Moładź vychodzić na vulicy haradoŭ pa ŭsioj Tanzanii, pratestujučy suprać niespraviadlivych vybaraŭ.
Sotni ludziej zahinuli ŭ Tanzanii za try dni pratestaŭ paśla ŭsieahulnych vybaraŭ u sieradu, zajaviła hałoŭnaja apazicyjnaja partyja krainy, piša Bi-bi-si.
Pradstaŭnik apazicyjnaj partyi «Čadema» paviedamiŭ ahienctvu AFP, što «kala 700» čałaviek byli zabityja ŭ sutyknieńniach ź siłami biaśpieki; dypłamatyčnaja krynica ŭ Tanzanii paviedamiła Bi-bi-si, što jość dakładnyja dokazy hibieli jak minimum 500 čałaviek.
Acenki kolkaści zahinułych roźniacca, a adklučeńnie internetu pa ŭsioj krainie ŭskładniaje pravierku danych.
Urad sprabuje pamienšyć maštaby hvałtu — ułady praciahnuli kamiendanckuju hadzinu, kab zadušyć biesparadki.
Demanstracyi prachodziać u asnoŭnym siarod moładzi, jakaja vychodzić na vulicy haradoŭ pa ŭsioj Tanzanii, pratestujučy suprać niespraviadlivych vybaraŭ.
Pratestoŭcy vinavaciać ułady ŭ padryvie demakratyi šlacham pieraśledu lidaraŭ apazicyi — adzin znachodzicca ŭ turmie, druhoha źniali z vybaraŭ pa techničnych padstavach — kab u prezidenta Samii Sułuchu Chasan nie było kankurentaŭ.
Pratesty praciahnulisia ŭ piatnicu, kali demanstranty ŭ stalicy krainy, partovym horadzie Dar-es-Sałam praihnaravali patrabavańni vajskoŭcaŭ spynić biesparadki.
Ministr zamiežnych spraŭ Machmud Komba Tabit zajaviŭ, što hvałt mieŭ miesca ŭ vyhladzie niekalkich izalavanych incydentaŭ i skazaŭ, što siły biaśpieki dziejničali vielmi chutka i rašuča, kab urehulavać situacyju.
«My taksama praciahvajem atrymlivać paviedamleńni ab vandaliźmie», — skazaŭ ministr, dadaŭšy, što adklučeńnie internetu było nieabchodna dla vyratavańnia žyćciaŭ ludziej.
Žurnalistam i pravaabarončym arhanizacyjam ciažka pravieryć paviedamleńni ab zahinułych, a balnicy admaŭlajucca pradastaŭlać infarmacyju ab achviarach.
Krynica ŭ adnoj z balnic Dar-es-Sałama paviedamiła, što z čaćviarha jana pierapoŭniena paciarpiełymi, i bolšaść dziaržaŭnych balnic horada znachodziacca ŭ anałahičnaj situacyi, a morhi pierapoŭnieny.
Adzin z kiraŭnikoŭ partyi «Čadema» zajaviŭ, što baicca za svajo žyćcio, pakolki «raźnia adbyvajecca nočču, kali nichto nie moža heta ŭbačyć».
«[Siły biaśpieki] šukajuć usich našych lidaraŭ, i niekatorym daviałosia pakinuć krainu. Hetyja ludzi zabivajuć biespakarana», — skazaŭ Džon Kitoka, dyrektar partyi pa zamiežnych spravach i spravach dyjaspar.
«My zastajemsia zaniepakojenyja tym, što pieradvybarčy pieryjad byŭ adznačany pieraśledami, vykradańniami i zapałochvańniem apazicyjnych dziejačaŭ, žurnalistaŭ i pradstaŭnikoŭ hramadzianskaj supolnaści», — dadaŭ jon.
AAN zaklikała siły biaśpieki Tanzanii ŭstrymacca ad prymianieńnia praźmiernaj siły, a ministry zamiežnych spraŭ Vialikabrytanii, Kanady i Narviehii vystupili z sumiesnaj zajavaj, zaklikajučy ŭłady «dziejničać maksimalna strymana» i pavažać svabodu vykazvańnia mierkavańniaŭ.
U paŭaŭtanomnym archipiełahu Zanzibar, jaki vybiraje ŭłasny ŭrad i lidara, kiraŭnik, jaki pradstaŭlaje kiroŭnuju partyju «Čama Ča Mapinduzi» Chusiejn Mvińji pieramoh, nabraŭšy amal 80% hałasoŭ.
Apazicyja Zanzibara zajaviła ab masavych falsifikacyjach.
Turysty na vostravie, pa paviedamleńniach, zatrymalisia ŭ aeraporcie, tak jak pratesty na macieryku i adklučeńnie internetu zatrymlivajuć rejsy.
Aficyjnyja vyniki pavinny być nazvanyja ŭ subotu, ale čakajecca, što pieramožcam abjaviać prezidenta Samiju Sułuchu Chasan.
Jana pryjšła da ŭłady ŭ 2021 hodzie paśla śmierci byłoha prezidenta Džona Mahufuli i stała pieršaj žančynaj na čale Tanzanii.
Spačatku Samija atrymała pryznańnie za pasłableńnie palityčnych represij, ale zatym palityčnaja prastora zvuziłasia, a jaje ŭrad stali abvinavačvać u pieraśledzie apanientaŭ šlacham aryštaŭ i vykradańniaŭ.
U ciapierašnich vybarach płanavali ŭdzielničać dva asnoŭnyja apazicyjnyja kandydaty — Tundu Lisu, jaki ŭtrymlivajecca pad vartaj pa abvinavačvańni ŭ dziaržaŭnaj zdradzie, i Łuchaha Mpina, jakoha da vybaraŭ nie dapuścili.
Kamientary
"...ale zatym palityčnaja prastora zvuziłasia", pieraśled apanientaŭ, falsifikacyi na vybarach, represii, zabojstvy.
Kali źmianiajecca tolki asoba lidara, a kaštoŭnaści i padychody zastajucca, kraina pryncypova nie źmianiajecca.
Dumać tym, chto raskazvaje, što demakratyja i svabody ŭ Biełarusi pačakajuć, što bieź ich nibyta možna časova abyścisia, pakul nacyjanalnaja dziaržava budzie budavacca.
Tym bolš kłasičny ideał jeŭrapiejskaj nacyjanalnaj respubliki abjadnoŭvaje abodva padychody. Jany nie supiarečać adzin adnamu.
Tamu, kali heta była sproba skazać "voś jany, drennyja, sunuć upierad svaju d., a my nasupierak im budziem pra pryjarytet n.", - to heta drennaja sproba. Iłžyvaja dylema.