Kiroŭca byŭ pjany ŭ chłam i śpiašaŭsia ŭ škołu. Padrabiaznaści DTZ u Smarhonskim rajonie, dzie aŭtamabil źniščyŭ staradaŭniuju kaplicu
Na minułym tydni ŭ vioscy Rasła Audi źnios prydarožnuju katalickuju kaplicu. Paviedamlałasia, što jon abraŭ niapravilnuju chutkaść, ale padrabiaznaściej ad aficyjnych krynic dahetul nie źjaviłasia.
Katolik.life zaŭvažyŭ u sacyjalnaj sietcy raspovied miascovaha žychara, jaki śćviardžaje, što viedaje, jak usio adbyłosia. 25‑hadovy kiroŭca byŭ u stanie mocnaha ałkaholnaha apjanieńnia i śpiašaŭsia, kab zabrać sa škoły dzicia.
Na darohu pad koły raptoŭna vybiehli husi, što paspryjała avaryi. Adna z ptušak zahinuła. Paśla ŭdaru ŭ kaplicu aŭto pierakuliłasia i taksama było całkam raźbita, adnak kiroŭca cudam nie paciarpieŭ.
Kali ŭsio heta praŭda, atrymlivajecca, što mahła b adbycca jašče bolšaja trahiedyja — kali b toj dajechaŭ da škoły, zabraŭ dzicia i viartaŭsia ź im dadomu ŭ stanie mocnaha apjanieńnia, jon moh by trapić u avaryju razam ź dziciem.
Kiroŭca sam žyvie ŭ vioscy Rasła niedaloka ad razburanaj kaplicy. Dzicia, pa jakoje jon nibyta jechaŭ, — nie jaho rodnaje.
Paćvierdzić usio heta niemahčyma, ale takija padrabiaznaści raspaviadajuć adzin adnamu viaskoŭcy. Toje, što małady čałaviek byŭ mocna pjany, śćviardžajuć u kamientaryjach jašče niekalki miascovych žycharoŭ.
Razburanaja kaplica była historyka-kulturnym pomnikam XIX stahodździa, tamu, akramia pakarańnia za DTZ, kiroŭcu, vierahodna, pryjdziecca vypłačvać dziaržavie bujnuju sumu.
Anałahičny vypadak adbyŭsia taksama ŭ Smarhonskim rajonie ŭ 2021 hodzie: tady pjany vadziciel tolki paškodziŭ kaplicu XIX stahodździa na terytoryi Karanieŭskaha sielsavieta. Zhodna z zaklučeńniem ekśpierta filijała «Biełrestaŭracyi», škoda skłała zvyš 10 tysiač rubloŭ, jakija praz sud pa pazovie rajonnaha prakurora spahnali ź vinavataha.
Kamientary
Voś Boh i dapamoh durniu: padstaviu svaju kaplicu kab zachavać dzicia.
Hetamu durniu treba było b pabudavać-adnavić novuju-staruju razburannuju im kaplicu. Pakajacca na hetym miejscy. A ksiandzam davieści da naroda, što kaplica heta śviatoje miejsca, dzie Boh ratuje vypivoch. Možna prychodzić siudy, achviaravać i malicca za pazbauleńnia rodnych ad pjanstva.