Meta zapuskaje novy servis Threads — niepasrednaha kankurenta Twitter. Zapusk užo zaŭtra
«Tekstavaja mabilnaja prahrama dla kamunikacyj» pad nazvaj Threads užo dastupnaja dla pieradzamovy ŭ Apple App Store, adnak spampavać jaje možna budzie nie raniej za čaćvier.
Kampanija Facebook Meta zapuskaje novy servis na bazie Instagram, jaki vielmi nahadvaje pa funkcyjanale Twitter i pavinien skłaści jamu niepasrednuju kankurencyju, jak piša Bi-bi-si.
«Tekstavaja mabilnaja prahrama dla kamunikacyj» pad nazvaj Threads užo dastupnaja dla pieradzamovy ŭ Apple App Store, adnak spampavać jaje možna budzie nie raniej za čaćvier.
U apisańni servisu pakazvajecca, što Threads — heta płatforma, «dzie ludzi źbirajucca razam, kab abmierkavać usio zapar: ad taho, što ich chvaluje siońnia, da taho, što budzie ŭ trendzie zaŭtra».
Miarkujučy pa apublikavanych skrynšotach, karystalniki Threads zmohuć publikavać karotkija tekstavyja paviedamleńni, jakija, jak i ŭ Twitter, možna budzie łajkać, kamientavać abo dzialicca imi sa svaimi čytačami.
Sam Twitter pieražyvaje aktyŭny adtok karystalnikaŭ paśla jaho kupli miljarderam Iłanam Maskam, jaki skaraciŭ amal pałovu supracoŭnikaŭ kampanii i pačaŭ zrazać u pravach uładalnikaŭ biaspłatnych akaŭntaŭ, sprabujučy prymusić ich padpisacca na płatnuju viersiju servisu Twitter Blue.
Apošnim takim krokam stała ŭ subotu abmiežavańnie kolkaści tvitaŭ, dastupnych dla prahladu ź biaspłatnych akaŭntaŭ. Papularnaja panel TweetDeck usio jašče dastupnaja ŭsim karystalnikam tvitara, ale Mask užo paabiacaŭ, što praz 30 dzion płatnaj stanie i jana.
Miarkujučy pa apublikavanych skrynšotach novaj mabilnaj prahramy Threads, servis budzie całkam biaspłatnym i bieź jakich-niebudź abmiežavańniaŭ na kolkaść dastupnych dla prahladu paviedamleńniaŭ.
U apošnija niekalki hadoŭ zapuścili niekalki mabilnych prahram, što vielmi nahadvajuć Twitter. Samyja viadomyja ź ich — Mastodon i Bluesky, adnak navat jany mocna sastupajuć jamu pa papularnaści.
U svaju čarhu Meta taksama nie pieršy raz zapazyčvaje ŭ kankurentaŭ papularnyja idei. Naprykład, funkcyja paviedamleńniaŭ, jakija źnikajuć praz 24 hadziny, (bolš viadomaja jak «storyz») upieršyniu źjaviłasia na płatformie Snapchat.
Adnak u 2016 hodzie jaje skapijavali spačatku raspracoŭščyki Instagram, a zatym i Facebook, i na siońnia hety farmat najbolš papularny mienavita ŭ prahramach Meta.
Miarkujučy pa apošniaj spravazdačy, u pieršym kvartale hoda sukupnaja štodzionnaja aŭdytoryja ŭsich troch płatform Meta — Facebook, Instagram i WhatsApp — składała bolš za 3 miljardy čałaviek.
Ciapier čytajuć
Cichanoŭski raskazaŭ, što treba było rabić u žniŭni 2020-ha21
Kamientary