajoj pradukcyi pradajuć na ŭnutranym rynku. U toj ža čas kolkaść novych vietraŭstanovak u ZŠA ŭ 2023 hodzie była na samym nizkim z 2017 hoda ŭzroŭni.

Rost rynku vietraenierhietyki ŭ Kitai ŭ minułym hodzie chavaje tryvožnuju tendencyju: pryrost novych kampanij u inšych rehijonach skłaŭ usiaho 8%.

Kitaj vałodaje najbujniejšym i najbolš kankurentnym rynkam vietraenierhietyki, na jakim pracuje bolš za 12 ajčynnych vytvorcaŭ. U minułym hodzie mahutnaść vietraenierhietyki ŭ Kitai vyrasła až na 58%.

Choć kolkaść ustanovak raście, miascovyja vietraenierhietyčnyja kampanii sutykajucca sa źnižeńniem prybytku, bo ŭzmacnieńnie kankurencyi pryvodzić da źnižeńnia cenaŭ. Pa danych BloombergNEF, siarednija ceny na naziemnyja turbiny ŭ Kitai dasiahnuli rekordna nizkaha ŭzroŭniu ŭ druhoj pałovie minułaha hoda, i rentabielnaść vytvorcaŭ, imavierna, zastaniecca pad pytańniem u 2024 hodzie.

Adpaviedna infarmacyi vydańnia South China Morning Post, košt ustanoŭki turbin źniziŭsia amal na 45 %.

Žorstkaja kankurencyja zaachvociła šmatlikich vytvorcaŭ pašyrać svaju dziejnaść za miažoj. Pavodle spravazdačy BloombergNEF, košt kitajskich vietranych turbin, jakija pastaŭlajucca za miežy krainy, prykładna na piatuju častku nižejšy, čym u ich amierykanskich i jeŭrapiejskich kankurentaŭ.

Jak piša Bloomberg, rost mahutnaściaŭ vietraenierhietyki źjaŭlajecca častkaj bolš šyrokaha bumu «zialonaj enierhietyki» ŭ Kitai. Tak, kraina dadała za minuły hod amal 217 hihavat mahutnaściaŭ soniečnaj enierhii, što ŭ 2,5 razu bolej, čym u 2022 hodzie. I heta bolš, čym uvieś astatni śviet razam uziaty. Dla paraŭnańnia: mahutnaść usiaho parku soniečnych batarej ZŠA składaje siońnia ŭsiaho kala 210 hihavat.

Choć mnohija inšyja krainy akurat taksama davoli aktyŭnyja ŭ hetym kirunku. Dola soniečnaj enierhii ŭ ahulnaj vytvorčaści ŭ Aŭstralii, Ispanii, Čyli, Hiermanii, Niderłandach, Hrecyi, Vjetnamie vyšejšaja, čym u Kitai, jany iduć napieradzie.

Jak i ŭ vypadku ź vietravymi turbinami, Kitaj źjaŭlajecca vytvorcam samych tannych soniečnych modulaŭ u śviecie.

Pa acenkach za śniežań 2023 hoda ŭdzielny košt soniečnaha modula składaŭ 0,15 dołara za kiłavat-hadzinu atrymanaj enierhii, źniziŭšysia na 42%. Heta nastolki nizki pakazčyk, što nichto ŭ śviecie nie moža skłaści kankurencyju kitajskim vytvorcam.

Jak piša Euronews, jeŭrapiejskaja soniečnaja industryja papiaredžvaje, što jana sutykajecca z «ekzistencyjalnaj pahrozaj» i što, kali nie pryniać miery ŭ najbližejšy čas, jana moža abvalicca na praciahu niekalkich miesiacaŭ. Soniečny modul, vyrableny ŭ Kitai, prykładna na 50% tańniejšy za jeŭrapiejski anałah. Jakaść, havorać śpiecyjalisty, tym nie mienš, paraŭnalnaja.

Vysnova z usiaho hetaha paradaksalnaja. Nie Zachad, a Kitaj ujaŭlaje saboj siońnia najbolšuju pahrozu ekanomicy Rasii, jakaja hruntujecca na dachodach ad nafty i hazu. Jak tolki śviet zbolšaha ažyćciavić pierachod ad vuhlevadarodaŭ da soniečnaj enierhii, Rasija zastaniecca bieź ciapierašniaj asnoŭnaj krynicy svaich dachodaŭ, a pierabudavacca budzie niaprosta, asabliva va ŭmovach kanfliktu z Zachadam. 

U toj ža čas dla Kitaja asvajeńnie novych krynic enierhii — heta naturalnaja tendencyja. U Kitaja svaich nafty i hazu krajnie mała, jon ich impartuje. Napeŭna, dasiahnieńnie Kitajem enierhaniezaležnaści ŭ budučyni moža zrabić jaho i bolš ahresiŭnym: ciapier jon usio ž nie kantraluje marskich šlachoŭ pastavak, što mocna strymlivaje jaho ŭ pytańni taho ž Tajvania. 

Jak by ni było, rost soniečnaj i vietraenierhietyki niepaźbiežna źmienić raniejšy raskład siłaŭ na płaniecie.

Čytajcie jašče:

Kitaj abvinavacili ŭ maštabnym uzłomie, «jaki zakranuŭ miljony ludziej». Što viadoma?

Kitaj płanuje pabudavać hihanckuju elektramahnitnuju harmatu dla zapusku astranaŭtaŭ u kosmas

Kitajskija navukoŭcy znajšli sposab, jak ścisnuć data-centr da pamieraŭ DVD-dyska

Śviet čakaje druhi «kitajski šok» z napłyvam tannych tavaraŭ

• 46
• 0
• 2
• 2
• 8
• 3
• 7
• 0