«Našych dziaciej ź dziacinstva pryvučali da transhiendarnych lalek». Špileŭskaja znajšła karyść ad zachodnich sankcyj

Funkcyjanierka adznačyła, što jana zaŭsiody była suprać sankcyj, bo bieź ich biełaruskaja ekanomika raźvivałasia b lepš, ale ciapier jana im paradavałasia.

«Sprava tut nie tolki ŭ ekanomicy, a jašče i ŭ ideałohii — tamu ja, ułasna, i ŭzradavałasia hetym sankcyjam», — skazała jana ŭ pieradačy na fonie interjeraŭ u anhlijskim styli.

Na jaje dumku śmiešnaja zabarona na ŭvoz u Biełaruś dziciačych cacak — lalek, hałavałomak, vazočkaŭ z matorčykami, samakataŭ i rovaraŭ, heta vydatnaja reč, bo praz heta zachodni ŭpłyŭ na biełaruskich dziaciej, narešcie, budzie spynieny.

«Kali havaryć pra tych ža lalek — dyk ja za toje, kab našy dzieci hulali z našymi cackami. Voś, naprykład, «Paleskaja fabryka» vypuskaje lalku — i heta dobra. Kab jany hulali z našymi, tradycyjnymi cackami.

Bo razam z cackami, jakija prychodzili da nas z Zachadu, prychodziła i zachodniaja ideałohija. Kali našych dziaciej ź dziacinstva pryvučali da transhiendarnych lalečak, da mašynak z matorčykami — ale abaviazkova BMW ci Volkswagen.

Ciapier heta budzie «Vołha», dziakuj bohu, abo «Maskvič», ci «BiełDžy». Našy dzieci biez cacak nie zastanucca — buduć i lalki, i mašynki, heta stopracentnaja harantyja. Ale voś heta ideałahičny ŭpłyŭ, hetaje nasadžeńnie čužych nam kaštoŭnaściaŭ budzie sychodzić. I ja, naprykład, vielmi hetamu rada», — patłumačyła svaju pazicyju Špileŭskaja.

Da dziaciej pačali stavicca nie jak da «maleńkich darosłych» u Zachodniaj Jeŭropie ŭ XVII—XVIII stahodździach, kali epocha Aśvietnictva adkryła dziacinstva jak samastojny i kaštoŭny pieryjad žyćcia. U hety ž čas Francyja i Hiermanija stali centrami vytvorčaści lalek, jakija stali pravobrazam sučasnych. Praz arystakratyju hetyja spačatku vielmi darahija cacki trapili va Uschodniuju Jeŭropu, dzie ich pačali pierajmać pradstaŭniki bolš biednych słajoŭ nasielnictva, vyrablajučy z bolš tannych materyjałaŭ. Masavaja fabryčnaja vytvorčaść lalek pačałasia ŭ XIX stahodździ i asabliva aktyŭna raźviłasia ŭ XX.

Takim čynam, tak zvanyja «tradycyjnyja lalki» na Biełarusi — heta taksama vynik zachodniaha ŭpłyvu, jak i ŭ idejnym, tak i ŭ materyjalnym sensie. Prykładna toje samaje možna skazać i pra aŭtamabili.

Akramia taho, tradycyjnyja lalki nie praduhledžvajuć pakazu pałavych prykmiet, asabliva takich, jak pałavyja orhany, tamu ŭsie jany źjaŭlajucca «biaspołymi».

• 0
• 1
• 4
• 7
• 0
• 0
• 3
• 0