Kitaj płanuje pabudavać hihanckuju elektramahnitnuju harmatu dla zapusku astranaŭtaŭ u kosmas

Jak paviedamlaje South China Morning Post, kitajskija navukoŭcy pracujuć nad stvareńniem hihanckaj elektramahnitnaj rejkavaj harmaty, jakaja budzie vykarystoŭvacca dla zapusku ŭ kosmas hipierhukavych samalotaŭ. Prajekt viadziecca z 2016 hoda, i ciapier pačalisia pieršyja vyprabavańni.

Rejkavaja harmata, pa sutnaści, budzie ŭjaŭlać saboj hihanckuju elektramahnitnuju startavuju trasu dla paskareńnia hipierhukavoha samalotu vahoj u 50 ton da chutkaści ŭ 1,6 Macha. Zatym samalot adarviecca ad trasy, zapuścić ruchavik, dadatkova razhonicca i ŭvojdzie ŭ kosmas z chutkaściu, jakaja ŭ siem razoŭ pieravyšaje chutkaść huku.

Kali b dla ŭźlotu patrabavałasia ŭłasnaja mahutnaść samalota, spatrebiłasia b vializnaja kolkaść paliva. A dla harantavańnia biaśpieki pry ŭźlocie na nizkaj chutkaści navukoŭcam i inžynieram pryjšłosia pajści na kampramisy ŭ aeradynamičnym dyzajnie i kampanoŭcy ruchavikoŭ, jakija ŭpłyvajuć na efiektyŭnaść palotu na vysokich chutkaściach.

Kitajskija navukoŭcy śćviardžajuć, što znajšli sposaby pieraadoleńnia prablem efiektyŭnaści vysakachutkasnych palotaŭ z dapamohaj technałohii elektramahnitnaha zapusku.

Miarkujecca, što vyviadzieńnie kiłahrama hruzu na arbitu z dapamohaj rejkavaj harmaty abydziecca ŭ $60. Dla paraŭnańnia: šmatrazovyja rakiety kampanii SpaceX vyvodziać hruzy na arbitu pa canie prykładna ŭ $3000 za kiłahram.

Vyprabavańni buduć pravodzicca na linii nizkavakuumnaj truby daŭžynioj prykładna 2 kiłamietry na abjekcie ŭ kitajskaj pravincyi Šańsi, jakaja zvyčajna vykarystoŭvajecca pry daśledavańni technałohii ciahnikoŭ na mahnitnaj padviescy (mahleŭ). Hetaja ŭstanoŭka ŭžo siońnia moža razahnać ciažki abjekt da chutkaści, jakaja nabližajecca da 1000 km/h. U najbližejšyja hady płanujuć pavialičyć daŭžyniu hetaha palihona da 60 kiłamietraŭ, kab dasiahnuć maksimalnaj pracoŭnaj chutkaści ŭ 5000 km/h.

Jak paviedamlajecca, Kitaj nie pieršaja kraina, jakaja imkniecca realizavać elektramahnitnuju sistemu kaśmičnaha zapusku. U 1990-ja hady padobnuju sprobu zrabiła NASA, adnak prajekt nie byŭ realizavany z-za techničnych ciažkaściaŭ i niedachopu srodkaŭ.

U svaju čarhu Kitaj praciahvaje ździajśniać praryvy ŭ daśledavańniach elektramahnitnych rejkavych harmat dziakujučy svaim vysokapradukcyjnym krynicam siłkavańnia, technałohijam dakładnaha kiravańnia i raspracoŭcy elektronnych pryład, zdolnych supraćstajać mocnym elektramahnitnym pieraškodam.

Čytajcie jašče:

U Kitai praviali vyprabavańnie ciahnika, jaki abiacaje być chutčejšym za samalot

Kampanija Iłana Maska znoŭ straciła kaśmičny karabiel Starship u vyprabavalnym palocie. Heta ŭžo treci raz

U Dubai adbuducca honki ŭ reaktyŭnych kaściumach. Što za jany?

• 10
• 0
• 4
• 3
• 5
• 4
• 3
• 0