U faviełach Rya-de-Žanejra adbyvajecca vajenizavanaja palicejskaja apieracyja. Viadoma pra 64 zahinułych
Upraŭleńnie AAN pa pravach čałavieka zajaviła, što «žachnułasia» ad dziejańniaŭ brazilskaj palicyi i zaklikała pravieści «chutkaje i efiektyŭnaje rasśledavańnie».
Fota: Silvia Izquierdo / AP
Pa mienšaj miery 64 čałavieki zahinuli ŭ chodzie palicejskaj apieracyi ŭ paŭnočnych pryharadach Rya-de-Žaniejra, nakiravanaj suprać bandy «Čyrvonaje kamandavańnie», piša Bi-bi-si.
Siarod zahinułych u chodzie apieracyi «Strymlivańnie» ŭ favełach Aleman i Pieńja — čaćviora palicyjantaŭ, paviedamiŭ hubiernatar štata Rya-de-Žaniejra Kłaŭdya Kastra. Aryštavana bolš za 80 čałaviek. U apieracyi prymajuć udzieł jak hramadzianskaja, tak i vajennaja palicyja.
Palicejskija siły kolkaściu kala 2500 čałaviek uvajšli ŭ faveły ŭ aŭtorak ranicaj, i nieŭzabavie ŭspychnuli sutyknieńni. «Čyrvonaje kamandavańnie» (Comando Vermelho) adkazała stralboj, padpalenymi barykadami i dronami, jakija skidajuć bomby.
Taksama paviedamlajecca pra dziasiatki paranienych, uklučajučy cyvilnych asob, jakija trapili pad pierakryžavany ahoń.
Zona favieł niedaloka ad aeraporta Rya-de-Žaniejra ličycca centram apieracyj adnoj z samych mahutnych kryminalnych hrupovak u Brazilii.
Va ŭradzie štata kažuć, što kala 50 zahinułych «paznačany palicyjaj jak padazravanyja złačyncy».
Upraŭleńnie AAN pa pravach čałavieka zajaviła, što «pryšło ŭ žach» ad dziejańniaŭ brazilskaj palicyi i zaklikała pravieści «chutkaje i efiektyŭnaje rasśledavańnie».
U favełach — biednych i niebiaśpiečnych kvartałach na schiłach hor — žyvie kala 300 tys. čałaviek. Miascovyja žychary kažuć, što ciapier situacyja tam nahadvaje «zonu bajavych dziejańniaŭ».
«Čyrvonaje kamandavańnie» ŭ apošni čas pašyrała svaju terytoryju ŭ štacie Rya, naładžvała šlachi kantrabandy narkotykaŭ i ŭzmacniała kantrol nad favełami.
Z pačatku apieracyi «Strymlivańnie» kanfiskavana bolš za 200 kh narkotykaŭ i dziasiatki adzinak ahniastrelnaj zbroi, paviedamiła palicyja.
Bujnamaštabnyja palicejskija apieracyi ŭ Brazilii davoli časta pravodziacca napiaredadni vialikich mižnarodnych mierapryjemstvaŭ. U listapadzie ŭ horadzie Bielen na poŭnačy krainy projdzie klimatyčny samit AAN COP30.
Ciapier čytajuć
«Adnavili hramadski paradak, nie sastupiŭšy patrabavańniam novych vybaraŭ». Što piša Hrokipiedyja pra pratesty, Łukašenku, movu i jak dzielić spadčynu VKŁ1313
Kamientary