Kitajskija navukoŭcy znajšli sposab, jak ścisnuć data-centr da pamieraŭ DVD-dyska
Kitajskija navukoŭcy zmahli stvaryć DVD-dysk jomistaściu 1,6 pietabajt, što prykładna ŭ 24 razy bolš za abjom sučasnych ćviordych dyskaŭ. U čym sutnaść technałohii?
Pra svajo adkryćcio navukoŭcy z Šanchajskaha ŭniviersiteta navuki i technałohij raskazali ŭ časopisie Nature.
Jak adznačajecca ŭ artykule, sučasnyja centry apracoŭki danych zasnavanyja na takich technałohijach, jak paŭpravadnikovyja fłeš-pryłady i ćviordyja dyski, majuć vysokija vydatki enierhii i apieracyjnyja vydatki, a taksama karotki termin słužby.
Šmatabiacalnym rašeńniem dla efiektyŭnaha doŭhaterminovaha archiŭnaha zachoŭvańnia danych moža stać aptyčnaje zachoŭvańnie danych (ODS). Doŭhi čas ličyłasia, što jano abmiažoŭvajecca nizkaj jomistaściu i składanaściu pavieličeńnia ščylnaści zapisu.
Ale kitajskija vučonyja znajšli sposab, jak vyrašyć prablemu. Jany stvaryli zusim novy materyjał dla plonki aptyčnaha dyska. Hety materyjał, nazvany AIE-DDPR, vykarystoŭvaje śpiecyjalizavanyja fotaadčuvalnyja malekuły, zdolnyja pahłynać fatonnyja danyja na nanaŭzroŭni. Zatym jany kadujucca z dapamohaj dvuchpramianiovaha łaziera. Dziakujučy svajoj prazrystaści, AIE-DDPR možna skarystoŭvać płast za płastom na aptyčnym dysku biez paharšeńnia danych u cełym.
Pa sutnaści, novaja technałohija stvaraje trochmiernuju «skrynku» dla ličbavaj infarmacyi, tym samym ekspanientna pavialičvajučy jomistaść dyska narmalnaha pamieru.
Vykarystoŭvajučy 54-nanamietrovy łazier, kamanda vučonych zmahła zapisać 100 płastoŭ danych na aptyčny dysk. Pryčym kožny ŭzrovień padzieleny ŭsiaho na 1 mikramietr.
Kančatkovym vynikam zjaŭlajecca aptyčny dysk z trochmiernym stekam (mahazinam) płastoŭ danych, zdolny zachoŭvać kałasalny 1,6 pietabajt (Pb) infarmacyi (1 pietabajt roŭny 1024 terabajtam danych).
Dla paraŭnańnia, kab zakadavać taki ž abjom danych na ćviordych dyskach (HDD), nam spatrebicca stos dyskaŭ vyšynioj kala 2 mietraŭ.
Kamanda daśledčykaŭ upeŭnienaja, što hetaja technałohija moža stvaryć data-centr maštabu eksabit (1024 pietabajta) u nievialikim pakoi, zamiest stadyjonapadobnaha kompleksu, jaki vykarystoŭvajuć ciapier technałahičnyja kampanii.
Bolš važna toje, što novyja pryłady dla zachoŭvańnia danych nie buduć vykarystoŭvać elektryčnaść, kali danyja niedastupnyja. Taksama budzie źmienšanaja kolkaść elektraenierhii, nieabchodnaja dla pracy schovišča. Sučasnyja centry apracoŭki danych hienierujuć vialikuju kolkaść ciapła, i dla ich astudžeńnia vykarystoŭvajecca značnaja častka enierhii, jakaja budzie aščadžacca pa miery raźvićcia centraŭ apracoŭki danych.
Čakajucca i značnyja ekanamičnyja vyhady. Pa miery palapšeńnia technałohij zachoŭvańnia danych technałahičnyja kampanii pieranosiać danyja na novyja pryłady kožnyja try ci dziesiać hadoŭ. Čakajecca, što centry apracoŭki danych na asnovie ODS prasłužać 50-100 hadoŭ bieź nieabchodnaści abnaŭleńnia.
Daśledčyki ciapier pracujuć nad źnižeńniem koštu vytvorčaści hetych pryład, kab jany mahli być chutka dastupnyja dla kamiercyjnaha vykarystańnia.
Čytajcie jašče:
U Kitai stvaryli kłon ukrainskaj błohierki, jaki pradaje rasijskija tavary
Kampanija Maska ŭpieršyniu ŭžyviła mikračyp u mozh čałavieku
«Sastarełaja technałohija». Kitaj pryznaŭ nieefiektyŭnymi hipierhukavyja «cuda-rakiety» Pucina
Kamientary