Fond Karpiankova «Maładaja hvardyja» pracaŭładkoŭvaje žonak hubazikaŭcaŭ. Jakija tam zarobki?
Dabračynny fond «Maładaja hvardyja», stvorany pa inicyjatyvie namieśnika kiraŭnika MUS Mikałaja Karpiankova dla «raźvićcia vajskova-patryjatyčnaha ruchu», staŭ miescam pracaŭładkavańnia dla svajakoŭ samoha hienierała i žonak jaho kalehaŭ-siłavikoŭ, vyśvietliła «Biuro».
Fond, jaki pazicyjanuje siabie jak «parasonavy apieratar» vajskova-patryjatyčnych kłubaŭ, byŭ zasnavany ŭ mai 2024 hoda pad ehidaj dziaržaŭna-hramadskaha abjadnańnia «Biełaruskaje tavarystva «Viedy», jakoje ŭznačalvaje prapahandyst Vadzim Hihin.
Dziakujučy źviestkam, atrymanym ad «Kibierpartyzan», rasśledavalniki vyśvietlili, chto pracuje ŭ štacie fondu.
Hałoŭnaja znachodka: u fondzie «Maładaja hvardyja» na 2024 hod pracavała śpiecyjalistkaj pa markietynhu niaviestka Karpiankova. Aksana Karpiankova — žonka Ihara Mikałajeviča Karpiankova, syna ciapierašniaha namieśnika kiraŭnika MUS. Jaje pryniali ŭ vieraśni 2024 hoda, i raniej jana nijak nie była źviazanaja z patryjatyčnym vychavańniem i moładździu.
Ale heta nie ŭvieś «zorny skład». U rozny čas u štacie fondu pracavali i praciahvajuć pracavać žonki dziejnych siłavikoŭ, u tym liku byłych sasłužyŭcaŭ Karpiankova pa HUBAZiKu, jaki jon uznačalvaŭ da pryznačeńnia namieśnikam ministra.
Darja Arłoŭskaja — doktarka, u fondzie z maja 2024-ha. Jana žonka Viačasłava Arłoŭskaha, jaki ŭ 2021 hodzie, budučy načalnikam adździeła HUBAZiKa, prapanavaŭ pazbaŭlać hramadzianstva biełarusaŭ, jakija vystupajuć suprać režymu Łukašenki.
Jašče adna žonka eks-kalehi Karpiankova — Volha Bušyła — sama aficerka MUS: słužyła ŭ HUUS Minharvykankama i AHiM Leninskaha rajona Minska. Jana žonka supracoŭnika HUBAZiKa Ihara Bušyły, jaki, pavodle paviedamleńniaŭ pratestnych telehram-kanałaŭ, braŭ udzieł u pieraśledzie palityčnych apanientaŭ režymu Łukašenki.
Hanna Šyh — vypusknica Bresckaha dziaržaŭnaha ŭniviersiteta, pracavała ŭ dziciačym sadku i ŭ minskim piedahahičnym univiersitecie. Ź lipienia 2024‑ha — u «Maładoj hvardyi». Muž — Rusłan Šyh, kamandzir uzvoda v/č 3214.
Alina Šajunova — lejtenantka, majstarka sportu mižnarodnaha kłasa pa kidańni mołata — žonka Juryja Šajunova, lohkaatleta, lejtenanta ŭnutranaj słužby i člena spartovaj kamandy ŭnutranych vojsk MUS.
Lizavieta Praducha, 2006 hoda naradžeńnia, u fondzie ź lipienia 2024-ha. Jejny baćka — namvajenkama, načalnik mabilizacyjnaha adździeła, padpałkoŭnik Michaił Praducha.
Alena Daniluk-Nieŭmiaržyckaja — major MUS, słužyć u śpiecnazie ŭnutranych vojskaŭ (v/č 3214). Nieadnarazovaja pryziorka pa stralbie i mnahaborji. Brała ŭdzieł u zbornaj MUS na SWAT Challenge u Dubai i ŭ alimpijskaj zbornaj.
Ličylisia ŭ štacie i byłyja vychavanki VPK. Naprykład, Darja Viarhiejčyk znachodziłasia ŭ VPK «Advaha» na bazie asobnaha atrada śpiecpryznačeńnia «Ryś». Ciapier jana pracaŭładkavanaja ŭ fondzie i v/č 3214 — śpiecnazie MUS.
Jak bačym, na srodki dabračynnaha fondu žyvuć žonki ciapierašnich i byłych kaleh Mikałaja Karpiankova i dziejnyja siłaviki z padnačalenych jamu častak. Akramia taho, fond nabiraje «maładuju źmienu» z tych, chto ŭžo prajšoŭ škołu VPK — padrychtavanych i łajalnych z parohu.
Kolki kaštuje fondu piersanał?
Analiz spravazdačnaści fondu pakazaŭ, što za 2024 hod na štat z padatkami było vydatkavana 308 899 rubloŭ, što składaje 42% usich vydatkaŭ fondu.
Bolšaść supracoŭnikaŭ aformlenyja na 0,5 staŭki. Da prykładu, dyrektar fondu za svaju pałovu staŭki ŭ fondzie atrymlivaje 3 493 rubli za miesiac. Kali b jon mieŭ poŭnuju staŭku, apłata pa jakoj skłała b 6 986 rubloŭ, heta było b u 2,5 razu bolš za siaredniuju naminalnuju naličanuju zarpłatu pa krainie.
U astatnich paznačanyja zarpłaty: ad 2 315 da 2 674 rubloŭ.
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary
Tiem boleje, eto raśćvieło vsiemi kraskami i zakołosiłoś v strukturach krasaucau i strukturach śviazannych s krasaucami, pośle 2020 hoda im možno vsio.
Von, dažie "Alfa" KHB prievratiłaś v to, dla boŕby s čiem sozdavałaś v SSSR.