Tramp prapanuje Pucinu biznes-ździełki z ZŠA da zaviaršeńnia vajny z Ukrainaj

ZŠA prapanavali Rasii zaklučyć biznes-ździełki nie čakajučy zakančeńnia vajny va Ukrainie, tady jak raniej pazicyja Vašynhtona była procilehłaj i praduhledžvała adnaŭleńnie ekanamičnych suviaziaŭ tolki ŭ jakaści «ŭznaharody» za spynieńnie vajennych dziejańniaŭ. Pra heta piša The New York Times sa spasyłkaj na daśviedčanyja krynicy.

Pa słovach amierykanskaha čynoŭnika, jaki havaryŭ z hazietaj, ekanamičnyja prajekty da zakančeńnia vajny ciapier mahčymyja, bo jany prademanstravali b surjoznaść namieraŭ ZŠA pa «pierazahruzcy» adnosin z Maskvoj.

Pradstaŭnik administracyi ZŠA rastłumačyŭ, što Vašynhton choča stvaryć dadatkovyja stymuły, jakija padachvočvajuć rasijskija elity damahacca miru. Dasiahnieńnie dziełavych pahadnieńniaŭ da zaviaršeńnia vajny mahło b dapamahčy pierakanać nastrojenych antyamierykanskich «jastrabaŭ» z atačeńnia prezidenta Uładzimira Pucina ŭ tym, što prezident ZŠA sapraŭdy imkniecca vybudavać novyja adnosiny z Rasijaj, adznačyŭ čynoŭnik. Kamanda Trampa, imavierna, źmianiła kurs u pošuku novych idej dla spynieńnia vajny paśla taho, jak pieramovy ab mahčymym vyvadzie ŭkrainskich vojskaŭ z častki Danbasa, jakaja zastajecca pad kantrolem Kijeva, zajšli ŭ tupik, adznačaje NYT.

Prezident ZŠA nazyvaŭ ekanamičny patencyjał Rasii «vielizarnym», ale raniej pazicyjanavaŭ zaklučeńnie biznes-uhodaŭ jak uznaharodu Maskvie za mirnaje ŭrehulavańnie.

«Jany chočuć vieści biznes. Ale jany nie buduć vieści biznes, pakul my nie ŭrehulujem vajnu», — zajaŭlaŭ Tramp pierad svajoj sustrečaj z Pucinym na Alascy letaś.

Usio pakazvaje na toje, što ZŠA «razhladajuć mahčymaść bolš bujnych sastupak Rasii», miarkuje eks-dypłamat ES u Kijevie, jaki ciapier pracuje ŭ ahienctvie palitaanalizu R. Politik, Bałaš Jarabik.

Ź jahonych słoŭ, Vašynhton ciapier demanstruje, što niekatoryja pahadnieńni mohuć prasunucca napierad, kali Maskva prajavić strymanaść va Ukrainie. «Raniej Vašynhton admaŭlaŭsia padpisvać takija pahadnieńni da ŭstanaŭleńnia režymu spynieńnia ahniu», — adznačyŭ jon.

Niezrazumieła, jakija mienavita ŭhody abmiarkoŭvajucca pamiž RF i ZŠA. Pamočnik prezidenta Rasii Juryj Ušakoŭ paśla sustrečy Pucina sa śpiecpasłańnikami Trampa Styvam Uitkafam i Džaredam Kušnieram zajaŭlaŭ, što padrabiazna abmiarkoŭvałasia ekanamičnaja tematyka i mahčymyja bujnyja ŭzajemavyhadnyja rasijska-amierykanskija prajekty», piša Moscow Times.

• 1
• 1
• 1
• 7
• 0
• 0
• 0
• 0