Litva rychtuje žorstki adkaz Biełarusi: mahčymaje doŭhaterminovaje zakryćcio miažy i spynieńnie tranzitu ŭ Kalininhrad
Litva rychtuje kompleksny adkaz na hibrydnyja ataki z boku Biełarusi, praź jakija treci raz u hetym miesiacy spyniałasia praca Vilenskaha aeraporta. Siarod mahčymych mier — praciahłaje zakryćcio miažy ź Biełaruśsiu i abmiežavańnie tranzitu ŭ Kalininhrad.
Siońnia ministr unutranych spraŭ i časovy ministr abarony Litvy Uładzisłaŭ Kandratovič źbiraje rabočuju naradu, kab abmierkavać techničnyja miery pa praduchileńni dalejšych pavietranych incydentaŭ, takich jak paloty meteazondaŭ i dronaŭ, što paralizujuć pracu Vilenskaha aeraporta. Pra heta napisała ŭ fejsbuku premjerka Litvy Inha Ruhinienie.
Rašeńni buduć pradstaŭleny Kamisii nacyjanalnaj biaśpieki zaŭtra a 9‑j hadzinie ranicy. Tam buduć razhladać jak karotkaterminovyja, tak i doŭhaterminovyja rašeńni litoŭskaha boku.
Adnačasova Ministerstva ŭnutranych spraŭ Litvy padrychtavała papraŭki da Kryminalnaha kodeksa — praduhledžvajecca adkaznaść za pahrozy avijacyi i bolš strohija pakarańni za kantrabandu pavietranym šlacham.
Taksama ministerstva ekanomiki razam z pradstaŭnikami abarony, navuki i inavacyj pavinny znajści kankretnyja technałahičnyja rašeńni suprać pavietranych pahroz z boku Biełarusi.
Adnačasova z dypłamatyčnym šlacham premjerka nie vyklučaje mahčymaści zakryć miažu ź Biełaruśsiu na praciahły termin.
Kiraŭnik litoŭskaj dziaržavy Hitanas Naŭsieda prapanavaŭ razhledzieć pytańnie ab abmiežavańni tranzitu ŭ Kalininhrad.
Jon aceńvaje incydenty apošnich dzion i zboi ŭ pracy aeraportaŭ «jak hibrydnuju ataku na Litvu, na jakuju nieabchodna reahavać jak simietryčnymi, tak i asimietryčnymi sposabami»:
«U bližejšyja dni ŭrad pavinien prapanavać sposaby reahavańnia. Siarod varyjantaŭ, jakija pavinny być razhledžany, — praciahłaje zakryćcio miažy ź Biełaruśsiu i abmiežavańnie tranzitu ŭ Kalininhrad».
Viečaram 25 kastryčnika čarhovy raz była spyniena praca Vilenskaha aeraporta. Heta ŭžo treci raz za tydzień i druhi viečar zapar, kali z-za vialikaj kolkaści kantrabandysckich šaroŭ z boku Biełarusi spynialisia paloty i časova zakryvalisia pamiežnyja punkty propusku.
Ahułam, za tydzień spynieńnie pracy aeraportaŭ zakranuła kala 70 avijarejsaŭ i bolš za 10 tysiač pasažyraŭ.
Pradstaŭniki parłamienckaj apazicyi raskrytykavali ŭrad Litvy za biaździejnaść.
«Litva stanovicca niedziejazdolnaj krainaj, jakuju zachočuć abjazdžać bokam jak biznesmieny, tak i turysty», — zajaviŭ staršynia Demakratyčnaha sajuza «U imia Litvy» Saŭlus Skviarnialis.
«Druhuju noč zapar parušajecca praca Vilenskaha aeraporta, — napisaŭ jon u sacsietcy. — Padobna, što žadańnie našych žycharoŭ karystacca staličnym aeraportam stanie minimalnym. Niedziejazdolnaść ułady ŭžo nanosić škodu jak imidžu dziaržavy, tak i jaje biaśpiecy i nadziejnaści».
Skviarnialis papraknuŭ urad u tym, što jany pa-raniejšamu śviata pierakananyja, što havorka idzie prosta pra kantrabandu.
«U Biełarusi jakaja b ni była niezakonnaja dziejnaść nie ažyćciaŭlajecca biez dazvołu, uzhadnieńnia abo prosta zahadu KDB i vajennaj raźviedki», — miarkuje były premjer-ministr.
Kamientary