Jahoraŭ raskazaŭ, što ž było na jaho sustrečy ź Cichanoŭskaj u 2020-m

Siabry, što mieli dačynieńnie da štabu Cichanoŭskaj, patelefanavali i kažuć: «Treba prafiesijnaja palitałahičnaja dapamoha. Možaš dapamahčy Śviatłanie?»

Ja pahadziŭsia, i Śviatłana pryjechała da nas na padvorak. Razmaŭlali my hadziny z try, dzie ja imknuŭsia patłumačyć strukturu palityčnaj situacyi i situacyi samoj Cichanoŭskaj u joj.

My ŭžo jasna razumieli, što palityčny ŭzdym budzie vialikim, paraŭnalnym z 1990-mi, i treba rychtavacca da masavaj vulicy. Śviatłana davoli naiŭna hladzieła na ŭsio, nie vielmi razumieła svaje pierśpiektyvy, chvalavałasia za Siarhieja, za toje, jak i kali jaho vypuściać. Heta było całkam naturalna dla jaje jak novaha čałavieka ŭ palitycy. Chiba bolšaść biełarusaŭ u toj čas tak sama naiŭna ŭsprymała toje, što adbyvajecca.

Prahavaryli my hadziny z try.

Ja kazaŭ Śviatłanie, što ŭ jaje dva šlachi. Pieršy — vyjści ź situacyi, z zabieśpiačeńniem svaich intaresaŭ. Druhi — heta šlach hieroja. A šlach hieroja — ciažki, bo ŭ kancy treba budzie zmahacca ź ludažernym drakonam.

A ŭ hetaha drakona niama nijakich abmiežavańniaŭ, i jon pojdzie na ŭsio dziela zachavańnia ŭłady, uklučna z šantažom, teroram, zabojstvami. Lubym brudam, jaki možna sabie ŭjavić.

Tamu pieršaja vam parada — vyvoźcie dziaciej za miažu.

Kali vy abiarecie šlach hieroja i zastacca ŭ palitycy, — praciahvaŭ ja, — to na vas budzie skancentravanaja vialikaja uvaha. Žurnalisty, intervju, sustrečy, pieramovy, vas buduć razryvać roznymi pytańniami, pra jakija ŭ vas niama prafiesijnaha mierkavańnia. Tut lohka pamylicca.

Tamu druhaja parada — vyvučycie kazku «pra słana». Karotkuju pryvabnuju historyju, jakuju možna raskazvać u adkaz na luboje pytańnie.

«— Jakaja ŭ vas ekanamičnaja prahrama? — Usie pytajuć, jakaja ekanamičnaja prahrama, a ty vaźmi da i kupi słana!». Voś, kažu, vy znajšli formułu — «ja pryšła dla taho, kab pieramahčy i pravieści novyja spraviadlivyja vybary» — jaje i trymajciesia.

Nastupnaje, kažu, palityka — sprava damoŭlenaściaŭ i kampramisaŭ, ale tam jany pastajanna parušajucca. Niejkaj harantyjaj ad cyničnaha «kidałava» z boku inšych moža być tolki publičnaja adkaznaść pieried hramadstvam.

Tamu treciaja parada — fiksujcie ŭsie damoŭlenaści publična. Što b vy ni vyrašyli — vyjści z pracesu, źniacca na karyść kahości, stać kandydatam ad abjadnańnia roznych hrupaŭ — usio fiksujcie ŭ publičnaj formie.

I apošniaje, kažu: zaraz uvieś praces razvaročvajecca pa-novamu, na novych ludziach, novaj technałahičnaj bazie, z novymi padychodami, i heta daje plon.

Tamu čaćviortaja parada — nie źviazvajciesia z tradycyjnaj apazicyjaj. Bo jany znoŭ paviaduć pa staroj kalainie, spracujuć pa starych šabłonach, jany majuć niehatyŭny imidž i buduć adšturchoŭvać novyja hramadskija hrupy, što pryjšli ŭ palityku.

Z hetych čatyroch paradaŭ Śviatłana skarystałasia ź pieršych troch i nie skarystałasia z apošniaj. Ja ŭpeŭnieny, nie tolki tamu, što ja joj heta kazaŭ, ale i inšyja ludzi pobač.

Chiba hałoŭnaje, što nie ŭdałosia danieści, heta pra šlach hieroja i zmahańnie z drakonam. Paźniej, u niejkich intervju, zhadvajučy situacyju cisku ŭ CVK pierad adjezdam, Śviatłana kazała, što joj nichto nie patłumačyŭ pra toje, što jaje čakaje, nie padrychtavaŭ jaje da takoj situacyi. Ja sprabavaŭ, ale atrymlivajecca, takich hałasoŭ było mała.

Pa vyniku toj sustrečy ja skazaŭ, što jaki b šlach vy ni abrali, ja hatovy vam dapamahčy, čym zmahu. Ale vam važna vyznačycca — vy idziacie hieraičnym šlacham ci šlacham vychadu ź situacyi. Heta daść razumieńnie, što mienavita treba rabić.

Śviatłana i jaje kamanda tak i nie viarnulisia z adkazam. My pajšli roznymi šlachami ŭ adzinaj biełaruskaj revalucyi. Užo potym ja dapamahaŭ inšymi rečami, dzieści bolš paśpiachova, dzieści mienš. I tak, krytykavaŭ taksama. Ale heta ŭžo inšaja historyja.

• 17
• 2
• 2
• 2
• 0
• 0
• 0
• 0