Pieramoŭščyk Pucina abvinavaciŭ va ŭdary pa dziciačym sadku ŭ Charkavie ŭkrainskuju SPA
U efiry CNN Kirył Dźmitryjeŭ, jaki prybyŭ u ZŠA jak «pieramoŭščyk» Pucina, zajaviŭ, što Rasija nie nacelvajecca na dziciačyja sady i nahadaŭ pra napady z boku ŭkrainskich vojskaŭ na ruskamoŭnych žycharoŭ Danbasa.
Viadučy CNN pacikaviŭsia ŭ kiraŭnika Rasijskaha fondu pramych inviestycyj Kiryła Dźmitryjeva, ci razumieje jon, čamu Donald Tramp adčuvaje razdražnieńnie ŭ dačynieńni da Uładzimira Pucina. Žurnalist pryvioŭ historyju, jakuju Tramp raspavioŭ pierad samitam na Alascy: paśla razmovy z Pucinym jon padzialiŭsia ŭražańniami ź pieršaj łedzi, Miełanijaj, a jana adkazała: «Nu, Rasija ž tolki što razbambiła dom sastarełych».
Na heta Dźmitryjeŭ adkazaŭ, što jon nie źjaŭlajecca vajskovym čałaviekam, a zajmajecca «ekanomikaj i inviestycyjami». Pavodle jaho słoŭ, rasijskaja armija nanosić udary tolki pa vajennych abjektach.
U adkaz na pytańnie žurnalista CNN pra ŭdary rasijskich vojskaŭ pa cyvilnych metach kiraŭnik RFPI taksama zajaviŭ, što «mnohija ruskamoŭnyja žychary Danbasa pieršapačatkova padvierhlisia napadam z boku ŭkrainskich vojskaŭ».
Viadučy zaŭvažyŭ, što asabista byŭ va Ukrainie i bačyŭ nastupstvy rasijskich udaraŭ, jak ciapier — razburanyja žyłyja damy i dziciačy sad u Charkavie. Jon padkreśliŭ, što śćviardžeńni pra ŭdary tolki pa vajennych abjektach nie adpaviadajuć rečaisnaści, bo pa ŭsioj Ukrainie ciarpiać cyvilnyja celi.
Dźmitryjeŭ znoŭ paŭtaryŭ, što nie źjaŭlajecca vajskovym, i dadaŭ, što časam rakiety ŭkrainskaj SPA «traplajuć nie tudy». Pavodle jaho słoŭ, Rasija choča «jak maha chutčej skončyć hety kanflikt».
«Viadoma, Rasija nie nacelvajecca na dziciačyja sady. Pa takich vypadkach treba źviartacca da vajskoŭcaŭ. Lubaja achviara — heta vialikaja trahiedyja. Mienavita tamu my chočam jak maha chutčej skončyć hety kanflikt. Čamu b nie damovicca ab spynieńni ahniu? Pazicyja Rasii zaklučajecca ŭ tym, što ŭdary nanosiacca pa vajennych abjektach, a časam rakiety ŭkrainskaj SPA traplajuć nie tudy. Ale, paŭtarusia, heta nie maja śfiera — ja nie vajskovy čałaviek, ja prosta imknusia sadziejničać dyjałohu i jak maha chutčejšamu zaviaršeńniu kanfliktu», — skazaŭ Dźmitryjeŭ u efiry CNN.
Kamientary
Pierarezali susiedziaú , svaich ciubiaciejek stracili paúmiljarda .
a mordy i mazhi zastalisia tyja ž .