Žančyna z Ryhi raskazała, jak jeździła ŭ Biełaruś rabić zuby

Pieršy raz žančyna pryjechała ŭ Minsk da daktaroŭ letaś u žniŭni. I voś ciapier, u kastryčniku 2025 hoda, jana spadziajecca, što nadyšoŭ ščaślivy finał.

Svajoj historyi žančyna pryśviaciła błoh u tyktoku. Žanna tłumačyć, čamu nie stała lačyć zuby ŭ rodnaj Łatvii. Jana kaža, što situacyja ŭ jaje była składanaja — nieabchodna było vydalić usie zuby i pastavić impłanty.

— U instytucie stamatałohii mnie paličyli tolki vierchni šerah na 4 impłantach — pryblizna 16 tysiač jeŭra. Heta byli b impłanty «Štraŭman» i cyrkonijevyja karonki. U mianie takich hrošaj nie było, dyj uziać ich niama adkul.

Kaniečnie, žančyna stała vyśviatlać, u jakoj krainie možna było b bolš tanna vyrašyć prablemu. Pryznajecca, što vielmi strašna było jechać z takim dalikatnym pytańniem kudyści za miažu.

— Pačuła šmat kamientaryjaŭ, što zuby lepš lačyć tam, dzie ty žyvieš. Bo kali niešta zdarycca, dyk kudy ty pajedzieš?!

Žanna viedała, što šmat chto z Łatvii jeździć da stamatołahaŭ u Biełaruś ci Turcyju, ale sama ŭsio ž bajałasia tak zrabić.

Jaje znajomaja — byłaja minčanka, jakaja pierajechała žyć u Ryhu, — stała kazać, što nie daviaraje łatvijskaj miedycynie i sama jeździć lačycca ŭ Biełaruś. Siabroŭka paraiła stamatałahičnuju kliniku ŭ Minsku. Žanna vyrašyła pasprabavać i napisała tudy, kab pacikavicca koštam. Ahučanaja suma spadabałasia, i žančyna vyrašyła ryzyknuć.

@rizanka_zanna V Łatvii mnie nasčitali za vierchniuju čielusť na 4-joch impłantach Štrauman i koronki iz cirkonija(10 zubov) primierno 16.000€. V Biełarusi za obie čielusti mnie priedłožili cienu mieńšie čiem u nas za odnu. Siejčas u mienia projdien piervyj etap ustanovki impłantov. Osieńju načnietsia vtoroj - postaviat postojannyje koronki iz cirkonija i eto budiet užie otdielnaja ciena. #lečuzubyvminskie #zuby #stomatołohija #izrihivminsk #vrihieočieńdoroho #chočukrasivyjezuby #zdorovyjezuby #dieluśopytom #mojvidieodnievnik #budukohdatovspominaťčieriezčtojaprošła ♬ orihinalnyj zvuk - Rižanka Žanna

Pieršy raz jana pryjechała ŭ Minsk na dziesiać dzion — pry hetym Žanna kaža, što za žyllo i darohu płaciła klinika. Jana ž sama ŭ Biełarusi patraciła tady 70 jeŭra na ježu (z ulikam taho, što biez zuboŭ u pryncypie jeści składana) i 20 jeŭra na nieabchodnyja leki.

— Za vydaleńnie zubnoha šerahu ŭviersie i ŭnizie, za ŭstanoŭku 12 karejskich impłantaŭ, za časovuju kanstrukcyju zapłaciła prykładna 9 tysiač dalaraŭ.

Šviejcarskija impłanty «Štraŭman» zaŭvažna daražejšyja, ale pazicyja žančyny takaja: lepš pastavić toje, što možaš sabie dazvolić, čym chadzić biez zuboŭ.

Kamientatary pisali, što ŭ Turcyi možna było b zrabić bolš tanna. Žančyna vyrašyła heta vyśvietlić — tym bolš sioleta zimoj pabačyła niedzie ŭ ruskamoŭnaj presie navinu, byccam łatvijcam mohuć zabaranić vandroŭki ŭ Biełaruś i Rasiju. Pakolki da skančeńnia lačeńnia było daloka, płan B treba było pradumać.

— Vy ž pišacie, što ŭ Turcyi za 5‑6 tysiač jeŭra robicie sabie ŭvieś rot ad pačatku i da kanca — i stavicie impłanty, i nadziavajecie na ich karonki, i pražyvańnie, i charčavańnie, i tranśfier… I ŭsio-ŭsio ŭvachodzić u hetyja 5‑6 tysiač jeŭra.

Žanna napisała ŭ adnu tureckuju kliniku i pacikaviłasia, kolki budzie kaštavać tam skončyć jaje lačeńnie — z ulikam taho, što impłanty ŭžo stajali. Joj ahučyli sumu 7200 jeŭra — i heta tolki za cyrkonijevyja karonki.

Treci vizit u Biełaruś staŭ dla Žanny apošnim. Ciapier jana narešcie ahučyła finalnuju sumu, jakuju patraciła na zuby ŭ Biełarusi — atrymałasia ahułam 15 tysiač jeŭra.

Pry hetym, u tyktoku Žanna nieadnarazova sutykałasia z abureńniem biełarusaŭ, što dla ich ceny na stamatałohiju na radzimie niepadjomnyja, i kamientarami kštałtu: «Nie padkažacie, kudy biełarusam jeździć lačyć zuby?».

Žančyna ž adkazvaje, što joj taksama pryjšłosia šmat ad čaho admovicca dziela novaj uśmieški.

• 6
• 0
• 3
• 10
• 2
• 2
• 0
• 0