Minskaja fatohrafka trapiła ŭ strašnuju avaryju na samakacie ŭ Dubai. Jana pralažała ŭ komie 14 dzion
25‑hadovaja Džejłan Silvanovič — fatohrafka ź Minska. U listapadzie 2024 hoda jana trapiła ŭ žudasnuju avaryju ŭ Dubai: jechała pa darozie na samakacie, i jaje źbiła mašyna. Džejłan praviała ŭ komie 14 dzion i straciła zrok na adno voka, piša «Smartpres».
Try hady tamu Džejłan źlacieła žyć u Dubaj. Spartyŭnaja, lohkaja na ŭzdym… Avaryja, jakaja padzialiła jaje žyćcio na «da» i «paśla», zdaryłasia 20 listapada 2024 hoda.
«Ja ničoha nie pamiataju, ni ŭdaru, ni samoha DTZ. Viedaju tolki, što jechała na samakacie pa darozie biez šlema», — zhadvaje dziaŭčyna.
Jaje źbiŭ vadziciel mašyny, jaki ŭ toj momant razvaročvaŭsia. Čerapna-mazhavaja traŭma, balnica, apieracyja, koma…
«Šancy vyžyć u Džejłan byli minimalnyja. Daktary kazali: jana straciła šmat kryvi, jaje źbirali pa častkach, mozh ni na što nie reahavaŭ. Prahnoz — zastaniecca «aharodninaj» na ŭsio žyćcio, ale praz 14 dzion Džejłan vyjšła z komy», — raskazvaje jaje chłopiec Uład.
Jon palacieŭ u Dubaj da jaje.
«Na łožku lažała dziaŭčynka kiłahramaŭ 40, pałova tvaru nie pracuje jak paśla pieraniesienaha insultu, hałava ŭsia ŭ šnarach i pierabintavanaja. Skazałasia i znachodžańnie ŭ komie, jana ačomałasia, ale myśleńnie było na ŭzroŭni 5‑hadovaha dziciaci», — praciahvaje raskazvać Uład.
Miesiac dziaŭčyna praviała ŭ balnicy Saudi German Hospital. Jaje dastavili siudy adrazu paśla DTZ. Za apieracyju i miesiac znachodžańnia ŭ balnicy strachavaja kampanija zapłaciła $100 tysiač.
Paśla avaryi dziaŭčyna aślepła na levaje voka, a pavieki pierastali adkryvacca. Kab ubačyć hety śviet, joj davodziłasia prypadymać rukoj pavieka pravaha voka. Da taho ž było składana chadzić, jana stračvała raŭnavahu.
U Dubai dziaŭčynie nie prapanavali reabilitacyju, tamu para prylacieła ŭ Biełaruś. U vyniku Džejłan trapiła ŭ Minski navukova-praktyčny centr chirurhii, transpłantałohii i hiematałohii. Doktar pravioŭ juvielirnuju pracu na voku, złučyŭ adny myšcy pavieka ź inšymi — i ciapier jany mohuć adkryvacca.
Ciapier dziaŭčyna spadziajecca adnavić zrok na levaje voka i vyjhrać sud. Adrazu paśla DTZ vadziciela mašyny aryštavali, a kali Džejłan vyjšła z komy — adpuścili.
«U hetaj avaryi vina maja i kiroŭcy 50×50. Tak vyrašyŭ transpartny sud, u jakim adrazu razhladałasia sprava. Ja nie pavinna była jechać pa darozie na samakacie, ale pobač nie było piešachodnaj darožki. Ciapier ja źviarnułasia ź iskam u hramadzianski sud, kab damahčysia vypłaty ad kiroŭcy».
Ciapier čytajuć
«Adnavili hramadski paradak, nie sastupiŭšy patrabavańniam novych vybaraŭ». Što piša Hrokipiedyja pra pratesty, Łukašenku, movu i jak dzielić spadčynu VKŁ1212
Kamientary
Jechała tam, dzie samakatčykam zabaroniena jechać.