U Hrodnie žyły kompleks nazavuć u honar karalevy Bony

Konkurs na nazvu novaha žyłoha kompleksu na Mahistralnaj bresckaja firma PObudowa («Paleśsiežyłbud») abviaščała ŭ svaim telehram-kanale. Udzielniku, čyju nazvu abiaruć, abiacali padaryć dyzajn-prajekt luboha pamiaškańnia.

Siarod prapanavanych padpisantami varyjantaŭ byli imiony histaryčnych asob, źviazanych z Hrodna, ŽK «Buharok», «Mahistr» i padobnyja — pavodle nazvy vulicy, a taksama «stanoŭčyja pryhožyja słovy» (tak akreśliła ich adna z aŭtarak) kštałtu «Abrykos», «Maldzivy» i «Prestyž».

Zabudoŭca spyniŭsia na varyjancie «Bona». «Tym samym my źviartajem uvahu na važnuju histaryčnuju asobu, jakaja kardynalna paŭpłyvała na raźvićcio Hrodna», — prakamientavaŭ  svoj vybar zabudoŭščyk. 

Cahlany 10-paviarchovy dom z histaryčnaj nazvaj budzie składacca ź dźviuch sumiežnych siekcyj, jakija ŭtvorać zakrytuju dvarovuju prastoru. U im budzie try padjezdy, a častka kvater budzie sa svabodnaj płaniroŭkaj. U kałarystycy, raźmiaščeńni voknaŭ i siłuecie budynka architektary sprabavali pieraasensavać architekturnuju spadčynu Hrodzienskaj vobłaści: Mirski zamak, carkvu ŭ Muravancy, Stary zamak u Hrodnie.

Pavialičyć

Budaŭnictva płanujuć pačać letam 2023 hoda i zaviaršyć u 2024-m.

Što Bona Sforca značyć dla Hrodna

Dačka miłanskaha hiercaha Bona Sforca stała žonkaj karala polskaha i vialikaha kniazia litoŭskaha Žyhimonta I u 1518 hodzie. Pry jaje padtrymcy byŭ vydadzieny pieršy Statut VKŁ, budavalisia škoły, chramy, špitali, pravodzilisia reformy.

Bona Sforca nabyła ŭ Juryja Radziviła Hrodzienskaje starostva. Jana pryviezła siudy nieviadomyja raniej harodninu i sadavinu, ustalavała zvyčaj jeści videlcam i trymać pakajovych ptušak, stała zakanadaŭcaj mody.

U Hrodnie na jaje zahad zabrukavali vulicy i handlovuju płošču, horad atrymaŭ vodapravod i dźvie haradskija piačatki: asobnuju handlovuju i ŭradavuju z vyjavaj alenia śviatoha Hubierta.

Z časoŭ Bony pachodzić pieršaja zhadka pra znakamity haradski ratušny hadzińnik, dla absłuhoŭvańnia jakoha ŭ 1541 hodzie Bona zahadała ŭziać na słužbu śpiecyjalnaha majstra. Taksama Bona fundavała hrošy i na Faru Vitaŭta i prafinansavała sa skarbu stvareńnie ŭ Hrodnie pieršaha špitala pry klaštary i kaściole Śviatoha Ducha na sučasnaj Savieckaj vulicy. Budynak staić tam dahetul.

U 2019 hodzie hrodziency stvaryli pietycyju ab ušanavańni karalevy Bony ŭ haradskoj prastory. Haradskija ŭłady zhadzilisia, što heta važna, dadali Bonu Sforca ŭ admysłovy śpis, ale pryznali, što hrošaj na ŭstalavańnie ŭ Hrodnie šyldy ci pomnika pakul niama.

• 15
• 0
• 0
• 2
• 1
• 1
• 2
• 0