Pamior biznesoviec i miecenat Siarhiej Zylkoŭ. Jon padtrymlivaŭ biełaruskija inicyjatyvy
Siarhiej Zylkoŭ pražyŭ 84 hady. Jon byŭ paśpiachovym pradprymalnikam i sponsaram biełaruskich inicyjatyŭ.
Pra śmierć Siarhieja Zylkova stała viadoma z dopisu ŭ fejbuku barda Viktara Šałkieviča.
«Pamior Siarhiej Paŭłavič Zylkoŭ… Fajny čałaviek, siabra, sponsar, miecenat. Patryjot ź vialikaj litary! Zusim jašče niadaŭna sustrakalisia, padymali čarki, śpiavali pieśni pra Piarespu, na jakoj muzyka hraje, i pra saksafanista Siarožu», — napisaŭ muzyka.
Naradziŭsia Siarhiej Zylkoŭ 2 studzienia 1939 hodu na Mahiloŭščynie: u vioscy Bierazietnia Mścisłaŭskaha rajona. Bolšaja častka jaho žyćcia źviazanaja z Hrodzienščynaj. Tut jon šmat hadoŭ kiravaŭ pradpryjemstvam «Śvidravina», jakoje i zasnavaŭ.
Hetaja arhanizacyja budavała Hrodzienskuju HES na Niomanie i Połackuju HES na Dźvinie. Udzielničała va ŭźviadzieńni Biełaruskaj AES. Było bahata inšych abjektaŭ pa ŭsioj Biełarusi. Siarhiej Zylkoŭ chacieŭ zaviazać partniorskija adnosiny z polskimi pradpryjemstvami susiedniaha Padlašša.
Siarhiej Zylkoŭ byŭ miecenatam biełaruščyny.
Padtrymlivaŭ Tavarystva biełaruskaj movy i nabyvaŭ padarunki da Dnia rodnaj movy hadavancam biełaruskamoŭnych hrup u sadkach i vučniam biełaruskamoŭnych kłasaŭ. Finansavaŭ vydańnie knih pa biełaruskaj historyi.
Pradpryjemstva Zylkova ŭ 2015 hodzie vyrabiła pamiatny znak na mahiłu paŭstancaŭ-kalinoŭcaŭ blizu vioski Kadyš. Jany zahinuli ŭ bai z rasijskimi vojskami ŭ 1863 hodzie.
Inicyjataram adnaŭleńnia miemaryjała byŭ Siarhiej Zylkoŭ. Jon vypadkova natrapiŭ na nachileny kryž i kamień z nadpisam pra zahinułych paŭstancaŭ. Dziakujučy namahańniam Zylkova pachavańnie było ŭzakonienaje.
Kavali «Śvidraviny» vyrabili hierb Stefana Batoryja i inšyja elemienty dla Staroha zamka ŭ Hrodnie. Jany ž rabili aharodžu, bramu dla pałaca ŭ Śviacku.
Siarhiej Paŭłavič Zylkoŭ pamior 18 žniŭnia. Pachavali jaho na hrodzienskich mohiłkach «Aŭls» 20 žniŭnia.
«Naša Niva» — bastyjon biełaruščyny
PADTRYMAĆHladzicie taksama:
U Hrodnie sotni ludziej pryjšli raźvitacca ź Siamionam Domašam
Mastačka z Kareličaŭ vyšyła ŭnikalnuju mapu Hrodzienskaj vobłaści
Marzaluk: Vilnia — horad našaj mary. Kalinoŭski musić zastacca tam
Kamientary