Pavuk nie parazumieŭsia z dyśpietčarkaj u litoŭskim tralejbusnym parku i trapiŭ u moŭny skandał
Błohier Andrej Pavuk, jaki niadaŭna pačaŭ pracavać kiroŭcam tralejbusa ŭ Litvie, apublikavaŭ videa, jak jon razmaŭlaje sa svajoj dyśpietčarkaj u parku pa-rusku, pakul jana adkazvaje jamu pa-litoŭsku. Hety rolik i samu situacyju ź biełarusam ciapier aktyŭna abmiarkoŭvajuć u Litvie, piša LRT.
Niadaŭna Andrej Pavuk apublikavaŭ videa taho, jak jon pa-rusku razmaŭlaje sa svajoj litoŭskaj kalehaj u tralejbusnym parku. Pa słovach błohiera, u fejsbuku jon prasiŭ padpisčykaŭ pierakłaści jamu toje, što kazała dyśpietčarka.
Jak vyśvietliłasia, Pavuk pierabłytaŭ raskład pracy i pryjšoŭ na stancyju ŭ svoj vychodny dzień. Dyśpietčarka, jakaja zvyčajna razmaŭlała ź im pa-rusku, adkazvała jamu pa-litoŭsku. Biełarus «zapadozryŭ pravakacyju» i padumaŭ, što jamu chočuć pastavić propusk.
Sa svajoj staronki Pavuk videa vydaliŭ, ale jaho paśpieli zaŭvažyć litoŭskija aktyvisty i ŚMI. Kab dadatkova vybačycca pierad litoŭskaj kalehaj, Pavuk padaryŭ joj bukiet kvietak.
«Kali b Kryścina papiaredziła mianie, što z zaŭtrašniaha dnia budzie razmaŭlać pa-litoŭsku, ja b, viadoma, nie apynuŭsia ŭ takoj situacyi. Ja pierabłytaŭ dni, dumaŭ, što ŭ mianie pracoŭny dzień, a pryjšoŭ u vychodny. Jana mnie heta havoryć pa-litoŭsku, a ja nie razumieju. Dumaju, čamu jana nie addaje dakumienty, bo ja budu adsutničać, ja surjozna staŭlusia da svajoj pracy. Ja jaje pytajusia: «Skažycie, kali łaska, ja nie razumieju». Ź inšymi jana razmaŭlaje pa-rusku. Tamu ja i zapisaŭ hetuju razmovu, chacieŭ pakazać kiraŭnictvu, dumaŭ, nie pavierać», — skazaŭ žurnalistam LRT Pavuk.
Incydent aktyŭna abmiarkoŭvajuć u litoŭskich miedyja. Jak piša LRT, heta «nie pieršy vypadak, kali dziejańni biełaruskaha aktyvista vyklikajuć padazreńni». Niadaŭna jon apublikavaŭ pieśniu pra toje, jak vymaŭlać niekatoryja ruskija łajanki na litoŭskaj.
«Ja zaŭvažyŭ, što litoŭcam padabajucca ruskija łajanki. Ja zadaŭsia pytańniem, čamu tak, ci jość u litoŭcaŭ svaje sapraŭdnyja słovy, jakimi jany mahli b zamianić ruskija vykazvańni? I voś ja vuču litoŭskuju aryhinalnym sposabam z dapamohaj hetaj pieśni, pytajučysia nośbitaŭ movy, jakija jašče jość varyjanty», — kaža biełarus.
Na pytańnie, ci mahčyma vyvučyć dziaržaŭnuju movu, pražyŭšy ŭ Litvie piać hadoŭ, žurnalistam LRT Pavuk adkazaŭ, što chacieŭ by navučycca razmaŭlać pa-litoŭsku ŭ svaim ułasnym tempie.
«Ja krychu viedaju litoŭskuju. Mahu zamović sabie kavy, skazać niešta prostaje. Viadoma, hetaha niedastatkova, ale mnie treba bolš času, čym inšym. Ja chaču vyvučać litoŭskuju movu kamfortna i z zadavalnieńniem, a nie ŭ niervovaj i varožaj abstanoŭcy. Ja nie lublu, kali na mianie cisnuć».
Kiraŭnica adździeła markietynhu i kamunikacyj Vilenskaha hramadskaha transpartu Hintare Džalicie-Štaryjenie zajaviła, što kampanija pravodzić unutranaje rasśledavańnie ŭ suviazi ź videa z dyśpietčaram.
«Naša kampanija nie ścierpić źniavažlivych, abraźlivych abo niepavažlivych pavodzin u adnosinach da supracoŭnikaŭ, pasažyraŭ abo inšych asob. Taksama nie dapuskajucca lubyja parušeńni, źviazanyja z abaronaj piersanalnych dadzienych. Mienavita ŭ suviazi z hetym vypadkam, u suviazi z mahčymymi parušeńniami etyki i ŭnutranych pracedur, ciapier my pravodzim unutranaje rasśledavańnie, padčas jakoha buduć acenienyja jak dziejańni supracoŭnika, tak i abstaviny situacyi, jakaja skłałasia», — prakamientavała Džalicie-Štarenie.
Pavodle jaje słoŭ, kampanija prykładaje «ŭsie namahańni», kab ludzi, jakija nie razmaŭlajuć pa-litoŭsku, mieli chacia b minimalnaje jaje viedańnie, ale, zhodna z paradkam kampanii, infarmacyja pavinna pradastaŭlacca supracoŭnikam na zrazumiełaj dla ich movie.
«U dadzienym kankretnym vypadku ja nie mahu skazać, čamu naš supracoŭnik nie havaryŭ na zrazumiełaj movie. Mahčyma, my nie bačym usiaho kantekstu i jon [Andrej Pavuk] spravakavaŭ supracoŭnika, i dla čałavieka ŭ takoj situacyi naturalna havaryć na svajoj movie, tamu što zdajecca, što hetaja dyskusija ni da čaho nie pryviadzie», — zaŭvažyła jana.
Kiraŭnik Departamienta mihracyi Evielina Hudzinskajcie zajaviła, što Departamient mihracyi praviadzie rasśledavańnie pa hetaj spravie, kali atrymaje adpaviedny zapyt ad pravaachoŭnych orhanaŭ.
Namieśnik staršyni Kamiteta nacyjanalnaj biaśpieki i abarony Siejma Litvy Łaŭrynas Kaščunas rezka raskrytykavaŭ dziejańni i słovy biełarusa. Pavodle jaho, heta niepavaha da dziaržavy i jaje movy, i za takija ŭčynki čałavieka varta pazbaŭlać prava žyć i pracavać u Litvie.
«Ja, biezumoŭna, hatovy padrychtavać list u Departamient mihracyi dla acenki ŭsich hetych abstavin i pryniaćcia adpaviednaha rašeńnia. Vidavočna, što heta niepavaha da dziaržavy, niepavaha da dziaržaŭnaj movy, niepavaha da hramadzian Litoŭskaj Respubliki, tamu za takija dziejańni pavinna być vyznačana cana, i hetaja cana pavinna być vielmi jasnaj. Kali hość nie pavažaje dziaržavu, u jakoj jon pracuje, u jakoj jon žyvie, jakaja daje jamu žyllo, to jon nie pavinien mieć prava pracavać ci žyć tut», — skazaŭ Kaščunas.
Ciapier čytajuć
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ5
Kamientary
Kali hość nie pavažaje dziaržavu, u jakoj jon pracuje, u jakoj jon žyvie, jakaja daje jamu žyllo, to jon nie pavinien mieć prava pracavać ci žyć tut», — skazaŭ Kaščunas.
Jakoje žyllo Pavuku dziaržava dała? Jon jaho zdymaje, bo pracuje. I nie prosta pracuje, a na karysnaj dla hramadstva pracy!
Ja sama emihrantka, emihracyju nie abirała, nie čakała, nie chacieła, ale kraina, jakaja mianie prymaje, tak ža mianie nie čakała j nie abirała. Čamu moj kamfort važniejšy za kamfort ludziej vakoł? Litoŭcy ŭsiaho-ta chočuć u svajoj krainie razmaŭlać svajoj movaj. Znajoma?