Mietały, bakteryi i reštki płastyku. Voś čamu lepiej nie pić vady ŭ butelkach
Płastykavyja butelki, u jakich pradajuć pitnuju vadu, mohuć być niebiaśpiečnymi dla našaha zdaroŭja. Pračytajcie, što pra heta kažuć ekśpierty.
U butelkach dla pitnoj vady mohuć znachodzicca patencyjna škodnyja rečyvy
Ftałaty — štučnyja chimičnyja rečyvy, jakija vykarystoŭvajuć, kab zrabić butelki z vadoj i inšyja płastyki bolš tryvałymi i hnutkimi. Ekśpierty časta vystupajuć suprać vykarystańnia ftałataŭ, bo jany ŭpłyvajuć na endakrynnuju sistemu, piša Huffpost.
Zhodna ź niekatorymi daśledavańniami, sami pa sabie butelki dla vady nie źmiaščajuć dastatkova brudnych rečyvaŭ, kab nanieści škodu ludziam. Tym nie mienš, častka ekśpiertaŭ ličyć, što pakolki my i tak rehularna sutykajemsia z rečyvami, jakija škodziać endakrynnaj sistemie, było b razumna pa mahčymaści abmiežavać ich vykarystańnie.
Takija rečyvy źviazvajuć z mnostvam repraduktyŭnych, imunnych i nieŭrałahičnych chvarobaŭ. Siarod ich prablemy ź fiertylnaściu, sindrom deficytu ŭvahi i hipieraktyŭnaści, chvaroby piečani ŭ dziaciej, astma i pavyšanaja ryzyka raku małočnaj załozy. Jašče bolš niebiaśpiečnymi ftałaty robić toje, što jany mohuć zastavacca ŭ navakolnym asiarodździ dziasiatki hadoŭ.
Kali ŭ składzie butelki jość ftałaty, ź ciaham času jany mohuć trapić i ŭ vadu, što znachodzicca ŭ butelcy. Toje, nakolki mocna zabrudzicca vada, zaležyć ad dźviuch rečaŭ: taho, jak doŭha płastyk kantaktavaŭ z vadoj ci, mahčyma, ježaj, a taksama taho, ci nahravaŭsia płastyk padčas hetaha. Praz heta płastykavyja butelki źjaŭlajucca asabliva niebiaśpiečnymi: jany časta zachoŭvajucca na składach na praciahu doŭhaha času, a potym ich pieravoziać na transparcie, u jakim moža być davoli vysokaja tempieratura.
Raniej u butylavanaj vadzie vyjaŭlali mietały, bakteryi i reštki płastyku
Ftałaty — daloka nie adzinaje niepatrebnaje rečyva, jakoje źmiaščajecca ŭ butelkach z vadoj. U vadzie niekatorych papularnych brendaŭ vučonyja znajšli ciažkija mietały: srebra, baryj, kobalt, chrom, miedź, nikiel, śviniec i cynk.
Bolš za toje, inšaja praca vyjaviła ŭ butylavanaj vadzie taksiny, bakteryi i hrybki, u vyniku praź jaje možna padchapić niejkuju chvarobu, čaściej za ŭsio hastraenteryt. Dla ludziej z asłablenym imunitetam takaja vada moža ŭjaŭlać sapraŭdnuju niebiaśpieku.
U butylavanaj vadzie moža być mienš karysnych minierałaŭ, čym u vodapravodnaj
U 2001 hodzie daśledčyki z univiersiteta Makhiła ŭ Kanadzie paraŭnali vodapravodnuju vadu i kryničnuju vadu ŭ butelkach ad viadomych amierykanskich brendaŭ. Vysnova takaja: kolkaść kalcyju, mahniju i natryju akazałasia značna vyšejšaj mienavita ŭ vodapravodnaj vadzie. I, viadoma, płastykavyja butelki škodnyja dla navakolnaha asiarodździa.
Składana skazać, nakolki škodnaj dla kankretnaha čałavieka budzie butylavanaja vada. Ale ž ekśpierty rajać uličvać jaje pry vybary, jakuju vadu ŭžyvać. Taksama jany rekamiendujuć pić vadapravodnuju vadu, kali ŭ vašym rehijonie jana dastatkova čystaja, nabyć vadziany filtr i ŭłasnuju šmatrazovuju butelku dla vady.
Kamientary